1 ꠔꠥꠞ ꠙꠣꠠꠞ ꠃꠙꠞꠦ ꠝꠣꠛꠥꠖꠦ ꠎꠦꠛꠟꠣ ꠝꠥꠍꠣ ꠘꠛꠤꠞ ꠟꠉꠦ ꠛꠣꠔꠌꠤꠔ ꠇꠞꠍꠟꠣ, ꠢꠃ ꠡꠝꠄ ꠢꠣꠞꠥꠘ ꠀꠞ ꠔꠣꠘ ꠜꠣꠁ ꠝꠥꠍꠣꠞ ꠛꠋꠡ-ꠛꠥꠘꠤꠀꠖ ꠀꠍꠟꠣ ꠅꠃ ꠄꠁꠘꠔꠣꠁꠘ:

2 ꠢꠣꠞꠥꠘꠞ ꠙꠥꠀꠂꠘ ꠅꠁꠟꠣ ꠘꠣꠖꠣꠛ, ꠀꠛꠤꠢꠥ, ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞ। ꠄꠞꠣꠞ ꠝꠣꠎꠦ ꠘꠣꠖꠣꠛ ꠀꠍꠟꠣ ꠛꠠ। 3 ꠁꠝꠣꠝꠔꠤ ꠇꠣꠝꠞ ꠟꠣꠉꠤ ꠢꠣꠞꠥꠘꠞ ꠅꠃ ꠌꠣꠁꠞꠅ ꠙꠥꠀꠂꠘꠞꠦ ꠈꠦꠟꠣꠚꠔꠤ ꠖꠤꠀ ꠄꠛꠣꠖꠔꠤ ꠇꠣꠝꠅ ꠛꠅꠀꠁꠟ ꠇꠞꠣ ꠅꠁꠍꠤꠟ। 4 ꠅꠁꠟꠦ ꠍꠤꠘꠣꠁ ꠝꠞꠥꠜꠥꠝꠤꠔ ꠞꠅꠀꠞ ꠇꠣꠟꠅ, ꠘꠣꠖꠣꠛ ꠀꠞ ꠀꠛꠤꠢꠥꠄ ꠝꠣꠛꠥꠖꠞ ꠛꠣꠔꠣꠁꠟ ꠘꠤꠅꠝ ꠜꠣꠋꠉꠤꠀ, ꠖꠥꠍꠞꠣ ꠀꠉꠥꠁꠘꠖꠤ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠡꠝꠄ ꠝꠣꠛꠥꠖꠞ ꠍꠣꠝꠘꠦꠃ ꠔꠣꠞꠣꠞ ꠝꠞꠘ ꠅꠁꠉꠦꠟ। ꠔꠣꠞꠣꠞ ꠇꠥꠘꠥ ꠀꠅꠟꠣꠖ ꠘꠣ ꠕꠣꠇꠣꠄ, ꠔꠣꠞꠣꠞ ꠛꠣꠚ ꠢꠣꠞꠥꠘ ꠘꠛꠤꠞ ꠟꠉꠦ ꠞꠁꠀ ꠀꠟꠤ-ꠀꠎꠞ ꠀꠞ ꠁꠍꠣꠝꠣꠞꠦ ꠁꠝꠣꠝꠔꠤ ꠇꠣꠝ ꠇꠞꠟꠣ।

5 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 6 “ꠔꠥꠝꠤ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞꠦ ꠀꠘꠤꠀ ꠁꠝꠣꠝ ꠢꠣꠞꠥꠘꠞ ꠀꠔꠅ ꠡꠝꠎꠣꠅ, ꠔꠣꠞꠣ ꠁꠝꠣꠝꠔꠤ ꠇꠣꠝꠅ ꠔꠣꠘꠞꠦ ꠡꠣꠁꠎ꠆ꠎ ꠇꠞꠛꠣ। 7 ꠔꠣꠞꠣ ꠁꠝꠣꠝ ꠢꠣꠞꠥꠘꠞ ꠎꠤꠝ꠆ꠝꠣꠄ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦ ꠢꠇꠟ ꠛꠘꠤ ꠁꠍꠞꠣꠁꠟꠞ ꠔꠞꠚ ꠕꠣꠇꠤ ꠀꠝꠣꠞ ꠊꠞꠞ ꠈꠣꠖꠤꠝꠖꠣꠞꠤ ꠇꠞꠛꠣ। 8 ꠔꠣꠞꠣꠃ ꠝꠤꠟꠘ-ꠔꠣꠝ꠆ꠛꠥꠞ ꠝꠣꠟ-ꠍꠣꠝꠣꠘꠣ ꠖꠦꠈꠣ-ꠢꠥꠘꠣ ꠀꠞ ꠀꠟ꠆ꠟꠣꠞ ꠊꠞꠞ ꠈꠦꠎꠝꠔ ꠇꠞꠤꠀ ꠛꠘꠤ ꠁꠍꠞꠣꠁꠟꠞ ꠙꠇ꠆ꠇꠦ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠖꠣꠄ-ꠖꠣꠄꠁꠔ꠆ꠔ ꠀꠖꠣꠄ ꠇꠞꠛꠣ। 9 ꠟꠦꠛꠤ ꠈꠣꠘ꠆ꠖꠣꠘꠞ ꠈꠣꠖꠤꠝ ꠅꠇꠟꠞꠦ ꠔꠥꠝꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞ ꠀꠔꠅ ꠡꠝꠎꠣꠁ ꠖꠦꠅ। ꠛꠘꠤ ꠁꠍꠞꠣꠁꠟꠞ ꠝꠣꠎ ꠕꠣꠇꠤ ꠄꠞꠣꠞꠦ ꠁꠝꠣꠝ ꠢꠣꠞꠥꠘꠞ ꠀꠔꠅ ꠡꠙꠤ ꠖꠦꠅꠀ ꠅꠁꠟ। 10 ꠁꠝꠣꠝꠔꠤ ꠇꠣꠝꠞ ꠟꠣꠉꠤ ꠔꠥꠝꠤ ꠢꠣꠞꠥꠘ ꠀꠞ ꠔꠣꠞ ꠛꠋꠡꠞꠦ ꠛꠣꠍꠤꠀ ꠘꠦꠅ। ꠔꠣꠞꠣ ꠍꠣꠠꠣ ꠖꠥꠍꠞꠣ ꠇꠦꠃ ꠁꠝꠣꠝꠔꠤ ꠇꠞꠣꠔ ꠉꠦꠟꠦ ꠅꠉꠥꠞꠦ ꠎꠣꠘꠦ ꠝꠣꠞꠣ ꠅꠁꠛ।”

11 ꠝꠣꠛꠥꠖꠦ ꠝꠥꠍꠣꠞꠦ ꠄꠅꠈꠣꠘ ꠇꠁꠟꠣ, 12 “ꠢꠥꠘꠅ, ꠛꠘꠤ ꠁꠍꠞꠣꠁꠟꠤ ꠛꠦꠐꠤꠘ꠆ꠔꠞ ꠊꠞꠅ ꠎꠘꠝ ꠟꠅꠀ ꠙꠄꠟꠣ ꠙꠥꠀꠞ ꠛꠖꠟꠣ ꠛꠣꠛꠔ, ꠀꠝꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠙꠍꠘ꠆ꠖ ꠇꠞꠍꠤ। ꠄꠞꠟꠣꠉꠤ ꠟꠦꠛꠤ ꠅꠇꠟ ꠀꠝꠣꠞ। 13 ꠀꠍꠟꠦ ꠢꠇ꠆ꠇꠟ ꠙꠄꠟꠣ ꠙꠥꠀꠂꠘꠃ ꠀꠝꠣꠞ। ꠝꠤꠡꠞꠤ ꠅꠇꠟꠞ ꠢꠇꠟ ꠙꠄꠟꠣ ꠙꠥꠀꠂꠘ꠆ꠔꠞꠦ ꠝꠣꠞꠤꠟꠤꠛꠣꠞ ꠖꠤꠘ, ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇ ꠙꠄꠟꠣ ꠙꠥꠀꠞꠦ ꠀꠝꠣꠞ ꠟꠣꠉꠤ ꠙꠛꠤꠔ꠆ꠞ ꠇꠞꠤꠀ ꠞꠣꠈꠍꠤ, ꠁꠔꠣ ꠝꠣꠘꠡꠞ ꠙꠥꠔ ꠅꠃꠇ ꠛꠣ ꠙꠡꠥꠞ ꠛꠣꠁꠌ꠆ꠌꠣ ꠅꠃꠇ। ꠔꠣꠞꠣ ꠔ ꠀꠝꠣꠞ, ꠀꠝꠤꠃ ꠝꠣꠛꠥꠖ।”

14 ꠍꠤꠘꠣꠁ ꠝꠞꠥꠜꠥꠝꠤꠞ ꠝꠣꠎꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 15 “ꠔꠥꠝꠤ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠟꠦꠛꠤ ꠅꠇꠟꠞꠦ ꠉꠘꠅ। ꠄꠇ ꠝꠣꠡ ꠛꠣ ꠄꠞ ꠛꠦꠡꠤ ꠛꠄꠅꠡꠞ ꠢꠇꠟ ꠛꠦꠐꠣꠁꠘ꠆ꠔꠞꠦ ꠉꠘꠅ।” 16 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠣꠁꠘ ꠟꠦꠛꠤ ꠈꠣꠘ꠆ꠖꠣꠘꠞꠦ ꠉꠘꠤꠟꠣ। 17 ꠉꠘꠣꠞ ꠇꠣꠟꠅ ꠙꠣꠁꠟꠣ, ꠟꠦꠛꠤꠞ ꠙꠥꠀꠂꠘ ꠎꠣꠞꠍꠥꠘ, ꠇꠣꠢꠣꠔ ꠀꠞ ꠝꠣꠞꠣꠞꠤ। 18 ꠎꠣꠞꠍꠥꠘꠞ ꠙꠥꠀꠂꠘ ꠟꠤꠛꠘꠤ ꠀꠞ ꠡꠤꠝꠦꠁ ꠀꠍꠟꠣ ꠖꠥꠁ ꠉꠥꠡ꠆ꠐꠤꠞ ꠝꠥꠞꠛ꠆ꠛꠤ ꠘꠦꠔꠣ। 19 ꠇꠣꠢꠣꠔꠞ ꠙꠥꠀꠂꠘ ꠁꠝꠞꠣꠘ, ꠁꠎꠢꠣꠞ, ꠢꠦꠛꠞꠘ ꠀꠞ ꠃꠎ꠆ꠎꠟ ꠅꠁꠟꠣ ꠌꠣꠁꠞ ꠜꠣꠁ। 20 ꠝꠣꠞꠣꠞꠤꠞ ꠙꠥꠀꠂꠘ ꠝꠢꠟꠤ ꠀꠞ ꠝꠥꠡꠤ ꠅꠁꠟꠣ ꠖꠥꠁ ꠜꠣꠁ। ꠄꠞꠣ ꠅꠁꠟꠣ ꠛꠋꠡ ꠀꠞ ꠙꠞꠤꠛꠣꠞ ꠢꠤꠡꠣꠛꠦ ꠟꠦꠛꠤ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤ।

21 ꠎꠣꠞꠍꠥꠘ ꠀꠍꠟꠣ ꠟꠤꠛꠘꠤꠀ ꠀꠞ ꠡꠤꠝꠦꠁꠀ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ। 22 ꠄꠞꠣꠞ ꠝꠣꠎꠦ ꠄꠇ ꠝꠣꠡ ꠀꠞ ꠄꠇ ꠝꠣꠡꠞ ꠛꠦꠡꠤ ꠛꠄꠅꠡꠞ ꠢꠇꠟ ꠙꠥꠀꠂꠘ꠆ꠔꠞꠦ ꠉꠘꠤꠀ ꠡꠣꠠꠦ ꠡꠣꠔ ꠀꠎꠣꠞ ꠙꠣꠅꠀ ꠉꠦꠟ। 23 ꠙꠌ꠆ꠌꠤꠝ ꠉꠣꠟꠣꠛꠣꠄ ꠀꠟ꠆ꠟꠣꠞ ꠊꠞꠞ ꠈꠞꠦꠖꠤ ꠎꠣꠞꠍꠥꠘꠤ ꠅꠇꠟꠞ ꠔꠣꠝ꠆ꠛꠥ ꠐꠣꠋꠉꠣꠘꠤ ꠅꠁꠔ। 24 ꠎꠣꠞꠍꠥꠘ ꠉꠥꠡ꠆ꠐꠤꠞ ꠙꠞꠗꠣꠘ ꠀꠍꠟꠣ ꠟꠣꠄꠄꠟꠞ ꠙꠥꠀ ꠁꠟꠤꠀꠍꠚ। 25 ꠝꠤꠟꠘ-ꠔꠣꠝ꠆ꠛꠥꠞ ꠛꠦꠙꠣꠞꠦ ꠎꠣꠞꠍꠥꠘꠤ ꠅꠇꠟꠞ ꠃꠙꠞꠦ, ꠎꠦꠔꠣ ꠇꠣꠙꠠꠣꠁꠘ ꠖꠤꠀ ꠀꠟ꠆ꠟꠣꠞ ꠊꠞ ꠛꠣꠘꠣꠘꠤ ꠅꠁꠍꠦ ꠈꠣꠟꠤ ꠅꠔꠣ ꠇꠣꠙꠠ ꠅꠇꠟ, ꠛꠣꠞꠣ ꠛꠣꠎꠥꠞ ꠉꠤꠟꠣꠚ ꠀꠞ ꠍꠣꠘꠤ ꠅꠇꠟ ꠀꠞ ꠅꠃ ꠊꠞꠞ ꠜꠤꠔꠞꠦ ꠢꠣꠝꠣꠁꠛꠣꠞ ꠙꠞ꠆ꠖꠣ ꠖꠦꠈꠣ-ꠢꠥꠘꠣ ꠇꠞꠣꠞ ꠖꠣꠄꠁꠔ꠆ꠔ ꠀꠍꠤꠟ। 26 ꠀꠞ ꠀꠟ꠆ꠟꠣꠞ ꠊꠞ ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅꠛꠣꠄ ꠎꠦ ꠃꠑꠣꠘ ꠀꠍꠦ ꠅꠉꠥꠞ ꠙꠞ꠆ꠖꠣꠁꠘ, ꠀꠞ ꠃꠑꠣꠘꠅ ꠢꠣꠝꠣꠘꠤꠞ ꠟꠣꠉꠤ ꠎꠦ ꠉꠦꠁꠐ ꠀꠍꠦ ꠅꠃ ꠉꠦꠁꠐꠞ ꠙꠞ꠆ꠖꠣ, ꠀꠞ ꠡꠛ ꠞꠡꠤ ꠅꠇꠟꠞꠃ ꠖꠦꠈꠣ-ꠢꠥꠘꠣ ꠇꠞꠣ, ꠀꠞ ꠅꠔꠣ ꠢꠇꠟ ꠇꠣꠝ-ꠇꠣꠎ ꠇꠞꠣ, ꠅꠃ ꠢꠇ꠆ꠇꠟꠔꠣꠃ ꠔꠣꠘꠔꠣꠘꠞ ꠖꠣꠄꠁꠔ꠆ꠔ ꠀꠍꠤꠟ।

27 ꠇꠣꠢꠣꠔ ꠀꠍꠟꠣ ꠁꠝꠞꠣꠘ, ꠁꠎꠢꠣꠞ, ꠢꠦꠛꠞꠘ ꠀꠞ ꠃꠎ꠆ꠎꠟ, ꠅꠃ ꠌꠣꠁꠞ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ। 28 ꠅꠃ ꠉꠥꠡ꠆ꠐꠤꠘ꠆ꠔꠞ ꠝꠣꠎꠦ ꠄꠇ ꠝꠣꠡ ꠛꠣ ꠔꠣꠞ ꠛꠦꠡꠤ ꠛꠄꠅꠡꠞ ꠢꠇꠟ ꠙꠥꠀꠂꠘ꠆ꠔꠞꠦ ꠉꠘꠤꠀ ꠀꠐ ꠀꠎꠣꠞ ꠍꠄ-ꠡ ꠎꠘ ꠙꠣꠅꠀ ꠉꠦꠟ। ꠄꠞꠣꠞ ꠖꠣꠄꠁꠔ꠆ꠔ ꠀꠍꠤꠟ ꠙꠛꠤꠔ꠆ꠞ ꠄꠛꠣꠖꠔ ꠈꠣꠘꠣꠞ ꠖꠦꠈꠣ-ꠢꠥꠘꠣ ꠇꠞꠣ। 29 ꠀꠟ꠆ꠟꠣꠞ ꠊꠞꠞ ꠖꠇ꠆ꠇꠤꠘ ꠉꠣꠟꠣꠛꠣꠄ ꠇꠣꠢꠣꠔꠤ ꠅꠇꠟꠞ ꠔꠣꠝ꠆ꠛꠥ ꠐꠣꠋꠉꠣꠘꠤ ꠅꠁꠔ। 30 ꠇꠣꠢꠣꠔꠤ ꠉꠥꠡ꠆ꠐꠤꠞ ꠙꠞꠗꠣꠘ ꠀꠍꠟꠣ ꠃꠎ꠆ꠎꠟꠞ ꠙꠥꠀ ꠁꠟꠤꠎꠣꠚꠘ। 31 ꠅꠃ ꠇꠣꠢꠣꠔꠤ ꠉꠥꠡ꠆ꠐꠤꠞ ꠖꠣꠄꠁꠔ꠆ꠔ ꠀꠍꠤꠟ ꠡꠣꠢꠣꠖꠔ ꠡꠘ꠆ꠖꠥꠇ, ꠐꠦꠛꠥꠟ, ꠌꠦꠞꠣꠉ ꠖꠣꠘꠤ, ꠇꠥꠞꠛꠣꠘꠤ ꠈꠣꠘꠣ, ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ, ꠙꠛꠤꠔ꠆ꠞ ꠄꠛꠣꠖꠔ ꠈꠣꠘꠣꠞ ꠄꠛꠣꠖꠔꠤꠞ ꠢꠇꠟ ꠎꠤꠘꠤꠡ ꠀꠞ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠞ ꠖꠦꠈꠣ-ꠢꠥꠘꠣ ꠇꠞꠣ, ꠟꠉꠦ ꠛꠣꠖ-ꠛꠣꠇꠤ ꠇꠣꠝ ꠇꠞꠣ। 32 ꠟꠦꠛꠤ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠞꠛ꠆ꠛꠤ ꠅꠇꠟꠞ ꠙꠞꠗꠣꠘ ꠀꠍꠟꠣ ꠁꠝꠣꠝ ꠢꠣꠞꠥꠘꠞ ꠙꠥꠀ ꠀꠟꠤ-ꠀꠎꠞ। ꠄꠞꠟꠉꠦ ꠙꠛꠤꠔ꠆ꠞ ꠄꠛꠣꠖꠔ ꠈꠣꠘꠣꠞ ꠖꠦꠈꠣ-ꠢꠥꠘꠣꠞ ꠖꠣꠄꠁꠔ꠆ꠔ ꠎꠦꠞꠣꠞꠦ ꠖꠦꠅꠀ ꠅꠁꠍꠤꠟ, ꠄꠞꠣꠞꠦ ꠘꠎꠞꠖꠣꠞꠤ ꠇꠞꠣꠞ ꠟꠣꠉꠤ ꠔꠣꠘꠞꠦ ꠛꠅꠀꠁꠟ ꠇꠞꠣ ꠅꠁꠍꠤꠟ।

33 ꠝꠣꠞꠣꠞꠤ ꠀꠍꠟꠣ ꠝꠢꠟꠤ ꠀꠞ ꠝꠥꠡꠤꠞ ꠅꠃ ꠖꠥꠁ ꠉꠥꠡ꠆ꠐꠤꠞ ꠝꠥꠟ ꠝꠥꠞꠛ꠆ꠛꠤ। 34 ꠅꠃ ꠉꠥꠡ꠆ꠐꠤꠘ꠆ꠔꠞ ꠝꠣꠎꠦ ꠄꠇ ꠝꠣꠡ ꠛꠣ ꠔꠣꠞ ꠛꠦꠡꠤ ꠛꠄꠅꠡꠞ ꠢꠇꠟ ꠙꠥꠀꠂꠘ꠆ꠔꠞꠦ ꠉꠘꠤꠀ ꠍꠄ ꠀꠎꠣꠞ ꠖꠥꠁ-ꠡ ꠙꠣꠅꠀ ꠉꠦꠟ। 35 ꠝꠣꠞꠣꠞꠤꠀ ꠉꠥꠡ꠆ꠐꠤꠞ ꠙꠞꠗꠣꠘ ꠀꠍꠟꠣ ꠀꠛꠤꠄꠟꠞ ꠙꠥꠀ ꠍꠥꠞꠤꠄꠟ। ꠀꠟ꠆ꠟꠣꠞ ꠊꠞꠞ ꠃꠔꠞꠦꠖꠤ ꠔꠣꠞꠣꠞ ꠔꠣꠝ꠆ꠛꠥ ꠐꠣꠋꠉꠣꠘꠤ ꠅꠁꠔ। 36 ꠄꠞꠣꠞ ꠖꠣꠄꠁꠔ꠆ꠔ ꠀꠍꠤꠟ ꠀꠟ꠆ꠟꠣꠞ ꠊꠞꠞ ꠚ꠆ꠞꠦꠁꠝ, ꠚ꠆ꠞꠦꠁꠝꠞ ꠛꠣꠔ꠆ꠔꠤ, ꠈꠥꠐꠤ, ꠌꠥꠘ꠆ꠉꠤ ꠀꠞ ꠄꠞ ꠢꠇꠟ ꠌꠤꠎ, 37 ꠃꠑꠣꠘꠞ ꠛꠦꠠꠣꠞ ꠌꠣꠁꠞꠅ ꠉꠣꠟꠣꠞ ꠈꠥꠐꠤ, ꠌꠥꠘ꠆ꠉꠤ, ꠛꠦꠠꠣ ꠐꠣꠘꠣꠘꠤꠞ ꠞꠡꠤ ꠀꠞ ꠙꠦꠞꠦꠉꠞ ꠖꠦꠈꠣ-ꠢꠥꠘꠣ ꠀꠞ ꠄꠞ ꠟꠉꠞ ꠢꠇꠟ ꠇꠣꠝ-ꠇꠣꠎ ꠇꠞꠣ।

38 ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦꠖꠤ ꠝꠣꠘꠤ ꠀꠟ꠆ꠟꠣꠞ ꠊꠞꠞ ꠙꠥꠛꠦꠖꠤ ꠢꠎꠞꠔ ꠝꠥꠍꠣ, ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠞ ꠔꠣꠝ꠆ꠛꠥ ꠅꠇꠟ ꠐꠣꠋꠉꠣꠘꠤ ꠅꠁꠔ। ꠄꠞꠣꠞ ꠖꠣꠄꠁꠔ꠆ꠔ ꠀꠍꠤꠟ ꠛꠘꠤ ꠁꠍꠞꠣꠁꠟꠞ ꠔꠞꠚ ꠕꠣꠇꠤ ꠙꠛꠤꠔ꠆ꠞ ꠄꠛꠣꠖꠔ ꠈꠣꠘꠣꠔ ꠢꠇꠟ ꠄꠛꠣꠖꠔꠤ ꠇꠣꠝ ꠀꠖꠣꠄ ꠇꠞꠣ। ꠄꠞꠣ ꠍꠣꠠꠣ ꠀꠞ ꠇꠦꠃ ꠄꠛꠣꠖꠔ ꠈꠣꠘꠣꠞ ꠇꠣꠘ꠆ꠖꠣꠔ ꠉꠦꠟꠦ ꠔꠣꠞꠦ ꠝꠣꠞꠤꠟꠣꠅꠀ ꠅꠁꠔ।

39 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠀꠞ ꠢꠣꠞꠥꠘꠦ, ꠟꠦꠛꠤ ꠈꠣꠘ꠆ꠖꠣꠘꠞ ꠄꠇ ꠝꠣꠡ ꠛꠣ ꠔꠣꠞ ꠛꠦꠡꠤ ꠛꠄꠅꠡꠞ ꠢꠇꠟ ꠙꠥꠀꠂꠘ꠆ꠔꠞꠦ ꠉꠥꠡ꠆ꠐꠤ ꠝꠣꠚꠤꠇ ꠉꠘꠤꠟꠣ, ꠉꠘꠤꠀ ꠛꠣꠁꠡ ꠀꠎꠣꠞ ꠎꠘ ꠙꠣꠅꠀ ꠉꠦꠟ।

40 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠛꠘꠤ ꠁꠍꠞꠣꠁꠟꠞ ꠢꠇꠟ ꠙꠞꠤꠛꠣꠞꠞ ꠙꠄꠟꠣ ꠙꠥꠀꠂꠘꠞꠦ ꠉꠘꠅ, ꠎꠦꠞꠣꠞ ꠛꠄꠅꠡ ꠄꠇ ꠝꠣꠡ ꠛꠣ ꠄꠞ ꠛꠦꠡꠤ, ꠄꠞꠣꠞꠦ ꠉꠘꠤꠀ ꠄꠞꠣꠞ ꠘꠣꠝ ꠄꠇ ꠈꠣꠔꠣꠔ ꠟꠦꠈꠅ। 41 ꠛꠘꠤ ꠁꠍꠞꠣꠁꠟꠞ ꠢꠇꠟ ꠙꠄꠟꠣ ꠙꠥꠀꠂꠘ꠆ꠔꠞ ꠎꠣꠘꠞ ꠛꠖꠟꠣ ꠟꠦꠛꠤ ꠅꠇꠟꠞꠦ ꠀꠝꠣꠞ ꠇꠁꠀ ꠉꠘꠣ ꠅꠁꠛ। ꠀꠞ ꠔꠣꠞꠣꠞ ꠙꠡꠥꠞ ꠙꠄꠟꠣ ꠛꠣꠁꠌ꠆ꠌꠣꠞ ꠛꠖꠟꠣ ꠟꠦꠛꠤ ꠅꠇꠟꠞ ꠙꠡꠥꠞ ꠙꠄꠟꠣ ꠛꠣꠁꠌ꠆ꠌꠣꠞꠦ ꠀꠝꠣꠞ ꠇꠁꠀ ꠉꠘꠣ ꠅꠁꠛ। ꠀꠝꠤꠃ ꠝꠣꠛꠥꠖ।”

42 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞ ꠢꠇꠟ ꠙꠞꠤꠛꠣꠞꠞ ꠙꠄꠟꠣ ꠙꠥꠀꠂꠘꠞꠦ ꠉꠘꠤꠟꠣ। 43 ꠔꠦꠃ ꠄꠇ ꠝꠣꠡ ꠛꠣ ꠔꠣꠞ ꠛꠦꠡꠤ ꠛꠄꠅꠡꠤ ꠙꠥꠀꠂꠘ꠆ꠔꠞꠦ ꠉꠘꠤꠀ ꠝꠥꠐ ꠛꠣꠁꠡ ꠀꠎꠣꠞ ꠖꠥꠁ-ꠡ ꠔꠦꠀꠔ꠆ꠔꠁꠞ ꠎꠘ ꠙꠣꠅꠀ ꠉꠦꠟ।

44 ꠝꠣꠛꠥꠖꠦ ꠝꠥꠍꠣꠞꠦ ꠀꠞꠅ ꠇꠁꠟꠣ, 45 “ꠛꠘꠤ ꠁꠍꠞꠣꠁꠟꠞ ꠢꠇꠟ ꠙꠄꠟꠣ ꠙꠥꠀꠂꠘ꠆ꠔꠞ ꠛꠖꠟꠣ ꠟꠦꠛꠤ ꠅꠇꠟꠞꠦ, ꠀꠞ ꠔꠣꠞꠣꠞ ꠙꠄꠟꠣ ꠙꠡꠥꠞ ꠛꠣꠁꠌ꠆ꠌꠣꠞ ꠛꠖꠟꠣ ꠟꠦꠛꠤ ꠅꠇꠟꠞ ꠙꠄꠟꠣ ꠙꠡꠥꠞ ꠛꠣꠁꠌ꠆ꠌꠣꠞꠦ ꠀꠝꠣꠞ ꠇꠁꠀ ꠗꠞꠣ ꠅꠁꠛ। ꠟꠦꠛꠤ ꠅꠇꠟ ꠔ ꠀꠝꠣꠞ ꠅꠁꠛꠣ। ꠀꠝꠤꠃ ꠝꠣꠛꠥꠖ। 46 ꠟꠦꠛꠤ ꠈꠣꠘ꠆ꠖꠣꠘꠞ ꠝꠥꠐ ꠙꠞꠤꠝꠣꠘ ꠕꠣꠇꠤ ꠛꠘꠤ ꠁꠍꠞꠣꠁꠟꠞ ꠙꠄꠟꠣ ꠙꠥꠀꠂꠘ꠆ꠔꠞ ꠙꠞꠤꠝꠣꠘ ꠖꠥꠁ-ꠡ ꠔꠦꠀꠔ꠆ꠔꠁꠞ ꠎꠘ ꠛꠦꠡꠤ। 47 ꠅꠃ ꠖꠥꠁ-ꠡ ꠔꠦꠀꠔ꠆ꠔꠁꠞ ꠎꠘꠞꠦ ꠈꠣꠟꠣꠍ ꠇꠞꠣꠞ ꠟꠣꠉꠤ ꠎꠣꠘꠞ ꠛꠖꠟꠣ ꠢꠤꠡꠣꠛꠦ, ꠙꠞꠔꠦꠇ ꠎꠘꠞ ꠟꠣꠉꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠙꠣꠌ ꠔꠟꠣ ꠞꠥꠙꠣ ꠀꠖꠣꠄ ꠇꠞꠤꠅ। 48 ꠀꠖꠣꠄ ꠇꠞꠣ ꠅꠃ ꠞꠥꠙꠣ ꠘꠤꠀ ꠔꠥꠝꠤ ꠁꠝꠣꠝ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠖꠤꠟꠣꠁꠅ।”

49 ꠔꠦꠃ ꠟꠦꠛꠤ ꠈꠣꠘ꠆ꠖꠣꠘꠞ ꠛꠖꠟꠣ ꠛꠘꠤ ꠁꠍꠞꠣꠁꠟꠞꠦ ꠈꠣꠟꠣꠍ ꠇꠞꠤꠀ ꠘꠤꠛꠣꠞ ꠛꠣꠖꠦ, ꠔꠣꠞꠣꠞ ꠎꠔ ꠎꠘ ꠛꠣꠇꠤ ꠞꠁꠟꠣ, ꠄꠞꠣꠞ ꠎꠣꠘꠞ ꠛꠖꠟꠣ ꠢꠤꠡꠣꠛꠦ ꠝꠥꠍꠣ ꠘꠛꠤꠄ ꠞꠥꠙꠣ ꠀꠖꠣꠄ ꠇꠞꠟꠣ। 50 ꠔꠣꠁꠘ ꠛꠘꠤ ꠁꠍꠞꠣꠁꠟꠞ ꠙꠄꠟꠣ ꠙꠥꠀꠂꠘ꠆ꠔꠞ ꠉꠦꠍ ꠕꠣꠇꠤ ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠄꠇ ꠀꠎꠣꠞ ꠔꠤꠘ-ꠡ ꠙꠄꠡꠐ꠆ꠐꠤ ꠔꠟꠣ ꠞꠥꠙꠣ ꠀꠖꠣꠄ ꠇꠞꠟꠣ। 51 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣꠄ ꠅꠃ ꠞꠥꠙꠣ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠞꠦ ꠖꠤꠟꠣꠁꠟꠣ।