1 ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘ ꠘꠛꠤꠞꠦ ꠇꠁꠟꠣ, 2 “ꠔꠥꠝꠞꠣ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠎꠞ ꠇꠣꠢꠣꠔꠤ ꠅꠇꠟ ꠀꠟꠣꠖꠣ ꠇꠞꠤ ꠉꠘꠅ, ꠔꠣꠞꠣꠞ ꠢꠇꠟ ꠙꠞꠤꠛꠣꠞ ꠀꠞ ꠉꠥꠡ꠆ꠐꠤ ꠝꠣꠚꠤꠇ ꠉꠘꠅ। 3 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠞ ꠎꠦꠔꠣ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠣꠔ ꠀꠁꠛꠣ, ꠈꠣꠟꠤ ꠔꠣꠞꠣꠞꠦ ꠉꠘꠤꠅ।

4 “ꠇꠣꠢꠣꠔꠤ ꠅꠇꠟꠞ ꠇꠣꠝ ꠅꠁꠛ, ꠝꠤꠟꠘ-ꠔꠣꠝ꠆ꠛꠥꠞ ꠈꠣꠍ ꠙꠛꠤꠔ꠆ꠞ ꠌꠤꠎ ꠅꠇꠟꠞ ꠖꠦꠈꠣ-ꠢꠥꠘꠣ ꠇꠞꠣ। 5 ꠛꠘꠤ ꠁꠍꠞꠣꠁꠟ ꠍꠚꠞꠅ ꠛꠣꠞꠘꠤꠞ ꠡꠝꠄ, ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠀꠝꠣꠞ ꠊꠞꠞ ꠜꠤꠔꠞꠦ ꠢꠣꠝꠣꠁꠀ, ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣ ꠈꠥꠟꠤꠀ ꠢꠣꠞꠤ, ꠅꠈꠣꠘꠖꠤ ꠡꠣꠢꠣꠖꠔ ꠡꠘ꠆ꠖꠥꠇꠞꠦ ꠉꠥꠞꠤꠀ ꠖꠤꠛꠣ। 6 ꠄꠞ ꠃꠙꠞꠦ ꠖꠞꠤꠀꠞ ꠚꠥʼ ꠝꠣꠍꠞ ꠌꠣꠝꠠꠣꠞ ꠉꠤꠟꠣꠚꠖꠤ ꠉꠥꠞꠤꠛꠣ, ꠛꠣꠖꠦ ꠙꠥꠞꠣꠙꠥꠞ ꠟꠤꠟꠥꠀ ꠞꠋꠉꠞ ꠄꠇꠈꠣꠘ ꠇꠣꠙꠠꠖꠤ ꠉꠥꠞꠤꠀ ꠖꠤꠀ, ꠡꠘ꠆ꠖꠥꠇ ꠛꠁꠀ ꠘꠤꠛꠣꠞ ꠛꠦꠘ꠆ꠖꠣ ꠉꠥꠁꠘ ꠎꠣꠉꠣ ꠝꠔ ꠢꠣꠞꠣꠁꠛꠣ। 7 ꠙꠛꠤꠔ꠆ꠞ ꠞꠥꠐꠤ ꠞꠣꠈꠣꠞ ꠐꠦꠛꠥꠟꠞ ꠃꠙꠞꠦ ꠔꠣꠞꠣ ꠟꠤꠟꠥꠀ ꠞꠋꠉꠞ ꠄꠇꠈꠣꠘ ꠇꠣꠙꠠ ꠛꠤꠍꠣꠁꠀ, ꠅꠈꠣꠘꠞ ꠃꠙꠞꠦ ꠢꠥꠞꠥ-ꠛꠠ ꠢꠇꠟ ꠕꠣꠟ-ꠛꠣꠡꠘ, ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠓꠣꠟꠤꠛꠣꠞ ꠎꠉ-ꠝꠉ ꠕꠁꠛꠣ। ꠙꠛꠤꠔ꠆ꠞ ꠎꠦꠔꠣ ꠞꠥꠐꠤ ꠢꠣꠝꠦꠡꠣ ꠐꠦꠛꠥꠟꠞ ꠃꠙꠞꠦ ꠕꠅꠀ ꠕꠣꠇꠦ, ꠁꠔꠣ ꠐꠦꠛꠥꠟꠞ ꠃꠙꠞꠦꠃ ꠞꠁꠛ। 8 ꠅꠔꠣꠞ ꠃꠙꠞꠦ ꠟꠣꠟ ꠄꠇꠈꠣꠘ ꠇꠣꠙꠠ ꠛꠤꠍꠣꠁꠀ, ꠚꠥʼꠞ ꠌꠣꠝꠠꠣꠖꠤ ꠅꠈꠣꠘꠞꠦ ꠉꠥꠞꠤꠛꠣ, ꠀꠞ ꠐꠦꠛꠥꠟ ꠛꠁꠀ ꠘꠤꠛꠣꠞ ꠛꠦꠘ꠆ꠖꠣ ꠉꠥꠁꠘ ꠎꠣꠉꠣ ꠝꠔ ꠢꠣꠞꠣꠁ ꠖꠤꠛꠣ। 9 ꠛꠣꠖꠦ ꠟꠤꠟꠥꠀ ꠄꠇꠈꠣꠘ ꠇꠣꠙꠠꠖꠤ ꠀꠡ꠆ꠔꠣ ꠌꠦꠞꠣꠉ ꠖꠣꠘꠤ, ꠄꠞ ꠌꠦꠞꠣꠉ ꠅꠇꠟ, ꠌꠦꠞꠣꠉꠞ ꠚꠤꠔꠣ ꠍꠣꠚ ꠇꠞꠣꠞ ꠌꠤꠝꠐꠣ, ꠎꠣꠟꠣꠁꠟ ꠚꠤꠔꠣꠞ ꠍꠣꠟꠤ ꠕꠅꠀꠞ ꠛꠣꠐꠤ ꠀꠞ ꠔꠦꠟꠞ ꠚꠤꠚꠣꠞꠦ ꠉꠥꠞꠤꠀ ꠖꠤꠛꠣ। 10 ꠢꠇꠟ ꠝꠣꠟ-ꠍꠣꠝꠣꠘꠣ ꠡꠝꠦꠔ ꠌꠦꠞꠣꠉ ꠖꠣꠘꠤꠞꠦ ꠚꠥʼꠞ ꠌꠣꠝꠠꠣꠖꠤ ꠛꠦꠞꠣꠁꠀ, ꠛꠁꠀ ꠘꠤꠛꠣꠞ ꠈꠣꠐꠤꠀꠞ ꠃꠙꠞꠦ ꠕꠁꠛꠣ। 11 ꠀꠞ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠡꠥꠘꠣꠞ ꠐꠦꠛꠥꠟꠞ ꠃꠙꠞꠦ ꠟꠤꠟꠥꠀ ꠄꠇꠈꠣꠘ ꠇꠣꠙꠠ ꠛꠤꠍꠣꠁꠀ, ꠚꠥʼꠞ ꠌꠣꠝꠠꠣꠖꠤ ꠉꠥꠞꠤꠀ ꠖꠤꠛꠣ, ꠛꠣꠖꠦ ꠅꠃ ꠐꠦꠛꠥꠟ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ ꠉꠥꠁꠘ ꠎꠣꠉꠣ ꠝꠔ ꠢꠣꠞꠣꠁꠛꠣ। 12 ꠄꠛꠣꠖꠔ ꠈꠣꠘꠣꠞ ꠈꠦꠎꠝꠔꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠔꠣꠞꠣ ꠟꠤꠟꠥꠀ ꠇꠣꠙꠠꠖꠤ ꠙꠦꠌꠣꠁꠀ, ꠚꠥʼꠞ ꠌꠣꠝꠠꠣꠖꠤ ꠉꠥꠞꠤꠀ ꠢꠣꠞꠤ, ꠅꠔꠣ ꠛꠁꠀ ꠘꠤꠛꠣꠞ ꠈꠣꠐꠤꠀꠞ ꠃꠙꠞꠦ ꠕꠁꠛꠣ।

13 “ꠇꠥꠞꠛꠣꠘꠤ ꠈꠣꠘꠣꠞ ꠜꠤꠔꠞꠞ ꠢꠇꠟ ꠍꠣꠟꠤ ꠚꠣꠟꠣꠁꠀ, ꠛꠣꠁꠋꠉꠘꠤ ꠞꠋꠉꠞ ꠄꠇꠈꠣꠘ ꠉꠤꠟꠣꠚꠖꠤ ꠉꠥꠞꠤꠀ ꠖꠤꠛꠣ। 14 ꠛꠣꠖꠦ ꠇꠥꠞꠛꠣꠘꠤ ꠈꠣꠘꠣꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠅꠇꠟ, ꠅꠞ꠆ꠕꠣꠔ ꠀꠋꠞꠣ ꠕꠅꠀꠞ ꠙꠣꠔꠤꠟ, ꠉꠥꠡ꠆ꠔ ꠔꠥꠟꠣꠞ ꠛꠠ ꠇꠣꠐꠣ-ꠍꠤꠚ, ꠍꠣꠟꠤ ꠔꠥꠟꠣꠞ ꠛꠠ ꠌꠣꠝꠌ, ꠟꠃ ꠕꠅꠀꠞ ꠛꠣꠐꠤ, ꠁꠔꠣ ꠢꠇꠟꠔꠣ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠕꠁꠛꠣ। ꠕꠁꠀ ꠚꠥʼꠞ ꠌꠣꠝꠠꠣꠖꠤ ꠉꠥꠞꠤꠀ ꠖꠤꠀ, ꠄꠞ ꠛꠦꠘ꠆ꠖꠣ ꠉꠥꠁꠘ ꠑꠤꠇ ꠎꠣꠉꠣꠔ ꠢꠣꠞꠣꠁꠛꠣ। 15 ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠎꠦꠛꠟꠣ ꠅꠃ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡ ꠅꠇꠟ ꠀꠞ ꠄꠛꠣꠖꠔ ꠈꠣꠘꠣꠞ ꠝꠣꠟ-ꠍꠣꠝꠣꠘꠣ ꠢꠇꠟꠔꠣ ꠉꠥꠞꠤꠟꠤꠛꠣ, ꠔꠣꠞꠣ ꠔꠣꠝ꠆ꠛꠥ ꠔꠥꠟꠤꠀ ꠍꠚꠞꠅ ꠛꠣꠞꠘꠤꠞ ꠟꠣꠉꠤ ꠎꠦꠛꠟꠣ ꠔꠤꠀꠞ ꠅꠁꠎꠤꠛꠣ, ꠅꠃ ꠡꠝꠄ ꠅꠔꠣ ꠛꠁꠀ ꠘꠤꠛꠣꠞ ꠟꠣꠉꠤ ꠇꠣꠢꠣꠔꠤ ꠅꠇꠟ ꠀꠁꠛꠣ। ꠅꠁꠟꠦ ꠔꠣꠞꠣ ꠇꠥꠘꠥ ꠙꠣꠇ-ꠙꠛꠤꠔ꠆ꠞ ꠌꠤꠎꠞꠦ ꠀꠔꠖꠤ ꠍꠁꠔꠣ ꠙꠣꠞꠔꠣ ꠘꠣꠄ, ꠍꠁꠟꠦꠃ ꠝꠞꠛꠣ। ꠝꠤꠟꠘ-ꠔꠣꠝ꠆ꠛꠥꠞ ꠅꠃ ꠢꠇ꠆ꠇꠟ ꠎꠤꠘꠤꠡ ꠔꠣꠞꠣ ꠛꠁꠀ ꠘꠤꠛꠣ।

16 “ꠀꠞ ꠁꠝꠣꠝ ꠢꠣꠞꠥꠘꠞ ꠙꠥꠀ ꠀꠟꠤ-ꠀꠎꠞꠞ ꠃꠙꠞꠦ ꠌꠦꠞꠣꠉ ꠖꠣꠘꠤꠞ ꠔꠦꠟ, ꠎꠣꠟꠣꠘꠤꠞ ꠟꠣꠉꠤ ꠀꠉꠞ-ꠈꠥꠡꠛꠄ, ꠙꠞ꠆ꠔꠤꠖꠤꠘꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠈꠦꠟꠣꠚꠔꠤ ꠡꠝꠎꠤꠛꠣꠞ ꠔꠦꠟꠞ ꠖꠣꠄꠁꠔ꠆ꠔ ꠞꠁꠛ। ꠀꠟ꠆ꠟꠣꠞ ꠊꠞ, ꠊꠞꠞ ꠢꠇꠟ ꠝꠣꠟ-ꠍꠣꠝꠣꠘꠣ, ꠝꠣꠘꠤ ꠄꠛꠣꠖꠔ ꠈꠣꠘꠣ ꠀꠞ ꠔꠣꠞ ꠢꠇꠟ ꠝꠣꠟ-ꠍꠣꠝꠣꠘꠣꠞ ꠔꠖꠣꠞꠇꠤ ꠞꠁꠛ ꠀꠟꠤ-ꠀꠎꠞꠞ ꠃꠙꠞꠦ।”

17 ꠄꠞꠛꠣꠖꠦ ꠝꠣꠛꠥꠖꠦ ꠢꠎꠞꠔ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, 18 “ꠔꠥꠝꠞꠣ ꠈꠤꠀꠟ ꠞꠣꠈꠤꠅ, ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠎꠦ ꠇꠣꠢꠣꠔꠤ ꠛꠋꠡ ꠕꠣꠇꠤ ꠇꠦꠃ ꠇꠦꠃ ꠎꠣꠔꠦ ꠢꠞ-ꠢꠣꠝꠦꠡꠣ ꠕꠣꠇꠂꠘ। 19 ꠔꠣꠞꠣ ꠎꠣꠘꠥ ꠈꠣꠍ ꠙꠛꠤꠔ꠆ꠞ ꠌꠤꠎ ꠅꠇꠟꠞ ꠇꠣꠍꠣꠔ ꠉꠤꠀ ꠘꠣ ꠝꠞꠦ ꠛꠞꠋ ꠛꠣꠌꠤꠀ ꠞꠄ, ꠅꠔꠣꠞ ꠟꠣꠉꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠀꠝꠣꠞ ꠊꠞꠞ ꠜꠤꠔꠞꠦ ꠉꠤꠀ ꠎꠣꠞꠎꠤꠞ ꠇꠣꠝ-ꠇꠣꠎ ꠛꠥꠎꠣꠁ ꠖꠤꠛꠣ। ꠀꠞ ꠇꠦ ꠇꠤꠔꠣ ꠛꠁꠀ ꠘꠤꠔꠣ, ꠅꠔꠣꠅ ꠑꠤꠇ ꠇꠞꠤ ꠖꠤꠛꠣ। 20 ꠅꠁꠟꠦ ꠢꠦꠞꠦꠝ ꠡꠞꠤꠚꠞ ꠜꠤꠔꠞꠞ ꠅꠃ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡ ꠄꠇ ꠙꠟꠇꠞ ꠟꠣꠉꠤꠅ ꠖꠦꠈꠣꠞ ꠘꠤꠅꠔꠦ ꠇꠣꠢꠣꠔꠤ ꠅꠇꠟ ꠜꠤꠔꠞꠦ ꠇꠥꠘꠥ ꠟꠣꠈꠣꠘꠃ ꠢꠣꠝꠣꠁꠔꠣ ꠙꠣꠞꠔꠣ ꠘꠣꠄ, ꠅꠃ ꠘꠤꠅꠔꠦ ꠢꠣꠝꠣꠁꠟꠦꠃ ꠝꠞꠤ ꠎꠣꠁꠛꠣ।”

21 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 22 “ꠔꠥꠝꠤ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠎꠣꠞꠍꠥꠘꠤ ꠅꠇꠟꠞꠦ ꠉꠘꠅ। 23 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠞ ꠎꠦꠔꠣ ꠎꠣꠞꠍꠥꠘꠤ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ ꠇꠞꠔꠣ ꠙꠣꠞꠛꠣ, ꠈꠣꠟꠤ ꠔꠣꠞꠣꠞꠦ ꠉꠘꠤꠅ।

24 “ꠝꠤꠟꠘ-ꠔꠣꠝ꠆ꠛꠥꠞ ꠈꠦꠎꠝꠔ ꠇꠞꠣ ꠀꠞ ꠜꠣꠞ ꠛꠅꠀꠞ ꠡꠝꠄ ꠎꠣꠞꠍꠥꠘꠤ ꠅꠇꠟꠞ ꠇꠣꠝ ꠅꠁꠟ, 25 ꠀꠝꠣꠞ ꠊꠞꠞ ꠢꠇꠟ ꠙꠞ꠆ꠖꠣꠁꠘ, ꠝꠤꠟꠘ-ꠔꠣꠝ꠆ꠛꠥ ꠀꠞ ꠄꠞ ꠉꠤꠟꠣꠚ, ꠔꠣꠞ ꠃꠙꠞꠞ ꠚꠥʼꠞ ꠌꠣꠝꠠꠣꠞ ꠍꠣꠘꠤ, ꠀꠞ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠙꠞ꠆ꠖꠣ ꠛꠁꠀ ꠘꠦꠅꠀ। 26 ꠄꠞꠟꠉꠦ ꠀꠟ꠆ꠟꠣꠞ ꠊꠞ ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠃꠑꠣꠘꠞ ꠌꠣꠁꠞꠅ ꠉꠣꠟꠣꠞ ꠙꠞ꠆ꠖꠣ ꠀꠞ ꠄꠞ ꠖꠠꠤ ꠅꠇꠟ, ꠃꠑꠣꠘꠅ ꠢꠣꠝꠣꠘꠤꠞ ꠉꠦꠁꠐꠞ ꠙꠞ꠆ꠖꠣ, ꠅꠔꠣꠞ ꠟꠉꠞ ꠖꠞꠇꠣꠞꠤ ꠢꠇꠟ ꠝꠣꠟ ꠔꠣꠞꠣ ꠛꠁꠀ ꠘꠤꠛꠣ, ꠀꠞ ꠅꠃ ꠛꠦꠙꠣꠞꠦ ꠎꠔ ꠇꠣꠝ-ꠇꠣꠎ ꠀꠍꠦ, ꠁꠔꠣ ꠔꠣꠞꠣ ꠇꠞꠛꠣ। 27 ꠜꠣꠞ ꠛꠁꠛꠣꠞ ꠇꠣꠝ ꠅꠃꠇ ꠛꠣ ꠅꠁꠘ꠆ꠘ ꠇꠥꠘꠥ ꠇꠣꠝ ꠅꠃꠇ, ꠢꠇꠟꠔꠣ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞ ꠢꠥꠇꠥꠝ ꠝꠣꠚꠤꠇ ꠎꠣꠞꠍꠥꠘꠤ ꠅꠇꠟꠦ ꠇꠞꠛꠣ। ꠔꠣꠞꠣ ꠇꠤꠔꠣ ꠇꠤꠔꠣ ꠛꠁꠀ ꠘꠤꠔ, ꠁꠔꠣ ꠔꠥꠝꠞꠣꠃ ꠔꠣꠞꠣꠞꠦ ꠇꠁꠀ ꠖꠤꠛꠣꠄ। 28 ꠅꠔꠣꠃ ꠅꠁꠟ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝꠅ ꠎꠣꠞꠍꠥꠘꠤ ꠅꠇꠟꠞ ꠖꠣꠄ-ꠖꠣꠄꠁꠔ꠆ꠔ। ꠔꠣꠞꠣꠞ ꠇꠣꠝ-ꠇꠣꠎꠞ ꠔꠖꠣꠞꠇꠤ ꠇꠞꠛꠣ ꠁꠝꠣꠝ ꠢꠣꠞꠥꠘꠞ ꠙꠥꠀ ꠁꠍꠣꠝꠣꠞꠦ।

29 “ꠔꠥꠝꠞꠣ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠝꠣꠞꠣꠞꠤꠀ ꠅꠇꠟꠞ ꠙꠞꠤꠝꠣꠘ ꠉꠘꠅ। 30 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠞ ꠎꠦꠔꠣ ꠝꠣꠞꠣꠞꠤꠀ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ ꠇꠞꠔꠣ ꠙꠣꠞꠛꠣ, ꠔꠥꠝꠞꠣ ꠈꠣꠟꠤ ꠔꠣꠞꠣꠞꠦ ꠉꠘꠤꠅ। 31 ꠝꠤꠟꠘ-ꠔꠣꠝ꠆ꠛꠥꠞ ꠝꠣꠎꠦ ꠝꠣꠞꠣꠞꠤꠀ ꠅꠇꠟꠞ ꠖꠣꠄꠁꠔ꠆ꠔ ꠅꠁꠟ, ꠀꠟ꠆ꠟꠣꠞ ꠊꠞꠞ ꠢꠇꠟ ꠚ꠆ꠞꠦꠁꠝ, ꠚ꠆ꠞꠦꠁꠝꠞ ꠛꠣꠔ꠆ꠔꠤ, ꠈꠥꠐꠤ ꠀꠞ ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ ꠛꠁꠀ ꠘꠦꠅꠀ। 32 ꠄꠞꠟꠉꠦ ꠌꠣꠁꠞꠅ ꠉꠣꠟꠣꠞ ꠃꠑꠣꠘꠞ ꠢꠇꠟ ꠈꠥꠐꠤ ꠀꠞ ꠌꠥꠘ꠆ꠉꠤ, ꠃꠑꠣꠘꠞ ꠙꠞ꠆ꠖꠣ ꠐꠣꠘꠣꠘꠤꠞ ꠙꠦꠞꠦꠉ ꠀꠞ ꠖꠠꠤ ꠀꠞ ꠅꠔꠣꠞ ꠟꠉꠞ ꠝꠣꠟ-ꠍꠣꠝꠣꠘꠣ ꠎꠦꠔꠣ ꠖꠞꠇꠣꠞꠤ ꠁꠔꠣ ꠢꠇꠟꠔꠣ ꠔꠣꠞꠣ ꠛꠁꠀ ꠘꠤꠛꠣ। ꠔꠣꠞꠣ ꠇꠦ ꠇꠤꠔꠣ ꠛꠁꠀ ꠘꠤꠔ, ꠁꠔꠣ ꠔꠥꠝꠞꠣ ꠇꠁꠀ ꠖꠤꠅ। 33 ꠅꠔꠣꠃ ꠅꠁꠟ ꠝꠤꠟꠘ-ꠔꠣꠝ꠆ꠛꠥꠞ ꠝꠣꠎꠦ ꠝꠣꠞꠣꠞꠤꠀ ꠉꠥꠡ꠆ꠐꠤꠞ ꠖꠣꠄ-ꠖꠣꠄꠁꠔ꠆ꠔ। ꠔꠣꠞꠣꠞ ꠇꠣꠝ-ꠇꠣꠎꠞ ꠔꠖꠣꠞꠇꠤ ꠇꠞꠛꠣ ꠁꠝꠣꠝ ꠢꠣꠞꠥꠘꠞ ꠙꠥꠀ ꠁꠍꠣꠝꠣꠞꠦ।”

34 ꠔꠦꠃ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠢꠎꠞꠔ ꠝꠥꠍꠣ, ꠢꠣꠞꠥꠘ ꠀꠞ ꠛꠘꠤ ꠁꠍꠞꠣꠁꠟꠞ ꠡꠞ꠆ꠖꠣꠞ ꠅꠇꠟꠦ ꠇꠣꠢꠣꠔꠤ ꠅꠇꠟꠞꠦ ꠉꠘꠤꠟꠣ। 35 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠤ ꠎꠦꠔꠣ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠣꠞ ꠇꠕꠣ, ꠈꠣꠟꠤ ꠔꠣꠞꠣꠞꠦ ꠉꠘꠤꠟꠣ। 36 ꠉꠘꠤꠀ ꠔꠣꠞꠣꠞ ꠉꠥꠡ꠆ꠐꠤ ꠝꠣꠚꠤꠇ ꠖꠥꠁ ꠀꠎꠣꠞ ꠡꠣꠔ-ꠡ ꠙꠁꠘ꠆ꠌꠣꠡ ꠎꠘ ꠙꠣꠅꠀ ꠉꠦꠟ। 37 ꠄꠞꠣꠃ ꠀꠍꠟꠣ ꠇꠣꠢꠣꠔꠤ ꠉꠥꠡ꠆ꠐꠤꠞ ꠝꠥꠐ ꠝꠣꠘꠥꠡ, ꠎꠦꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠔꠣ। ꠝꠥꠍꠣ ꠘꠛꠤꠞ ꠝꠣꠞꠚꠔꠦ ꠝꠣꠛꠥꠖꠞ ꠛꠣꠔꠣꠁꠟ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠀꠞ ꠢꠣꠞꠥꠘꠦ ꠔꠣꠞꠣꠞꠦ ꠉꠘꠤꠟꠣ।

38 ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠎꠣꠞꠍꠥꠘꠤ ꠅꠇꠟꠞꠦ ꠉꠘꠣ ꠅꠁꠍꠤꠟ। 39 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠞ ꠎꠦꠔꠣ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠣꠞ ꠇꠕꠣ, 40 ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠔꠣꠞꠣꠞꠦ ꠉꠘꠤꠀ ꠢꠣꠞꠤ ꠖꠥꠁ ꠀꠎꠣꠞ ꠍꠄ-ꠡ ꠔꠤꠡ ꠎꠘ ꠙꠣꠅꠀ ꠉꠦꠟ। 41 ꠄꠞꠣꠃ ꠀꠍꠟꠣ ꠎꠣꠞꠍꠥꠘꠤ ꠉꠥꠡ꠆ꠐꠤꠞ ꠝꠥꠐ ꠝꠣꠘꠥꠡ, ꠎꠦꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠔꠣ। ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠀꠞ ꠢꠣꠞꠥꠘꠦ ꠔꠣꠞꠣꠞꠦ ꠉꠘꠤꠟꠣ।

42 ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠝꠣꠞꠣꠞꠤꠀ ꠅꠇꠟꠞꠦ ꠉꠘꠣ ꠅꠁꠍꠤꠟ। 43 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠞ ꠎꠦꠔꠣ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠣꠞ ꠇꠕꠣ, 44 ꠉꠥꠡ꠆ꠐꠤ ꠝꠣꠚꠤꠇ ꠔꠣꠞꠣꠞꠦ ꠉꠘꠤꠀ ꠔꠤꠘ ꠀꠎꠣꠞ ꠖꠥꠁ-ꠡ ꠎꠘ ꠙꠣꠅꠀ ꠉꠦꠟ। 45 ꠄꠞꠣꠃ ꠀꠍꠟꠣ ꠝꠣꠞꠣꠞꠤꠀ ꠉꠥꠡ꠆ꠐꠤꠞ ꠝꠥꠐ ꠝꠣꠘꠥꠡ, ꠎꠦꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠔꠣ। ꠢꠎꠞꠔ ꠝꠥꠍꠣꠞ ꠝꠣꠞꠚꠔꠦ ꠙꠣꠅꠀ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠀꠞ ꠢꠣꠞꠥꠘꠦ ꠔꠣꠞꠣꠞꠦ ꠉꠘꠤꠟꠣ।

46 ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠢꠎꠞꠔ ꠝꠥꠍꠣ, ꠢꠣꠞꠥꠘ ꠀꠞ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠦ ꠀꠡ꠆ꠔꠣ ꠟꠦꠛꠤ ꠈꠣꠘ꠆ꠖꠣꠘꠞꠦ ꠉꠘꠤꠟꠣ। 47 ꠔꠤꠡ ꠕꠣꠇꠤ ꠙꠁꠘ꠆ꠌꠣꠡ ꠛꠍꠞ ꠛꠄꠅꠡꠤ ꠎꠦꠔꠣ ꠛꠦꠐꠣꠁꠘ꠆ꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠈꠦꠎꠝꠔ ꠀꠞ ꠝꠣꠟ-ꠍꠣꠝꠣꠘꠣ ꠛꠁꠀ ꠘꠤꠛꠣꠞ ꠇꠕꠣ, 48 ꠉꠥꠡ꠆ꠐꠤ ꠝꠣꠚꠤꠇ ꠔꠣꠞꠣꠞꠦ ꠉꠘꠤꠀ ꠀꠐ ꠀꠎꠣꠞ ꠙꠣꠌ-ꠡ ꠀꠡꠤ ꠎꠘ ꠙꠣꠅꠀ ꠉꠦꠟ। 49 ꠢꠎꠞꠔ ꠝꠥꠍꠣꠞ ꠝꠣꠞꠚꠔꠦ ꠝꠣꠛꠥꠖꠞ ꠛꠣꠔꠣꠁꠟ ꠢꠥꠇꠥꠝ ꠝꠣꠚꠤꠇ ꠄꠞꠣ ꠙꠞꠔꠦꠇ ꠎꠘꠞ ꠇꠣꠝ-ꠇꠣꠎ ꠀꠞ ꠇꠦ ꠇꠤꠔꠣ ꠛꠁꠀ ꠘꠤꠔꠣ, ꠢꠇꠟꠔꠣ ꠛꠥꠎꠣꠁ ꠖꠦꠅꠀ ꠅꠁꠍꠤꠟ।

ꠝꠣꠛꠥꠖꠞ ꠖꠦꠅꠀ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠘꠛꠤꠄ ꠟꠦꠛꠤ ꠈꠣꠘ꠆ꠖꠣꠘꠞꠦ ꠉꠘꠤꠟꠣ।