1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠅꠃ ꠢꠥꠇꠥꠝ ꠖꠦꠅ, ꠔꠣꠞꠣ ꠎꠣꠘꠥ ꠇꠦꠝ꠆ꠙ ꠕꠣꠇꠤ ꠢꠇꠟ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠞꠦ ꠛꠣꠞ ꠇꠞꠤ ꠖꠦꠄ, ꠀꠞ ꠢꠇꠟ ꠘꠝꠥꠘꠣꠞ ꠗꠣꠔꠥ ꠛꠦꠝꠣꠞꠤ, ꠝꠞꠣ ꠟꠣꠡ ꠍꠁꠀ ꠎꠦꠞꠣ ꠘꠣꠙꠣꠇ ꠅꠁꠍꠦ ꠔꠣꠞꠣꠞꠦꠅ ꠇꠦꠝ꠆ꠙ ꠕꠣꠇꠤ ꠛꠣꠞ ꠇꠞꠤ ꠖꠦꠃꠇ। 3 ꠛꠦꠐꠣ ꠛꠣ ꠛꠦꠐꠤ ꠅꠃꠇ, ꠅꠉꠥꠞꠦ ꠇꠦꠝ꠆ꠙ ꠕꠣꠇꠤ ꠛꠣꠞ ꠇꠞꠤ ꠖꠤꠛꠣꠄ। ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙ ꠎꠣꠔꠦ ꠄꠞꠣ ꠘꠣꠙꠣꠇ ꠘꠣ ꠛꠣꠘꠣꠄ, ꠅꠃ ꠘꠤꠅꠔꠦ ꠅꠔꠣꠞꠦ ꠛꠣꠞ ꠇꠞꠤ ꠖꠤꠛꠣꠄ, ꠎꠣꠘ ꠔ, ꠡ꠆ꠛꠄꠅꠋ ꠀꠝꠤ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠛꠡꠔ ꠇꠞꠤ।”

4 ꠔꠦꠃ ꠛꠘꠤ ꠁꠍꠞꠣꠁꠟꠦ ꠅꠟꠣ ꠇꠞꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠔꠣꠞꠣ ꠑꠤꠇ ꠅꠃꠟꠣꠃ ꠇꠞꠟꠣ। ꠔꠣꠞꠣ ꠘꠣꠙꠣꠇ ꠢꠇꠟ ꠝꠣꠘꠡꠞꠦ ꠇꠦꠝ꠆ꠙ ꠕꠣꠇꠤ ꠛꠣꠞ ꠇꠞꠤ ꠖꠤꠟꠣ।

5 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 6 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠣꠛꠥꠖꠞ ꠘꠣꠚꠞꠝꠣꠘꠤ ꠇꠞꠤꠀ ꠖꠥꠍꠞꠣ ꠝꠣꠘꠡꠞ ꠈꠦꠔꠤ ꠇꠞꠦ, ꠔꠦ ꠢꠦ ꠛꠦꠐꠣ ꠛꠣ ꠛꠦꠐꠤ ꠅꠁꠟꠦꠅ ꠘꠤꠌ꠆ꠌꠄ ꠖꠥꠡꠤ। 7 ꠢꠦ ꠔꠣꠞ ꠉꠥꠘꠣꠞ ꠡ꠆ꠛꠤꠇꠣꠞꠥꠇ꠆ꠔꠤ ꠖꠤꠔꠦ ꠅꠁꠛ। ꠀꠞ ꠢꠦ ꠎꠦ ꠝꠣꠘꠡꠞ ꠈꠦꠔꠤ ꠇꠞꠍꠦ, ꠔꠣꠞꠦ ꠡꠥꠟ꠆ꠟꠀꠘꠣ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ। ꠎꠦ ꠎꠤꠘꠤꠡꠞ ꠈꠦꠔꠤ ꠇꠞꠍꠦ, ꠈꠦꠔꠤ-ꠙꠥꠞꠘ ꠢꠤꠡꠣꠛꠦ ꠅꠃ ꠎꠤꠘꠤꠡꠞ ꠝꠥꠟ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠛꠦꠡꠤ ꠖꠤꠔꠦ ꠅꠁꠛ। 8 ꠈꠦꠔꠤ-ꠙꠥꠞꠘ ꠘꠦꠅꠀꠞ ꠎꠥꠇꠣ ꠝꠣꠘꠥꠡ ꠎꠥꠖꠤ ꠘꠣ ꠞꠂꠘ ꠀꠞ ꠔꠣꠞ ꠇꠥꠘꠥ ꠀꠙꠘ ꠎꠘ ꠘꠣ ꠕꠣꠇꠂꠘ, ꠔꠦ ꠁꠔꠣ ꠝꠣꠛꠥꠖꠞ ꠙꠣꠅꠘꠣ ꠅꠁꠛ। ꠅꠃ ꠈꠦꠔꠤ-ꠙꠥꠞꠘ ꠀꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠝꠦꠠꠣꠐꠣ ꠁꠝꠣꠝ ꠍꠣꠛꠦ ꠙꠣꠁꠛꠣ। 9 ꠛꠘꠤ ꠁꠍꠞꠣꠁꠟꠦ ꠙꠣꠇ-ꠙꠛꠤꠔ꠆ꠞ ꠎꠔ ꠎꠤꠘꠤꠡ ꠁꠝꠣꠝꠞ ꠉꠦꠍꠦ ꠟꠁꠀ ꠀꠁꠛꠣ, ꠁꠔꠣ ꠢꠇ꠆ꠇꠟꠔꠣꠃ ꠁꠝꠣꠝꠦ ꠙꠣꠁꠛꠣ। 10 ꠙꠞꠔꠦꠇ ꠎꠘꠞ ꠇꠥꠞꠛꠣꠘꠤ ꠖꠦꠅꠀ ꠎꠤꠘꠤꠡ ꠁꠝꠣꠝꠦ ꠙꠣꠁꠛꠣ। ꠁꠝꠣꠝꠞ ꠀꠔꠅ ꠎꠦ ꠎꠤꠘꠤꠡ ꠖꠦꠅꠀ ꠅꠁꠛ, ꠁꠔꠣ ꠁꠝꠣꠝꠞꠃ ꠅꠁꠛ।”

11 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 12 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠇꠦꠃꠞꠞ ꠛꠃ ꠎꠥꠖꠤ ꠇꠥ-ꠙꠕꠦ ꠎꠣꠄꠉꠤ, 13 ꠀꠞ ꠎꠣꠝꠣꠁꠞꠦ ꠟꠥꠇꠣꠁꠀ ꠀꠞꠇ ꠛꠦꠐꠣꠞ ꠟꠉꠦ ꠎꠤꠘꠣ ꠇꠞꠤꠀ ꠅꠡꠔꠤ ꠛꠘꠦ, ꠔꠣꠁꠞ ꠎꠣꠝꠣꠁꠄ ꠁꠈꠣꠘ ꠘꠣ ꠎꠣꠘꠦ ꠛꠣ ꠁꠔꠣꠞ ꠇꠥꠘꠥ ꠡꠣꠇ꠆ꠇꠤꠅ ꠘꠣ ꠕꠣꠇꠦ, ꠔꠣꠁ ꠇꠥꠘꠥ ꠗꠞꠣ ꠘꠣ-ꠅ ꠈꠣꠄ। 14 ꠄꠞꠛꠣꠖꠦꠅ ꠎꠣꠝꠣꠁꠄ ꠛꠃꠞꠦ ꠡꠘ꠆ꠖꠄ ꠇꠞꠤꠟꠣꠄ, ꠔꠣꠞ ꠜꠤꠔꠞꠦ ꠅꠡꠣꠘ꠆ꠔꠤ ꠇꠞꠦꠞ, ꠇꠤꠛꠣ ꠛꠃꠄ ꠇꠥꠘꠥ ꠅꠡꠔꠤ ꠇꠣꠝ ꠘꠣ ꠇꠞꠟꠦꠅ ꠎꠣꠝꠣꠁꠄ ꠈꠣꠟꠤ ꠔꠣꠁꠞꠦ ꠡꠘ꠆ꠖꠄ ꠇꠞꠦ, ꠄꠞꠟꠣꠉꠤ ꠔꠣꠞ ꠝꠘꠞ ꠝꠣꠎꠦ ꠅꠡꠣꠘ꠆ꠔꠤ ꠢꠣꠝꠣꠁꠎꠣꠄ, 15 ꠔꠦ ꠎꠣꠝꠣꠁꠄ ꠔꠣꠞ ꠛꠃꠞꠦ ꠟꠁꠀ ꠁꠝꠣꠝ ꠍꠣꠛꠞ ꠉꠦꠍꠦ ꠎꠣꠁꠔꠦ ꠅꠁꠛ। ꠎꠣꠅꠀꠞ ꠡꠝꠄ ꠔꠣꠞ ꠛꠃꠞ ꠔꠞꠚ ꠕꠣꠇꠤ ꠍꠖꠉꠣ ꠢꠤꠡꠣꠛꠦ ꠖꠥꠁ ꠡꠦꠞ ꠛꠣꠞ꠆ꠟꠤꠞ ꠝꠄꠖꠣ ꠘꠤꠔꠦ ꠅꠁꠛ। ꠅꠃ ꠝꠄꠖꠣ ꠅꠁꠟ ꠡꠘ꠆ꠖꠄꠞ ꠟꠣꠉꠤ ꠍꠖꠉꠣ, ꠝꠣꠛꠥꠖꠞ ꠍꠣꠝꠘꠦ ꠅꠙꠞꠣꠗ ꠎꠣꠁꠞ ꠇꠞꠣꠞ ꠍꠖꠉꠣ, ꠄꠞꠟꠣꠉꠤ ꠁꠔꠣꠞ ꠝꠣꠎꠦ ꠇꠥꠘꠥ ꠔꠦꠟ ꠛꠣ ꠈꠥꠡꠛꠄꠖꠣꠞ ꠟꠥꠛꠣꠘ ꠝꠤꠡꠣꠘꠤ ꠘꠤꠡꠦꠗ।

16 “ꠁꠝꠣꠝꠦ ꠅꠃ ꠛꠦꠐꠣꠞ ꠛꠃꠞꠦ ꠝꠣꠛꠥꠖꠞ ꠍꠣꠝꠘꠦ ꠈꠣꠠꠣ ꠇꠞꠣꠁꠛꠣ। 17 ꠀꠞ ꠝꠣꠐꠤꠞ ꠄꠇ ꠉꠣꠝꠟꠣꠞ ꠝꠣꠎꠦ ꠇꠤꠍꠥ ꠙꠛꠤꠔ꠆ꠞ ꠙꠣꠘꠤ ꠜꠞꠛꠣ, ꠜꠞꠤꠀ ꠀꠟ꠆ꠟꠣꠞ ꠊꠞꠞ ꠜꠤꠔꠞꠞ ꠝꠣꠐꠤꠞ ꠃꠙꠞ ꠕꠣꠇꠤ ꠇꠤꠍꠥ ꠗꠥꠁꠟ ꠔꠥꠟꠤꠀ ꠅꠃ ꠙꠣꠘꠤꠔ ꠍꠣꠠꠤꠛꠣ। 18 ꠛꠦꠐꠤꠞꠦ ꠝꠣꠛꠥꠖꠞ ꠍꠣꠝꠘꠦ ꠃꠛꠣ ꠇꠞꠤꠀ ꠢꠣꠞꠟꠦ ꠔꠣꠁꠘ ꠛꠦꠐꠤꠞ ꠝꠣꠕꠣꠞ ꠌꠥꠟ ꠈꠥꠟꠤꠀ ꠖꠤꠛꠣ, ꠀꠞ ꠛꠦꠐꠤꠞ ꠅꠙꠞꠣꠗꠞ ꠢꠣꠍꠣ-ꠝꠤꠍꠣ ꠎꠣꠁꠞ ꠅꠀꠞ ꠟꠣꠉꠤ ꠀꠘꠣ ꠍꠖꠉꠣꠞ ꠛꠣꠞ꠆ꠟꠤꠞ ꠝꠄꠖꠣꠞꠦ ꠔꠣꠁꠞ ꠀꠔꠅ ꠖꠤꠛꠣ। ꠖꠤꠀ ꠔꠣꠘ ꠘꠤꠎꠞ ꠀꠔꠅ ꠟꠁꠛꠣ ꠢꠃ ꠟꠣꠘ꠆ꠘꠔ ꠒꠣꠇꠤꠀ ꠀꠘꠣꠞ ꠔꠤꠔ꠆ꠔꠣ ꠙꠣꠘꠤ। 19 ꠙꠣꠘꠤ ꠟꠁꠀ ꠁꠝꠣꠝꠦ ꠅꠃ ꠛꠦꠐꠤꠞꠦ ꠇꠍꠝ ꠇꠞꠣꠁꠀ ꠇꠁꠛꠣ, ‘ꠔꠥꠝꠣꠞ ꠛꠤꠀꠞ ꠛꠣꠖꠦ ꠎꠥꠖꠤ ꠇꠥꠘꠥ ꠛꠦꠐꠣꠄ ꠔꠥꠝꠣꠞ ꠟꠉꠦ ꠎꠤꠘꠣ ꠘꠣ ꠇꠞꠦ, ꠛꠣ ꠇꠥ-ꠙꠕꠦ ꠉꠤꠀ ꠔꠥꠝꠤ ꠅꠡꠔꠤ ꠘꠣ ꠅꠅ, ꠔꠦ ꠅꠃ ꠟꠣꠘ꠆ꠘꠔ ꠀꠘꠣꠞ ꠔꠤꠔ꠆ꠔꠣ ꠙꠣꠘꠤꠄ ꠎꠣꠘꠥ ꠔꠥꠝꠣꠞ ꠇꠥꠘꠥ ꠈꠦꠔꠤ ꠘꠣ ꠅꠄ। 20 ꠅꠁꠟꠦ ꠛꠤꠀꠞ ꠛꠣꠖꠦ ꠇꠥ-ꠙꠕꠦ ꠉꠤꠀ ꠖꠥꠍꠞꠣ ꠇꠥꠘꠥ ꠛꠦꠐꠣꠞ ꠟꠉꠦ ꠎꠤꠘꠣ ꠇꠞꠤꠀ ꠎꠥꠖꠤ ꠅꠡꠔꠤ ꠅꠅ,’ 21 —ꠅꠈꠣꠘ ꠇꠁꠀ ꠁꠝꠣꠝꠦ ꠅꠃ ꠛꠦꠐꠤꠞꠦ ꠘꠤꠎꠞ ꠃꠙꠞꠦ ꠟꠣꠘ꠆ꠘꠔ ꠒꠣꠇꠤꠀ ꠀꠘꠣꠞ ꠇꠍꠝ ꠇꠞꠣꠁꠀ ꠢꠣꠞꠤ ꠢꠤꠞꠛꠣꠞ ꠇꠁꠛꠣ— ‘ꠔꠦ ꠝꠣꠛꠥꠖꠦ ꠔꠥꠝꠣꠞꠦ ꠅꠃ ꠉꠎꠛ ꠖꠦꠃꠇ꠆ꠇꠣ, ꠔꠥꠝꠣꠞ ꠘꠣꠞꠤ-ꠅꠋꠉ ꠘꠤꠡ꠆ꠔꠦꠎ ꠅꠁꠎꠣꠃꠇ, ꠀꠞ ꠔꠥꠝꠣꠞ ꠙꠦꠐ ꠚꠥꠟꠤꠀ ꠝꠥꠐꠣ ꠅꠁꠎꠣꠃꠇ। ꠔꠦꠃ ꠁꠔꠣ ꠖꠦꠈꠤꠀ ꠔꠥꠝꠣꠞ ꠡꠝꠣꠎꠞ ꠝꠣꠘꠡꠦ ꠎꠦꠇꠥꠘꠥ ꠛꠖ꠆ꠖꠥꠀ ꠀꠞ ꠟꠣꠘ꠆ꠘꠔꠤ ꠇꠍꠝ ꠈꠣꠅꠀꠞ ꠡꠝꠄ ꠔꠥꠝꠣꠞ ꠘꠣꠝ ꠔꠣꠞꠣ ꠁꠀꠖ ꠇꠞꠛ। 22 ꠀꠞ ꠅꠃ ꠟꠣꠘ꠆ꠘꠔ ꠀꠘꠣꠞ ꠙꠣꠘꠤ ꠔꠥꠝꠣꠞ ꠡꠞꠤꠟꠅ ꠢꠣꠝꠣꠁꠀ ꠎꠣꠘꠥ ꠅꠟꠣ ꠇꠣꠝ ꠇꠞꠦ, ꠎꠣꠔꠦ ꠔꠥꠝꠣꠞ ꠙꠦꠐ ꠚꠥꠟꠤꠎꠣꠄ ꠀꠞ ꠔꠥꠝꠣꠞ ꠘꠣꠞꠤ-ꠅꠋꠉ ꠘꠤꠡ꠆ꠔꠦꠎ ꠅꠁꠎꠣꠄ।’ ꠔꠦꠃ ꠛꠦꠐꠤꠄ ꠇꠁꠛ, ‘ꠀꠝꠤꠘ, ꠅꠟꠣꠃ ꠅꠃꠇ।’

23 “ꠁꠝꠣꠝꠦ ꠅꠃ ꠟꠣꠘ꠆ꠘꠔ ꠀꠘꠣ ꠇꠍꠝꠞ ꠇꠕꠣ ꠄꠇ ꠌꠣꠝꠠꠣꠞ ꠃꠙꠞꠦ ꠟꠦꠈꠤꠀ ꠢꠣꠞꠤ, ꠙꠣꠘꠤ ꠓꠣꠟꠤꠀ ꠅꠃ ꠟꠦꠈꠣꠞ ꠇꠣꠟꠤ ꠔꠤꠔ꠆ꠔꠣ ꠙꠣꠘꠤꠔ ꠚꠣꠟꠣꠁꠛꠣ। 24 ꠟꠣꠘ꠆ꠘꠔ ꠀꠘꠣꠞ ꠅꠃ ꠔꠤꠔ꠆ꠔꠣ ꠙꠣꠘꠤ ꠛꠦꠐꠤꠞꠦ ꠈꠣꠅꠀꠘꠤꠞ ꠛꠣꠖꠦ ꠛꠦꠐꠤꠞ ꠙꠦꠐꠅ ꠈꠥꠛ ꠎꠣꠟꠣ-ꠎꠘꠔ꠆ꠞꠘꠣ ꠙꠄꠖꠣ ꠅꠁꠛ। 25 ꠁꠝꠣꠝꠦ ꠙꠄꠟꠣ ꠅꠃ ꠛꠦꠐꠤꠞ ꠀꠔ ꠕꠣꠇꠤ ꠡꠘ꠆ꠖꠄꠞ ꠍꠖꠉꠣꠞ ꠝꠄꠖꠣ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠖꠥꠟꠣꠁꠀ ꠇꠥꠞꠛꠣꠘꠤ ꠈꠣꠘꠣꠔ ꠟꠁꠀ ꠎꠣꠁꠛꠣ। 26 ꠛꠣꠖꠦ ꠔꠣꠁꠘ ꠙꠥꠞꠣ ꠍꠖꠉꠣꠞ ꠛꠖꠟꠣ ꠅꠃ ꠝꠄꠖꠣ ꠕꠣꠇꠤ ꠘꠤꠡꠣꠘꠣ ꠢꠤꠡꠣꠛꠦ ꠄꠇ ꠝꠥꠁꠐ ꠙꠞꠤꠝꠣꠘ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠔ ꠎꠣꠟꠣꠁꠛꠣ, ꠀꠞ ꠢꠃ ꠔꠤꠔ꠆ꠔꠣ ꠙꠣꠘꠤ ꠛꠦꠐꠤꠞꠦ ꠈꠣꠅꠀꠁꠛꠣ। 27 ꠛꠦꠐꠤꠄ ꠎꠥꠖꠤ ꠎꠣꠝꠣꠁꠞ ꠟꠉꠦ ꠛꠦꠁꠝꠣꠘꠤ ꠇꠞꠤꠀ ꠅꠡꠔꠤ ꠅꠁꠀ ꠕꠣꠇꠦ, ꠔꠦ ꠁ ꠙꠣꠘꠤ ꠈꠣꠅꠀꠞ ꠛꠣꠖꠦꠃ ꠔꠣꠁꠞ ꠙꠦꠐꠅ ꠈꠥꠛ ꠎꠣꠟꠣ-ꠎꠘꠔ꠆ꠞꠘꠣ ꠅꠁꠛ। ꠔꠣꠁꠞ ꠙꠦꠐ ꠚꠥꠟꠤꠀ ꠝꠥꠐꠣ ꠅꠁꠛ, ꠀꠞ ꠘꠣꠞꠤ-ꠅꠋꠉ ꠘꠤꠡ꠆ꠔꠦꠎ ꠅꠁꠀ ꠀꠐꠈꠥꠞꠣ ꠛꠘꠤꠎꠤꠛ, ꠝꠣꠘꠡꠦ ꠟꠣꠘ꠆ꠘꠔ ꠖꠤꠛꠣꠞ ꠘꠤꠅꠔꠦ ꠔꠣꠁꠞ ꠘꠣꠝ ꠟꠁꠛꠣ। 28 ꠅꠁꠟꠦ ꠔꠣꠁ ꠎꠥꠖꠤ ꠅꠡꠔꠤ ꠘꠣ ꠅꠁꠀ ꠘꠤ-ꠅꠙꠞꠣꠗꠤ ꠞꠄ, ꠔꠦ ꠔꠣꠁ ꠁ ꠟꠣꠘ꠆ꠘꠔ ꠕꠣꠇꠤ ꠈꠣꠟꠣꠍ ꠙꠣꠁꠛ, ꠀꠞ ꠢꠥꠞꠥꠔ꠆ꠔꠣ ꠎꠘꠝ ꠖꠦꠅꠀꠞ ꠈꠦꠝꠔꠣꠅ ꠎꠣꠞꠤ ꠞꠁꠛ।

29 ꠎꠣꠝꠣꠁ-ꠛꠃꠞ ꠡꠘ꠆ꠖꠄꠞ ꠛꠤꠡꠄꠄ ꠀꠟ꠆ꠟꠣꠞ ꠀꠁꠘ ꠔ ꠅꠟꠣ। ꠇꠥꠘꠥ ꠛꠃ ꠎꠥꠖꠤ ꠎꠣꠝꠣꠁꠞ ꠡꠋꠡꠣꠞꠅ ꠞꠁꠀ ꠇꠥ-ꠙꠕꠦ ꠉꠤꠀ ꠅꠡꠔꠤ ꠛꠘꠦ, 30 ꠛꠣ ꠎꠣꠝꠣꠁꠄ ꠔꠣꠞ ꠛꠃꠞꠦ ꠛꠖꠝꠣꠁꠡꠤꠞ ꠡꠘ꠆ꠖꠄ ꠇꠞꠦ, ꠔꠦ ꠔꠣꠞꠣꠞ ꠟꠣꠉꠤ ꠅꠃ ꠀꠁꠘ। ꠛꠦꠐꠣꠄ ꠔꠣꠞ ꠛꠃꠞꠦ ꠝꠣꠛꠥꠖꠞ ꠍꠣꠝꠘꠦ ꠘꠤꠛ ꠀꠞ ꠁꠝꠣꠝꠦ ꠁꠔꠣ ꠢꠇꠟꠔꠣ ꠛꠦꠐꠤꠞ ꠃꠙꠞꠦ ꠛꠞ꠆ꠔꠣꠁꠛꠣ। 31 ꠔꠦꠃ ꠎꠣꠝꠣꠁꠄ ꠔꠣꠞ ꠘꠣꠟꠤꠡ ꠕꠣꠇꠤ ꠈꠣꠟꠣꠍ ꠙꠣꠁꠛ, ꠀꠞ ꠛꠃ ꠢꠣꠍꠣꠞꠞ ꠅꠙꠞꠣꠗꠤ ꠅꠁꠟꠦ ꠔꠣꠁꠞ ꠡꠣꠎꠣ ꠛꠁꠛ।”