আল-জবুর ১০
1 মাবুদ গো, তুমি কেনে দুরই রইরায়?
বিপদর কালো কিতাল্লাগি লুকাইরায়?
2 জালিমর বাহাদুরিয়ে দুখি-কাংগাল ভুগে,
হেশে তারার চতুরির ফান্দো তারাউ ধরা পড়ে।
3 মন্দ জনে তার মনর বজ্জাতির বাহাদুরি দেখায়,
লোভী মানষে মাবুদরে তুচ্ছ মনো করিয়া গালিয়ায়।
4 বেটাগিরি করিয়া মন্দ লোকে চায় না তান দিদার,
আল্লা বলতে কেউ নাই, অলা একিন তারার।
5 দুনিয়াবি জিন্দেগি হামেশা লাভবান তারার,
তারার চউখে দেখে না তো হক ইনছাফ তুমার,
“ইতা বুলে বউত উপরে,” অখান তারা কয়,
“আমার বিরুধিরে ফু দিয়া উড়াইলিমু নিচ্চয়।”
6 মনে মনে কয় তারা, “আমার কুনু পতন নাই,
কুনু যুগে কুনু দিনউ বিপদ-আপদ আইতো নায়।”
7 তার মাতো লান্নত আর ধান্দা, জুর-জুলুমে ভরা,
জিফরা ভরা নাফরমানি বজ্জাতির বসত খানা।
8-9 নিরাই জংলার মাজে হে উত পাতিয়া বয়,
নির্জন জাগাত নি-অপরাধিরে খুন করাত রয়।
অসহায়-অভাগা অকল তারার দুইও চউখর নিশানা,
সিংহয় যেলা খাপ ধরিয়া জংলাত বয় লুকাইয়া,
দুখি জনরে ধরার লাগি তারাও অলা বয়,
ধরিয়া তারে টানিয়া আনি ফান্দো হারাই থয়।
10 ফান্দো হারাই নরম করি পিষিয়া চুরমার করে,
অসহায়-অভাগা জন তারার নখুর থাবাত পড়ে।
11 মনে মনে কয় তারা, “আল্লায় ইতা দেখইন না,
তান মুখ তো লুকাইলিছইন, ইতার বায়দি চাইনও না।”
12 ও মাবুদ জলদি আও, তুমার আত খান বাড়াও,
দুখি-কাংগালরে না ফাউরিয়া জান খান বাচাও।
13 নাফরমানে কেনে করে আল্লা পাকরে এলামি?
মনে মনে কেনে কয়, “তাইন হিসাব লইবা নি?”
14 অথচ তুমি তো দুখ-মছিবত দেখরায়,
এরার জিম্মাদারি তুমার আতর কবজায়।
অসহায় জনে তো তুমার আতোউ নিজরে সপে,
তুমার গেছেউ আশ্রয় পায় এতিম-মিছকিনে।
15 নাফরমান বজ্জাতর বল অখন ভাংগিলাও,
তারার হকল বদ কামর হিসাব তুমি লইলাও।
16 চিরদিন চিরকাল মাবুদউ অইলা বাদশা,
তান জমিন থাকি বিধর্মী জাতি সর্বনাশ অইবা।
17 মাবুদ গো, কাংগাল-দুখির আশা তুমি পুরা করো,
তারার মনো সাওস যুগাই দিলর ফরিয়াদ হুনো।
18 এতিমর বায় চাও গো আল্লা, বিচার করো সব জালিমর,
ডর দেখানি বন্দ করিলাও মাটির পয়দা মানুষর॥