5
نَامَن شَ يَلَنيِ كُنّ قُرٍ مَ
عَرَ مِ مَنفّ شَ سْورِيٍ شُنيِ نَامَن نُ رَقَن عَ شَ مَنفّ مَ. عَ تِدٍ نُ فبٌ عَ شَ مَنفّ بّ، بَرِ مَ عَلَتَلَ شُننَكٍلِ قِ عَرَ مِ بْشِ مَ عَ تَن نَن سَابُي رَ. كْنْ كُنّ قُرٍ نُ نَ يِ سْورِ شُنيِ فبَنفبَلَنيِ مَ. لْشْي ندٍ عَرَ مِكَيٍ تٌ سِفَ عِسِرَيِلَ فٍرٍدٍ، عٍ تّمّدِ ندٍ سُشُ نّ، عٍ عَ شَنِن عٍ شُن مَ، عَ شَ قِندِ نَامَن شَ فِنّ شَ كٌنيِ رَ. نَ تّمّدِ نَشَ عَ قَلَ عَ مَرِفِ بّ، «شَ ﭑ مَرِفِ شَ مْرِ سِفَ نُ نَمِحْنمّ يِرٍ، نَشَن نَ سَمَرِ، نَ نْمَ نّ يِ كُنّ قُرٍ بَدٍ عَ مَ نُ.»
نَامَن نَشَ نَ دّنتّفّ سَ عَ شَ مَنفّ بّ، تّمّدِ عِسِرَيِلَكَ نَشَن قَلَشِ عَ بّ. عَرَ مِ مَنفّ نَشَ عَ قَلَ نَامَن بّ، «عِ شَ سِفَ سَمَرِ. ﭑ بَتَاشّ سّبّمَ عِسِرَيِلَ مَنفّ مَ عِ شَ قٍ رَ.» نَامَن نَشَ فبٍتِ كِلٌ كّمّ سَشَن، شّيمَ كِلٌ تٌنفٌ سٍننِ، نُن دٌنمَ تٌقَنيِ قُ شَنِن عَ شُن مَ.
عَ نَشَ نَ بَتَاشّ شَنِن عِسِرَيِلَ مَنفّ شْن مَ، عَ نُ سّبّشِ نَشَن كُي، «ﭑ بَرَ ﭑ مَ سْورِيٍ شُنيِ نَامَن شّي عِ يِرٍ، عَلَكٌ عِ شَ كُنّ قُرٍ بَ عَ مَ.» عِسِرَيِلَ مَنفّ تٌ فّ بَتَاشّ شَرَندٍ، عَ نَشَ عَ شَ دٌنمَ عِبْو، عَ قَ عَ قَلَ، «ثٍ، عَلَ نَن ﭑ نَ، نَشَن قَشّ تِمَ، نَشَن مِشِ رَكِسِمَ، يِ مَنفّ تٌ قَ عَ قَلَمَ ﭑ بّ، عَ ﭑ شَ كُنّ قُرٍ بَ مِشِ ندٍ مَ؟ وٌ عَ مَتٌ، ﭑ تَن بّ، عَ وَ مَ فٍرٍ نَن شْن.»
عَلَ شَ مِشِ عٍلِسٍ تٌ عَ مّ، عَ مَنفّ بَرَ عَ شَ دٌنمَ عِبْو سُننُنيِ كُي، عَ نَشَ شّيرَ شّي مَنفّ مَ، عَ قَلَقٍ رَ، «عِ عِ شَ دٌنمَ عِبْوشِ مُنقٍ رَ؟ عِ نَشَن نَبَمَ، عَ شّي ﭑ يِرٍ، عَلَكٌ عَ شَ عَ كٌلٌن نَمِحْنمّ ندٍ نَ عِسِرَيِلَ بْشِ مَ.» نَ كُي، نَامَن نَشَ سِفَ عَ شَ سٌييٍ نُن عَ شَ سْورِ رَفِسٍ رَ، عَ قَ تِ عَننَبِ عٍلِسٍ شَ بَنشِ سٌدٍ دّ رَ. 10 عٍلِسٍ نَشَ مِشِ شّي تَندٍ عَ قَلَقٍ رَ نَامَن بّ، «سَ عِ مَشَ يُرُدّن شُرٍ مَ سَنيَ سٌلٌقٍرٍ. نَ كُي عِ قَتٍ يَلَنمَ نّ، عِ قَ سّنِيّن.»
11 نَامَن نَشَ شْنْ نَ وْيّنيِ مَ، عَ نُ قَ سِفَ عَ قَلَ رَ، «ﭑ حْشْ عَ مَ، عَ مِنِمَ نّ نُ ﭑ يَ عِ، عَ عَ مَرِفِ عَلَتَلَ مَشَندِ، عَ عَ بّلّشّ سَ كُنّ يِرٍ مَ ﭑ قَتٍ عِ، كُنّ قُرٍ شَ بَ ﭑ مَ. 12 شُرٍ قَنيِ مُ نَ ﭑ شْنيِ دَ مَسِ، عَلْ عَبَنَ نُن قَرثَرَ شُرٍيٍ، نَشٍيٍ دَنفِ عِسِرَيِلَ شُرٍيٍ بِرِن نَ؟ ﭑ مُ نْمَ ﭑ مَشَدٍ شّ مّننِ، ﭑ سّنِيّن؟» نَ كُي عَ نَشَ فبِلٍن عَ شْنْشِ رَ.
13 كْنْ عَ شَ كٌنيِيٍ نَشَ عَ قَلَ عَ بّ، «شَ يِ نَمِحْنمّ سَ قٍ شْرْشْي ندٍ نَن قَلَ عِ بّ نُ، عِ مُ عَ رَبَمَ شّ نُ؟ عَ تٌ عَ قَلَشِ عِ بّ عَ عِ شَ سَ عِ مَشَ، عَ مُ لَنمَ شّ عِ شَ نَ رَبَ؟» 14 نَ كُي نَامَن نَشَ فٌرٌ يُرُدّن شُرٍ، عَ سِن عَ شْورَ سَنيَ سٌلٌقٍرٍ، عَلْ عَلَ شَ مِشِ عَ مَسٍن كِ نَشّ. نَ دَنفِ شَنبِ عَ قَتٍ نَشَ قَن عَلْ دِ مّدِ، عَ سّنِيّن.
15 نَامَن نَشَ فبِلٍن عَلَ شَ مِشِ يِرٍ، عَ تَن نُن عَ حّرّ بٌورٍيٍ بِرِن نَ. عَ تٌ سٌ، عَ نَشَ تِ عَ يَ عِ، عَ عَ قَلَ، «ﭑ بَرَ عَ كٌلٌن، عَلَ مُ نَ دّدّ شَ عِسِرَيِلَ بْشِ شَ مُ عَ رَ. يَكْسِ، ﭑ بَرَ عِ مَيَندِ، عِ شَ ﭑ مَ بُحَ رَ سُشُ.» 16 عٍلِسٍ نَشَ عَ يَابِ، «ﭑ بَرَ ﭑ كَلِ عَلَتَلَ رَ، ﭑ نَشَن بَتُمَ، ﭑ مُ نْمَ عِ شَ بُحَ رَ سُشُدٍ.» نَامَن نَشَ عَ كَرَشَن عَ شَ نَ رَ سُشُ، كْنْ عَ نَشَ تٌندِ.
17 نَ تّمُي نَامَن نَشَ عَ قَلَ عٍلِسٍ بّ، «عَوَ يِرٍ، عِ نَشَن نَبَمَ ﭑ بّ، عِ شَ بٍ بْشِ بّندّ ندٍ سٌ ﭑ تَن عِ شَ كٌنيِ يِ رَ، سٌقَلٍ قِرِن نْمَ نَشَن شَنِندٍ. ﭑ وَ مَ سّرّشّبَدٍ تِقٍ نَ بّندّ قَرِ، ﭑ قَ سّرّشّ فَن دَاشِ نُن سّرّشّ فبّتّيٍ بَ عَلَتَلَ فبَنسَن بّ. ﭑ مُ سّرّشّ يٌ بَمَ عَلَ فبّتّ بّ سْنْن. 18 كْنْ عَلَتَلَ شَ دِحّ ﭑ مَ يِ قٍ كٍرٍنيِ مَ. ﭑ مَ مَنفّ نّ سٌمَ عَ شَ عَلَ رِ مْن شَ سَلِدٍ كُي، عَلَكٌ عَ شَ سُيِدِ عَ بّ، عَ لُمَ ﭑ بّلّشّ سُشُ رَ عَ يِ، نَ عَ نِيَمَ نّ ﭑ تَن قَن شَ ﭑ عِفٌرٌ بْشِ مَ رِ مْن كُيٍ شَ بَنشِ كُي. عَلَتَلَ شَ دِحّ ﭑ مَ نَ شَ قٍ رَ.» 19 عٍلِسٍ نَشَ عَ يَابِ، «سِفَ بْحّسَ كُي.» نَ تّمُي نَامَن نَشَ كٍلِ عَ شُن عَ سِفَ.
عَ تٌ عَ مَكُيَ دٌندٌرٌنتِ، 20 عٍلِسٍ قْشِرَبِرّ فٍشَسِ نَشَ عَ قَلَ عَ بْحّ مَ، «ﭑ مَرِفِ بَرَ عَ لُ يِ عَرَ مِكَ شَ سِفَ، عَ مُ عَ شَ بُحَ رَ سُشُ. ﭑ بَرَ ﭑ كَلِ عَلَتَلَ رَ، ﭑ تَن شَ ﭑ فِ عَ قْشْ رَ بَ، عَلَكٌ ﭑ شَ سٍ ندٍ سْتْ عَ رَ.» 21 عَوَ، فٍشَسِ نَشَ عَ فِ نَامَن قْشْ رَ. نَامَن تٌ سَ عَ تٌ عَ فِ رَ قَقٍ رَ عَ قْشْ رَ، عَ نَشَ فٌرٌ مَقُرٍن عَ شَ فِسٍ كْن نَ، عَ سَ عَ رَلَن، عَ عَ مَشْرِن، «مُنسٍ نِيَشِ؟ تَنَ مُ نَ؟» 22 عَ نَشَ عَ يَابِ، «هّرِ تُن. ﭑ مَرِفِ نَن ﭑ شّيشِ ﭑ شَ قَ عَ قَلَ عِ بّ، ‹نَمِحْنمّ شْحّ قِرِن نَن قَشِ ﭑ شْنيِ كٍلِ عٍقِرَ مِ فٍيَيٍ مَ. يَندِ، فبٍتِ كِلٌ تٌنفٌ سَشَن نُن دٌنمَ قِرِن قِ ﭑ مَ عٍ بّ.›» 23 نَامَن نَشَ عَ قَلَ عَ بّ، «عِ شَ فبٍتِ كِلٌ تٌنفٌ سٍننِ رَ سُشُ.» عَ نَشَ عَ كَرَشَن، عَ نَ فبٍتِ سَ بّكِ قِرِن كُي، عَ نُن دٌنمَ قِرِن، عَ عٍ سٌ عَ شَ كٌنيِ قِرِن يِ رَ. نٍيٍ نَشَ تِ فٍشَسِ يَ رَ، عٍ عَ شَنِن عَ بّ.
24 عٍ تٌ تٍنتٍنيِ قَرِ لِ، فٍشَسِ نَشَ كٌتٍ رَ سُشُ عٍ يِ رَ، عَ عَ رَ سٌ بَنشِ، عَ قَ نَ مِشِيٍ رَفبِلٍن، نٍيٍ نَشَ سِفَ. 25 نَ دَنفِ شَنبِ، عَ نَشَ قَ عَ مَرِفِ يِرٍ. عَننَبِ عٍلِسٍ نَشَ عَ مَشْرِن، «عِ كٍلِشِ مِندٍن يِ كِ فٍشَسِ؟» فٍشَسِ نَشَ عَ يَابِ، «ﭑ مُ سِفَ دّدّ.» 26 كْنْ عٍلِسٍ نَشَ عَ قَلَ عَ بّ، «نَامَن تٌ فٌرٌ عَ شَ فِسٍ كُي عِ رَلَندٍ، ﭑ مُ نَ تٌ شّ ﭑ بْحّ مَ؟ يِ وَشَتِ عَ لَنمَ عِ شَ فبٍتِ، دٌنمَيٍ، عٌلِوِ بِلِيٍ، سَنسِيٍ، شُرُ سٍ لَنمَيٍ نُن عَ شُنفبٍيٍ، كٌنيِ فِنّيٍ نُن كٌنيِ شّمّيٍ قٍن يِ كِ؟ 27 نَامَن شَ كُنّ قُرٍ لُمَ نّ عِ نُن عِ بْنسْي مَ عَبَدَن!» فٍشَسِ نَشَ كٍلِ عَ يَ عِ. كُنّ نَشَ دِن عَ قَتٍ بِرِن نَ، عَ قَ رَقِيشّ عَلْ كُندَ.