1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠇꠥꠘꠥ ꠛꠦꠐꠣ ꠛꠣ ꠛꠦꠐꠤꠄ ꠎꠥꠖꠤ ꠘꠣꠎꠤꠞꠤꠀ ꠄꠔꠦꠇꠣꠚ ꠇꠞꠔꠣ ꠌꠣꠁꠘ, ꠝꠣꠘꠤ ꠈꠣꠟꠤ ꠝꠣꠛꠥꠖꠞ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠟꠣꠉꠤ ꠀꠟꠣꠖꠣ ꠞꠅꠀꠞ ꠝꠣꠘ꠆ꠘꠔ ꠇꠞꠤꠟꠣꠄ, 3 ꠔꠦ ꠀꠋꠉꠥꠞꠞ ꠡꠞꠛꠔ ꠛꠣ ꠎꠦꠇꠥꠘꠥ ꠘꠝꠥꠘꠣꠞ ꠡꠞꠣꠛ ꠈꠣꠅꠀ ꠕꠣꠇꠤ ꠔꠣꠞꠣ ꠘꠤꠌ꠆ꠌꠄ ꠢꠞꠤꠀ ꠕꠣꠇꠔꠦ ꠅꠁꠛ। ꠀꠋꠉꠥꠞꠞ ꠡꠤꠞ꠆ꠇꠣ ꠛꠣ ꠎꠦꠇꠥꠘꠥ ꠘꠝꠥꠘꠣꠞ ꠡꠤꠞ꠆ꠇꠣ ꠈꠣꠅꠀ ꠕꠣꠇꠤꠅ ꠔꠣꠞꠣ ꠛꠣꠌꠤꠀ ꠞꠁꠛ। ꠀꠞ ꠔꠣꠞꠣ ꠔꠣꠎꠣ ꠀꠋꠉꠥꠞ, ꠇꠤꠍꠝꠤꠍ, ꠛꠣ ꠀꠋꠉꠥꠞꠞ ꠞꠡꠅ ꠈꠣꠁꠔ ꠘꠣꠄ। 4 ꠝꠥꠟ ꠇꠕꠣ ꠅꠁꠟ, ꠄꠞꠣ ꠎꠔꠖꠤꠘ ꠘꠣꠎꠤꠞꠤꠀ ꠄꠔꠦꠇꠣꠚꠅ ꠞꠁꠛ, ꠅꠔꠖꠤꠘ ꠀꠋꠉꠥꠞ ꠔ ꠖꠥꠞꠞ ꠇꠕꠣ, ꠀꠋꠉꠥꠞꠞ ꠄꠇꠐꠣ ꠛꠤꠌꠤ ꠛꠣ ꠛꠣꠇꠟꠅ ꠔꠣꠞꠣ ꠇꠥꠘꠥ ꠟꠣꠈꠣꠘꠃ ꠈꠣꠁꠔ ꠙꠣꠞꠔ ꠘꠣꠄ।

5 “ꠀꠞ ꠎꠔꠖꠤꠘꠞ ꠟꠣꠉꠤ ꠘꠣꠎꠤꠞꠤꠀ ꠄꠔꠦꠇꠣꠚꠞ ꠘꠤꠅꠔꠦ ꠘꠤꠎꠞꠦ ꠀꠟꠣꠖꠣ ꠞꠣꠈꠣꠞ ꠝꠣꠘ꠆ꠘꠔ ꠇꠞꠍꠂꠘ, ꠅꠔꠖꠤꠘ ꠔꠣꠞꠣꠞ ꠝꠣꠕꠣꠔ ꠈꠥꠞ-ꠛꠦꠟꠦꠁꠐ ꠟꠣꠉꠣꠘꠤ ꠘꠤꠡꠦꠗ। ꠝꠣꠛꠥꠖꠞ ꠘꠣꠝꠦ ꠀꠟꠣꠖꠣ ꠞꠅꠀꠞ ꠡꠝꠄ ꠄꠞꠣ ꠙꠣꠇ-ꠙꠣꠇꠤꠎꠣ ꠞꠁꠔꠦ ꠅꠁꠛ। ꠝꠣꠕꠣꠞ ꠌꠥꠟ ꠟꠣꠝ꠆ꠛꠣ ꠇꠞꠔꠦ ꠅꠁꠛ। 6 ꠁ ꠡꠝꠄ ꠇꠥꠘꠥ ꠝꠞꠣ ꠟꠣꠡꠞ ꠉꠦꠍꠦ ꠎꠣꠁꠔ ꠙꠣꠞꠔ ꠘꠣꠄ। 7 ꠔꠣꠞꠣꠞ ꠝꠣ-ꠛꠣꠛꠣ, ꠜꠣꠁ-ꠛꠁꠘ ꠇꠦꠃ ꠝꠣꠞꠣ ꠉꠦꠟꠦꠅ ꠘꠤꠎꠞꠦ ꠘꠣꠙꠣꠇ ꠇꠞꠔ ꠙꠣꠞꠔ ꠘꠣꠄ, ꠇꠣꠞꠘ ꠄꠞꠣꠞ ꠝꠣꠕꠣꠞ ꠝꠣꠎꠦ ꠔ ꠀꠟ꠆ꠟꠣꠞ ꠘꠣꠝꠦ ꠀꠟꠣꠖꠣ ꠞꠅꠀꠞ ꠘꠤꠡꠣꠘꠣ ꠌꠥꠟ ꠟꠣꠉꠣꠁꠟ। 8 ꠔꠣꠞꠣꠞ ꠁ ꠀꠟꠣꠖꠣ ꠞꠅꠀꠞ ꠝꠤꠀꠖ ꠘꠣ ꠙꠥꠞꠣ ꠙꠞ꠆ꠎꠘ꠆ꠔ, ꠙꠣꠇ-ꠙꠣꠇꠤꠎꠣ ꠞꠁꠔꠦ ꠅꠁꠛ।

9 “ꠀꠞ ꠀꠈꠔꠣ ꠇꠥꠘꠥ ꠝꠣꠘꠥꠡ ꠎꠥꠖꠤ ꠔꠣꠞ ꠍꠣꠝꠘꠦ ꠝꠞꠤꠎꠣꠄ, ꠔꠦ ꠅꠃ ꠝꠞꠣꠞ ꠖꠣꠄ ꠝꠣꠛꠥꠖꠞ ꠘꠣꠝꠦ ꠞꠣꠈꠣ ꠔꠣꠞ ꠝꠣꠕꠣꠞ ꠌꠥꠟ ꠘꠣꠙꠣꠇ ꠅꠁꠎꠣꠁꠛ, ꠀꠞ ꠢꠤꠞꠛꠣꠞ ꠙꠣꠇ ꠅꠀꠞ ꠟꠣꠉꠤ ꠡꠣꠔ ꠖꠤꠘꠞ ꠖꠤꠘ ꠔꠣꠞ ꠝꠣꠕꠣ ꠇꠣꠝꠣꠁꠟꠤꠔꠦ ꠅꠁꠛ। 10 ꠀꠞ ꠀꠐ ꠖꠤꠘꠞ ꠖꠤꠘ ꠢꠦ ꠖꠥꠁꠐꠣ ꠒꠥꠙꠤ ꠙꠣꠈꠤ ꠛꠣ ꠖꠥꠁꠐꠣ ꠙꠣꠞꠅ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠅ ꠁꠝꠣꠝꠞ ꠉꠦꠍꠦ ꠎꠣꠁꠛ। 11 ꠝꠞꠣ ꠟꠣꠡꠞ ꠉꠦꠍꠦ ꠉꠤꠀ ꠢꠦ ꠘꠣꠙꠣꠇ ꠅꠀꠄ, ꠅꠈꠘ ꠔꠣꠞ ꠘꠣꠙꠣꠇꠤꠞ ꠉꠥꠘꠣ ꠝꠣꠚꠤꠞ ꠟꠣꠉꠤ ꠁꠝꠣꠝꠦ ꠄꠇꠐꠣ ꠙꠣꠈꠤ ꠖꠤꠀ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠀꠞ ꠖꠥꠍꠞꠣ ꠙꠣꠈꠤ ꠖꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣ। ꠅꠃ ꠖꠤꠘꠃ ꠝꠣꠛꠥꠖꠞ ꠘꠣꠝꠦ ꠔꠣꠞ ꠝꠣꠕꠣꠞꠦ ꠘꠄꠀ ꠇꠞꠤ ꠙꠣꠇ-ꠙꠣꠇꠤꠎꠣ ꠞꠣꠈꠔꠦ ꠅꠁꠛ। 12 ꠀꠞ ꠀꠉꠞ ꠟꠣꠈꠣꠘ ꠢꠤꠞꠛꠣꠞ ꠝꠣꠛꠥꠖꠞ ꠘꠣꠝꠦ ꠀꠟꠣꠖꠣ ꠞꠅꠀꠞ ꠝꠣꠘ꠆ꠘꠔ ꠇꠞꠣ ꠟꠣꠉꠛ। ꠄꠞꠟꠉꠦ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠟꠣꠉꠤ ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛ। ꠔꠣ-ꠅ ꠀꠉꠦ ꠎꠔꠖꠤꠘ ꠢꠦ ꠝꠣꠛꠥꠖꠞ ꠘꠣꠝꠦ ꠀꠟꠣꠖꠣ ꠞꠁꠍꠤꠟ, ꠁꠔꠣ ꠛꠣꠔꠤꠟ ꠅꠁꠎꠤꠛ, ꠇꠣꠞꠘ ꠢꠤ ꠡꠝꠄ ꠢꠦ ꠘꠣꠙꠣꠇ ꠅꠁꠉꠦꠍꠤꠟ।

13 “ꠎꠦꠇꠥꠘꠥ ꠎꠘꠦ ꠝꠣꠛꠥꠖꠞ ꠘꠣꠝꠦ ꠘꠣꠎꠤꠞꠤꠀ ꠄꠔꠦꠇꠣꠚꠞ ꠝꠤꠀꠖ ꠙꠥꠞꠣ ꠇꠞꠤꠀ ꠢꠣꠞꠟꠦ, ꠙꠛꠤꠔ꠆ꠞ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠘ꠆ꠖꠣꠔ ꠎꠣꠁꠛ। 14 ꠉꠤꠀ ꠝꠣꠛꠥꠖꠞ ꠘꠣꠝꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠘꠤꠈꠥꠔ ꠝꠦꠠꠣ-ꠛꠣꠁꠌ꠆ꠌꠣ, ꠀꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠇ ꠛꠍꠞ ꠛꠄꠅꠡꠤ ꠄꠉꠥ ꠘꠤꠈꠥꠔ ꠝꠦꠠꠤ-ꠛꠣꠁꠌ꠆ꠌꠣ, ꠄꠞꠟꠉꠦ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠘꠤꠈꠥꠔ ꠝꠦꠠꠣ ꠀꠘꠔꠦ ꠅꠁꠛ। 15 ꠅꠔꠣꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠀꠘꠛ, ꠄꠞꠟꠉꠦ ꠘꠤꠞꠦꠇ ꠉꠥꠠꠤꠖꠤ ꠛꠣꠘꠣꠁꠟ ꠔꠦꠟꠖꠤ ꠜꠣꠎꠣ ꠄꠇ ꠐꠥꠇꠞꠤ ꠙꠤꠑꠣ ꠀꠞ ꠔꠦꠟ ꠝꠣꠈꠣꠁꠟ ꠌꠣꠙꠣꠐꠤ ꠛꠣꠘꠣꠁꠅ। ꠁꠔꠣ ꠇꠥꠘ꠆ꠔꠣꠔꠃ ꠈꠣꠝꠤꠞ ꠝꠤꠡꠣꠁꠅ ꠘꠣ। 16 ꠁꠝꠣꠝꠦ ꠁꠔꠣ ꠢꠇꠟꠔꠣ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠕꠁꠀ ꠢꠣꠞꠤ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠉꠦ ꠖꠤꠛꠣ। 17 ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠝꠦꠠꠣꠞ ꠟꠉꠦꠅ ꠅꠟꠣ ꠈꠣꠝꠤꠞ ꠍꠣꠠꠣ ꠞꠥꠐꠤ ꠖꠤꠛꠣ। ꠄꠞꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠀꠖꠣꠄ ꠇꠞꠛꠣ। 18 ꠛꠣꠖꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠘꠣꠎꠤꠞꠤꠀ ꠄꠔꠦꠇꠣꠚ ꠇꠞꠞꠣ ꠎꠘꠞ ꠝꠣꠕꠣꠞ ꠌꠥꠟ ꠇꠣꠝꠣꠁꠀ, ꠅꠃ ꠌꠥꠟ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠔꠟꠞ ꠀꠉꠥꠁꠘꠅ ꠚꠣꠟꠣꠁꠛꠣ। 19 ꠀꠞ ꠝꠣꠛꠥꠖꠞ ꠘꠣꠝꠦ ꠞꠣꠈꠣ ꠅꠃ ꠌꠥꠟ ꠇꠣꠝꠣꠘꠤꠞ ꠛꠣꠖꠦ ꠁꠝꠣꠝꠦ ꠇꠥꠞꠛꠣꠘꠤꠞ ꠝꠦꠠꠣꠞ ꠡꠤꠖ꠆ꠖ ꠇꠞꠣ ꠄꠇꠈꠣꠘ ꠉꠞ꠆ꠖꠘꠣ ꠀꠞ ꠐꠥꠇꠞꠤ ꠕꠣꠇꠤ ꠈꠣꠝꠤꠞ ꠍꠣꠠꠣ ꠄꠇꠈꠣꠘ ꠙꠤꠑꠣ ꠀꠞ ꠄꠇꠈꠣꠘ ꠔꠦꠟ ꠝꠣꠈꠣꠁꠟ ꠌꠣꠙꠣꠐꠤ ꠘꠤꠀ ꠘꠣꠎꠤꠞꠤꠀ ꠄꠔꠦꠇꠣꠚ ꠇꠞꠞꠣ ꠎꠘꠞ ꠀꠔꠅ ꠖꠤꠛꠣ। 20 ꠛꠣꠖꠦ ꠁꠝꠣꠝꠦ ꠅꠔꠣ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠃꠌꠣ ꠇꠞꠤ ꠖꠥꠟꠣꠁꠛꠣ। ꠁꠔꠣ ꠔ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡ, ꠁꠔꠣ ꠢꠇ꠆ꠇꠟꠔꠣ ꠁꠝꠣꠝꠞ ꠙꠣꠅꠘꠣ। ꠖꠥꠟꠣꠁꠀ ꠕꠅꠀ ꠍꠤꠘꠣꠞ ꠅꠃ ꠉꠥꠡ꠆ꠔ ꠀꠞ ꠇꠥꠞꠛꠣꠘꠤꠞ ꠙꠡꠥꠞ ꠞꠣꠘꠅ ꠁꠝꠣꠝꠞ ꠙꠣꠅꠘꠣ। ꠁꠔꠣ ꠢꠇꠟꠔꠣ ꠇꠞꠣꠞ ꠛꠣꠖꠦ ꠘꠣꠎꠤꠞꠤꠀ ꠄꠔꠦꠇꠣꠚ ꠇꠞꠞꠣ ꠅꠃ ꠎꠘꠦ ꠀꠋꠉꠥꠞꠞ ꠡꠞꠛꠔ ꠈꠣꠁꠔꠣ ꠙꠣꠞꠛꠣ।

21 “ꠁꠔꠣ ꠔ ꠘꠣꠎꠤꠞꠤꠀ ꠄꠔꠦꠇꠣꠚ ꠇꠞꠞꠣ ꠎꠘꠞ ꠟꠣꠉꠤ ꠀꠁꠘ। ꠝꠣꠛꠥꠖꠞ ꠘꠣꠝꠦ ꠀꠟꠣꠖꠣ ꠞꠁꠀ ꠘꠣꠎꠤꠞꠤꠀ ꠄꠔꠦꠇꠣꠚꠞ ꠘꠤꠅꠝ ꠝꠣꠚꠤꠇ, ꠅꠔꠣ ꠢꠇꠟꠔꠣ ꠇꠥꠞꠛꠣꠘꠤ ꠖꠤꠔꠦ ꠅꠁꠛ। ꠀꠞ ꠎꠥꠖꠤ ꠔꠣꠞꠣꠞ ꠡꠣꠁꠖ꠆ꠖ ꠝꠣꠚꠤꠇ ꠀꠞꠅ ꠇꠥꠘ꠆ꠔꠣ ꠇꠞꠣꠞ ꠘꠤꠅꠔ ꠇꠞꠦ, ꠔꠦ ꠅꠔꠣꠅ ꠇꠞꠔꠦ ꠅꠁꠛ। ꠝꠣꠛꠥꠖꠞ ꠘꠣꠝꠦ ꠀꠟꠣꠖꠣ ꠞꠅꠀꠞ ꠝꠣꠘ꠆ꠘꠔ ꠝꠣꠚꠤꠇ ꠄꠔꠦꠇꠣꠚꠞ ꠎꠞꠥꠞꠤ ꠢꠇ꠆ꠇꠟꠔꠣ ꠄꠞꠣ ꠀꠖꠣꠄ ꠇꠞꠛ।”

22 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 23 “ꠔꠥꠝꠤ ꠁꠝꠣꠝ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘꠞꠦ ꠎꠣꠘꠣꠁ ꠖꠦꠅ, ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠖꠥꠀ ꠇꠞꠣꠞ ꠡꠝꠄ ꠔꠣꠞꠣ ꠎꠣꠘꠥ ꠅꠟꠣ ꠇꠂꠘ,