আল-জবুর ৩
আপন পুয়া আবছালমর ছামন থাকি বাগিবার কালো হজরত দাউদর মিজমর।
1 ও মাবুদ, আমার দুশমনর পরিমান কত বাড়িগেছে,
দেখরা নি, কত মানষে আমার লগে লাগের।
2 আমার বেয়াপারে কত জনে মাতিরা,
কইরা, আল্লার দরবারো তার জান বাচানির পথ নাই।
(ছেলা)
3 অইলে ও মাবুদ, খরর দুশমন থাকি তুমিউ আমার রইক্ষাকারি,
তুমিউ আমার শান-বড়াই, বিপদর মাজে আমারে সাওস দিরায়।
4 আমি জুরে জুরে মাবুদরে ডাকি,
নিজর পবিত্র পাহাড়ো থাকি আমার আরজি হুনইন।
(ছেলা)
5 আমি হুতিলাম, হুতিয়া ঘুমাইলাম, বাদে হজাগও অইলাম,
স্বয়ং মাবুদেউ আমারে তান কুলো ঠাই দেইন।
6 আমার চাইরোবায় হাজারে হাজার দুশমনে বেরিয়া উবাই রইছে,
উবাইলেও আমি ইতারে ডরাই না।
7 ও মাবুদ, জলদি করো!
ও আমার আল্লা, আমার জান বাচাও!
তুমি তো আমার হক্কল দুশমনর মুখো ঘুষি মারবায়,
বজ্জাত অকলর দাত ভাংগিলিবায়।
8 জান বাচানি তো মাবুদরউ কাম,
আপন প্রজার উপরে তুমার রহম-বরকত জারি রউক॥
(ছেলা)