65
Dios, nupa nacuáʼ yödzö Sión ilaʼgúʼu Liʼ yöl-laʼ ba,
en ilunna quiuʼ le gulaʼzíʼ lu në́ʼeguequi,
tuʼ riyö́n quézinuʼ Liʼ cateʼ tuʼlidza Liʼ,
ateʼ yúguʼtë bönachi ilaʼdxín loʼ.
Tun nigui nedaʼ dul-laʼ nunaʼ,
pero runiti lo cazuʼ netuʼ ca naca le ridáʼbagaʼtuʼ Liʼ.
Bicaʼ ba nupa nabö́ cazuʼ quiuʼ, en nulidzuʼ quiuʼ,
para ilaʼcuáʼ yuguʼ lataj láʼayi quiuʼ.
Huölaj udzéʼetuʼ le nácagaca dxiʼa yúʼugaca lidxuʼ,
encaʼ le yúʼugaca yudoʼ láʼayi quiuʼ.
Tuʼ nacuʼ tsahuiʼ rubiʼu didzaʼ, en runuʼ yuguʼ le zxön le tácalen netuʼ.
Naca cazuʼ Dios Nu rusölá netuʼ.
Nupa nacuáʼ idútë yödzölió uluʼzxöni ladxiʼ Liʼ,
encaʼ nupa nacuáʼ ziʼtuʼ iaʼtsöláʼalö nísadoʼ.
Len yöl-laʼ huáca quiuʼ nucúʼu yuguʼ guíʼa zxön,
le naca bë́ʼgaca nál-latërö cazuʼ Liʼ.
Ruzóa dxíuʼ le riyasa ridxía lu nísadoʼ, en le ruʼu bö que.
Ruzóa dxíuʼ bönachi cateʼ tuʼtsatsa.
Bönachi idútë yödzölió tadxi Liʼ niʼa quégaca le zxön nunuʼ.
Le run cazuʼ Liʼ tun ga tuʼdzeja bönachi idapa laʼa yödzölió.
Ruíʼi ládxuʼu luyú, en risö́l-luʼu nisa guiö́j.
Runuʼ ga ruhuöáca yu yaʼa.
Nucúʼu luyú naʼ yuguʼ yegu yúdzugaca nisa zila,
le run ga dë́ticaʼsö zxoaʼ-za, tuʼ caní raza ládxuʼu Liʼ.
10 Risö́l-luʼu nisa guiö́j gapa dë́gaca na, en rusubisuʼ gapa chinadúz.
Ruúnuʼ yúludoʼ luyú zidzaj, en runuʼ ga taʼgula guixiʼ cuandoʼ.
11 Runuʼ ga ruláʼ yödx yanaʼ le nadúz luyú ni tu iz tu iz,
en ga zóaticaʼsö le ilëʼaj ilágugaca bönachi.
12 Nacuáʼabaʼ böaʼ-bëdxi laʼ guixiʼ,
ateʼ tuʼdzeja bönachi yuguʼ lu guíʼadoʼ.
13 Gapa naca lachiʼ nacuáʼabaʼ böʼcuʼ zxilaʼ,
ateʼ dxíadaʼ zxoaʼ xtila laʼ yëla.
Lu yöl-laʼ rudzeja quéguequi taʼbö́dxiʼa,
en tul-la bönachi quiuʼ.