52
1 ¿Bizx que run ba zxön cuinuʼ niʼa que döʼ ruʼu, bönniʼ nál-la?
Zóaticaʼsö yöl-laʼ dxiʼi ladxiʼ queëʼ Dios.
2 Len lúdxuʼu rúnlenuʼ luzóʼo didzaʼ para usunítiuʼ bönachi.
Naca lúdxuʼu, bönniʼ rizíʼ yëʼ, ca tu guíë tuchiʼ.
3 Nadxíʼirönuʼ le naca döʼ ca nadxíʼinuʼ le naca dxiʼa,
en nadxíʼirönuʼ le cabí nácatë ca nadxíʼinuʼ le naca idútë li.
4 Nadxíʼinuʼ yúguʼtë didzaʼ tun ditaj bönachi,
liʼ naʼ, bönniʼ rizíʼ yëʼë.
5 Tsaz uzötaj cazëʼ Dios liʼ.
Sönëʼ liʼ, en ubéajëʼ liʼ lu yuʼu lidxuʼ,
en ucuítëʼ liʼ ga nacuáʼ nupa nabángaca.
6 Yuguʼ bönniʼ tsahuiʼ ilaʼléʼenëʼ lë ni, en iládxinëʼ Dios.
Uluʼzxidxëʼ queëʼ bönniʼ naʼ rizíʼ yëʼë, ilaʼnë́ʼ:
7 “¡Buliʼyútsöcaʼ! Bönniʼ ni bitiʼ gúʼunnëʼ uzxöni ládxëʼë Dios,
pero buzxöni ládxëʼë yöl-laʼ tsahuiʼ queëʼ,
en le zián le guzë́ ládxëʼë le cabí bi nazacaʼ.”
8 Nacaʼ nedaʼ ca tu yaga olivo yaʼa le röʼ raʼ yuʼu lidxëʼ Dios.
Uzxöni ládxaʼa yöl-laʼ dxiʼi ladxiʼ queëʼ Dios yuguʼ iz siʼ zaca.
9 Guíëticaʼsaʼ Liʼ: “Xclenuʼ” tuʼ ben cazuʼ Liʼ ga naca caní,
ateʼ gunaʼ löza Loʼ le naca dxiʼa lógaca nupa néquiguequi quez quiuʼ.