76
1 Zxíʼini xiʼsóëʼ Judá núnbëʼgaquiëʼ Dios.
Nayë́pisë le lëʼ ladaj bönachi Israel.
2 Zoa caz lataj láʼayi queëʼ lu yödzö Jerusalen,
ateʼ nazíʼi le Sión lataj ga naʼ zoa cazëʼ.
3 Niʼ guditsjëʼ yuguʼ yaga lahui tuchiʼ zoa guíʼ láhuiguequi,
encaʼ yuguʼ guíë la, en yuguʼ le taʼdíl-lalen bönachi lu gudil-la.
4 ¡Yöl-laʼ ba Liʼ, Dios!
¡Nayë́pisëtëruʼ ca yuguʼ guíʼa zxön!
5 Buxicjuʼ bönniʼ nál-lagaquiëʼ.
Gudödi yëla guiö́j lógaquiëʼ bönniʼ röjáquiëʼ gudil-la,
en bitiʼ guca ilaʼchisa náʼagaquiëʼ.
6 Cateʼ Liʼ, Dios queëʼ Jacob, gudíl-lalen cazuʼ légaquiëʼ
gulátibaʼ böaʼ, ateʼ gulati caʼ nupa dxíagaca légacabaʼ.
7 Liʼ caz ral-laʼ gádxituʼ,
tuʼ cabí gaca nu soa loʼ cateʼ ilenuʼ.
8 Ga zuʼ Liʼ yehuaʼ yubá gunnóʼ uchiʼa usörö́uʼ bönachi.
Níʼirö guladxi nupa nacuáʼ lu yu, en gulaʼcuáʼ dxisö,
9 cateʼ guzuínëʼ Dios para uchiʼa usörö́ëʼ quégaca bönachi,
para usölë́ʼ nupa nácagaca nöxaj ladxiʼ yödzölió ni.
10 Sal-laʼ taʼlédeʼe bönachi, gaca yöl-laʼ ba queëʼ Lëʼ.
Uziʼë xibégaca nupa uluʼgáʼana ládjaguequi.
11 Guliʼsíʼ lu náʼaliʼ bi gunliʼ lahuëʼ Xanruʼ Dios,
en guliʼgún ca naʼ innaliʼ.
Yúguʼtë nupa nacuáʼ ga naʼ zoëʼ ral-laʼ bi uluʼnödzaj queëʼ,
tuʼ náquiëʼ Nu ral-laʼ gádxiruʼ.
12 Ubéaj cazëʼ böʼ nácagaca caz nupa nadéliʼgaca lataj lo.
Bönniʼ taʼnná bëʼë luyú ni tádxinëʼ Lëʼ.