আল-জবুর ৯
এবাদত-বন্দেগি পরিচালকর লাগি: সুর ‘মউত-লাব্বেন’।
হজরত দাউদর মিজমর।
1 আমি পুরাপুর দিলে-জানে মাবুদর গুনগান গাইমু,
তুমার কুদরতি কাম-কাজর কথা আমি তবলিগ করমু।
2 আমি তুমারে লইয়াউ ফুর্তি-আমোদ করমু,
ও রাব্বুল আলামিন, তুমার নামর তারিফ গীত গাইমু।
3 দুশমন অকল যেবলা আমার খর থাকি ফিরিয়া যায়,
যাওয়ার কালো উষ্টা খাইয়া পড়িয়া তারা মরিযায়।
4 নালিশ হুনিয়া তুমি আমার পক্ষে রায় দিছো,
রাজ-গদিত বইয়া তুমি তো হক বিচার করছো।
5 তুমি ভিন জাতিরে ধামকি দিয়া অউ নাফরমান বিনাশ করছো,
তুমি চিরকালর লাগিয়া ইতার নাম মিটাইলিছো।
6 ইতা দুশমন অকল গেছে নিপাত অইয়া,
তারার বাড়ি-ঘর বিনাশ চিরকালর লাগিয়া,
তারার টাউন অকল তুমি ফালাইছো তুলিয়া,
কুনু চিন নাম-নিশানা না রাখিয়া।
7 অইলে মাবুদ তো রইন চিরকাল,
তাইন করছইন বিচারর গদি বওয়াল,
8 হক-ইনছাফে জগতর বিচার-ফয়ছালা করবা,
হক-হালালিয়ে তামাম জাতির বিচার করবা।
9 জুলুমো পড়া জনর লাগি মাবুদউ তার আশ্রয়,
মছিবতর কালো তাইন নিরাপদ ঠিকানা অয়।
10 তুমারে চিনে যারা, তুমার উপরে ভরসা করে তারা,
মাবুদ গো, তুমার তালাশ কররা আশিকর লগ তুমি ছাড়ছো না।
11 ছিয়ন নগরো বসত কারি মাবুদর তারিফ-গজল গাও,
তান কুদরতি লিলা-খেলার বয়ান হক্কল জাতিরে জানাও।
12 খুন-খারাপির বদলা দেওরায় মনো রাখইন হকলতা,
দুখি-কাংগালর কান্দন তাইন কুনুদিন ফাউরইন না।
13 দুশমনর আতো দুর্দশা দেখিয়া রহম করো মাবুদ গো,
মউতর দুয়ার থাকি তুমি আমারে তুলিয়া নেও গো,
14 যাতে তুমার শুকরিয়া-তারিফ আমি গাইতাম পারি,
তুমি আমার জান বাচানিয়ে আমি করমু খুশি-বাসি,
ছিয়ন নগরির পাড়ায় পাড়ায় করমু নাচা-নাচি।
15 নিজর খুড়া গাতো পড়িয়া ভিন জাতি বুড়িগেছে,
তারার পাতাইল লুকাইল ফান্দো তারারউ পাও হামাইছে।
16 মাবুদে নিজরে জাইর করিয়া হক বিচার করছইন,
নাফরমান দলর বানাইল ফান্দো তারাউ আটকিছইন।
(হিগ্গায়ন-ছেলা)
17 নাফরমান অকল হামাউক গিয়া গইন পাতালে,
অতার লগে ভিন জাতিও ভুলি যাইন যেতায় আল্লারে।
18 নিরাশ্রয়রে ফাউরইন না তাইন চিরকালর দায়,
দুখি-কাংগালর আশাও কুনুদিন বিফলে যাইতো নায়।
19 জলদি আও গো মাবুদ!
মানষে যানু না দেখায় বাড়তি বাহাদুরি,
তুমার ছামনে বিচার অউক হকল ভিন জাতি।
20 ডর-ভয় দেখাও মাবুদ তুমি তারারে,
তারা খালি মাটির মানুষ জানউক ভিন জাতিয়ে।
(ছেলা)॥