75
¡Rëtuʼ Liʼ: “Xclenuʼ, Dios”!
¡Rëtuʼ Liʼ: “Xclenuʼ”,
tuʼ zóaticaʼsuʼ gal-laʼ ga zóatuʼ!
¡Tuíʼi didzaʼ bönachi ca nácagaca le zxön nunuʼ!
 
Rnnëʼ Dios: “Nuzóaʼ dza cateʼ uchiʼa usörö́aʼ bönachi.
Uchiʼa usörö́ cazaʼ léguequi ca naca le nácatë.
Tuʼsuniti yödzölió, en nupa nacuáʼ niʼ,
pero tsaz nuzóa cazaʼ le.”
Gudxaʼ nupa tun ba zxön cuínguequi, gunníaʼ: “Bitiʼ gun ba zxön cuinliʼ”,
en gudxaʼ nupa tuáʼ döʼ: “Bitiʼ huë tsahuiʼ cuinliʼ.
Bitiʼ huë tsahuiʼ cuinliʼ,
en bitiʼ güíʼiliʼ didzaʼ lu yöl-laʼ run ba zxön cuinliʼ.”
 
Calëga ga rilén gubidza, en calëga ga ribía gubidza,
en calëga laʼ guixiʼ ga dë lataj irúaj le huë tsahuiʼ bönachi,
pero uchiʼa usörö́ cazëʼ Dios bönachi.
Uzötjëʼ tuëʼ bönniʼ, en uchisëʼ iaʼtúëʼ.
Nuáʼ cazëʼ Xanruʼ lu nëʼë tu zxigaʼ yudzu xisa le ribía lubá uva le ribixi rilëbi.
Chinugútsiʼdërëʼ le, ateʼ riguʼë le para ilëʼaj le nupa tuáʼ döʼ yödzölió ni,
ateʼ ilë́ʼjadërö le siláʼ que.
Nedaʼ usiyö́nticaʼsaʼ bönachi lë ni,
en gul-laʼ yöl-laʼ ba queëʼ Dios queëʼ Jacob.
10 Ugǘëʼ yöl-laʼ unná bëʼ quégaca nupa tuáʼ döʼ.
Quíxjëʼ tsaz yöl-laʼ unná bëʼ quégaca nupa nácagaca tsahuiʼ.