34
ꠇꠦꠘꠣꠘ ꠖꠦꠡꠞ ꠡꠤꠝꠣꠘꠣ ꠑꠤꠇ ꠇꠞꠣ
1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠀꠝꠣꠞ ꠅꠃ ꠢꠥꠇꠥꠝ ꠎꠣꠘꠣꠁ ꠖꠦꠅ, ꠔꠥꠝꠞꠣ ꠉꠤꠀ ꠇꠦꠘꠣꠘ ꠖꠦꠡꠅ ꠢꠣꠝꠣꠘꠤꠞ ꠛꠣꠖꠦ ꠢꠘꠅ ꠎꠦ ꠎꠣꠉꠣꠞ ꠝꠣꠟꠤꠇꠣꠘꠣ ꠙꠣꠁꠛꠣꠄ, ꠁ ꠎꠣꠉꠣꠞ ꠡꠤꠝꠣꠘꠣ ꠅꠁꠟ, 3 ꠁꠖꠥꠝ ꠖꠦꠡꠞ ꠛꠒꠣꠞꠞ ꠎꠤꠘ ꠝꠞꠥꠜꠥꠝꠤꠞ ꠇꠤꠍꠥ ꠄꠟꠣꠇꠣ ꠔꠥꠝꠞꠣꠞ ꠖꠦꠡꠞ ꠖꠃꠇꠘꠞ ꠡꠤꠝꠣꠘꠣ। ꠛꠣꠖꠦ ꠅꠃ ꠖꠃꠇꠘꠞ ꠡꠤꠝꠣꠘꠣ ꠕꠣꠇꠤ ꠙꠥꠛꠦꠖꠤ ꠉꠤꠀ ꠟꠥꠘꠣ ꠡꠣꠉꠞꠞ ꠢꠦꠡ ꠝꠣꠕꠣ ꠙꠞ꠆ꠎꠘ꠆ꠔ। 4 ꠄꠞꠟꠉꠦ ꠀꠇꠞꠣꠛ꠆ꠛꠤꠝ ꠙꠣꠠꠞ ꠙꠕ ꠙꠣꠞ ꠅꠁꠀ ꠢꠣꠞꠤ ꠎꠤꠘ ꠝꠞꠥꠜꠥꠝꠤꠔ ꠢꠣꠝꠣꠁꠀ ꠇꠣꠖꠦꠡ-ꠛꠞꠘꠦꠀꠞ ꠖꠃꠇꠘꠦꠖꠤ ꠡꠤꠝꠣꠘꠣ ꠎꠣꠁꠛ। ꠉꠤꠀ ꠅꠈꠣꠘ ꠕꠣꠇꠤ ꠢꠣꠎꠞ-ꠀꠖꠞ ꠅꠁꠀ ꠅꠎꠝꠥꠘ ꠙꠞ꠆ꠎꠘ꠆ꠔ ꠔꠥꠝꠞꠣꠞ ꠡꠤꠝꠣꠘꠣ। 5 ꠀꠞ ꠅꠎꠝꠥꠘ ꠕꠣꠇꠤ ꠊꠥꠞꠤꠀ ꠝꠤꠡꠞꠞ ꠡꠤꠝꠣꠘꠣꠞ ꠢꠥꠇꠘꠣ ꠈꠣꠟꠞ ꠙꠣꠞꠦꠖꠤ ꠜꠥꠝꠗꠤꠅ ꠡꠣꠉꠞꠅ ꠉꠤꠀ ꠟꠣꠉꠛ।
6 “ꠔꠥꠝꠞꠣꠞ ꠖꠦꠡꠞ ꠙꠁꠌꠝꠞ ꠡꠤꠝꠣꠘꠣ ꠅꠁꠛ ꠜꠥꠝꠗꠤꠅ ꠡꠣꠉꠞ। ꠁꠐꠣꠃ ꠔꠥꠝꠞꠣꠞ ꠙꠁꠌꠝꠞ ꠀꠁꠟ।
7 “ꠔꠥꠝꠞꠣꠞ ꠃꠔꠞꠞ ꠡꠤꠝꠣꠘꠣ ꠅꠁꠛ, ꠜꠥꠝꠗꠤꠅ ꠡꠣꠉꠞ ꠕꠣꠇꠤ ꠢꠥꠞ ꠘꠣꠝꠞ ꠙꠣꠠ, 8 ꠅꠃ ꠙꠣꠠ ꠕꠣꠇꠤ ꠢꠣꠝꠣꠔꠅ ꠎꠣꠁꠛꠣꠞ ꠙꠕ ꠙꠞ꠆ꠎꠘ꠆ꠔ, ꠢꠣꠝꠣꠔꠞ ꠙꠕ ꠕꠣꠇꠤ ꠔꠥꠝꠞꠣꠞ ꠡꠤꠝꠣꠘꠣ ꠎꠤꠖꠣꠖ ꠉꠣꠃ ꠙꠞ꠆ꠎꠘ꠆ꠔ ꠎꠣꠁꠛ। 9 ꠀꠞ ꠎꠤꠖꠣꠖ ꠕꠣꠇꠤ ꠎꠤꠚꠞꠥꠘ ꠅꠁꠀ ꠢꠣꠎꠞ-ꠅꠘꠘꠅ ꠉꠤꠀ ꠡꠦꠡ ꠅꠁꠛ। ꠁꠐꠣꠃ ꠅꠁꠛ ꠔꠥꠝꠞꠣꠞ ꠃꠔꠞꠞ ꠡꠤꠝꠣꠘꠣ।
10 “ꠖꠦꠡꠞ ꠙꠥꠛꠞ ꠡꠤꠝꠣꠘꠣ ꠅꠁꠟ, ꠢꠣꠎꠞ-ꠅꠘꠘ ꠕꠣꠇꠤ ꠡꠚꠣꠝ ꠙꠞ꠆ꠎꠘ꠆ꠔ ꠄꠇꠐꠣ ꠡꠤꠝꠣꠘꠣ ꠀꠁꠟ ꠑꠤꠇ ꠇꠞꠤꠅ। 11 ꠅꠃ ꠡꠚꠣꠝꠞ ꠡꠤꠝꠣꠘꠣ ꠕꠣꠇꠤ ꠅꠂꠘ ꠉꠣꠃꠞ ꠙꠥꠛꠦꠖꠤ ꠉꠤꠀ ꠞꠤꠛꠟꠣ ꠙꠞ꠆ꠎꠘ꠆ꠔ ꠀꠁꠀ ꠟꠣꠝꠛ, ꠟꠣꠝꠤꠀ ꠉꠣꠟꠤꠟ ꠀꠅꠞꠞ ꠌꠞꠦꠖꠤ ꠎꠣꠁꠛ, 12 ꠉꠤꠀ ꠎꠞ꠆ꠖꠣꠘ ꠉꠣꠋꠉꠞ ꠙꠣꠞꠦꠖꠤ ꠟꠥꠘꠣ ꠡꠣꠉꠞꠅ ꠀꠁꠀ ꠡꠦꠡ ꠅꠁꠛ। ꠅꠃ ꠡꠛ ꠅꠁꠟ ꠔꠥꠝꠞꠣꠞ ꠖꠦꠡꠞ ꠌꠣꠁꠞꠅ ꠉꠣꠟꠣꠞ ꠡꠤꠝꠣꠘꠣ ꠀꠁꠟ।”
13 ꠀꠞ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠢꠥꠇꠥꠝ ꠖꠤꠟꠣ, “ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠥꠝꠞꠣ ꠟꠐꠣꠞꠤ ꠝꠣꠞꠅ, ꠝꠣꠞꠤꠀ ꠔꠥꠝꠞꠣꠞ ꠘꠄ ꠈꠣꠘ꠆ꠖꠣꠘ ꠀꠞ ꠝꠣꠘꠡꠣ ꠈꠣꠘ꠆ꠖꠣꠘꠞ ꠅꠞ꠆ꠗꠦꠇ ꠝꠣꠘꠡꠞꠦ ꠅꠃ ꠖꠦꠡꠞ ꠎꠝꠤ-ꠝꠣꠐꠤ ꠛꠣꠐꠤꠀ ꠖꠤꠀ, ꠔꠥꠝꠞꠣꠞ ꠖꠈꠟꠖꠣꠞꠤ ꠇꠣꠁꠝ ꠇꠞꠅ। 14 ꠎꠣꠘ ꠔ, ꠞꠥꠛꠦꠘ ꠈꠣꠘ꠆ꠖꠣꠘ, ꠍꠣꠖꠥ ꠈꠣꠘ꠆ꠖꠣꠘ ꠀꠞ ꠝꠣꠘꠡꠣ ꠈꠣꠘ꠆ꠖꠣꠘꠞ ꠅꠞ꠆ꠗꠦꠇ ꠝꠣꠘꠡꠦ ꠔꠣꠞꠣꠞ ꠎꠣꠞꠎꠤꠞ ꠉꠥꠡ꠆ꠐꠤ ꠝꠣꠚꠤꠇ ꠎꠝꠤ-ꠎꠝꠣꠞ ꠛꠣꠐ ꠀꠉꠦꠃ ꠙꠣꠁꠟꠤꠍꠦ। 15 ꠔꠣꠞꠣ ꠎꠤꠞꠤꠢꠅ ꠄꠟꠣꠇꠣꠞ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛꠞ ꠙꠣꠞꠅ ꠔꠣꠞꠣꠞ ꠛꠣꠐ ꠀꠉꠦꠃ ꠛꠣꠍꠤꠀ ꠘꠤꠍꠂꠘꠉꠤ।”
ꠘꠄꠀ ꠡꠞ꠆ꠖꠣꠞ ꠑꠤꠇ ꠇꠞꠣ
16 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 17 “ꠅꠃ ꠖꠦꠡꠞ ꠎꠝꠤ-ꠝꠣꠐꠤꠞꠦ ꠛꠣꠐꠤꠀ ꠖꠤꠔꠦ ꠎꠦꠞꠣ ꠝꠣꠔꠛ꠆ꠛꠞꠤ ꠇꠞꠛꠣ, ꠄꠞꠣꠞ ꠘꠣꠝ ꠅꠁꠟ, ꠁꠝꠣꠝ ꠀꠟꠤ-ꠀꠎꠞ ꠀꠞ ꠘꠥꠘꠞ ꠙꠥꠀ ꠁꠃꠍꠣ। 18 ꠎꠝꠤ-ꠎꠝꠣ ꠛꠣꠐꠤꠛꠣꠞ ꠇꠣꠟꠅ ꠡꠣꠁꠎ꠆ꠎ ꠇꠞꠣꠞ ꠟꠣꠉꠤ ꠙꠞꠔꠦꠇ ꠈꠣꠘ꠆ꠖꠣꠘꠅ ꠕꠣꠇꠤ ꠄꠇꠎꠘ ꠇꠞꠤ ꠡꠞ꠆ꠖꠣꠞ ꠘꠤꠛꠣꠄ। 19 ꠅꠃ ꠡꠞ꠆ꠖꠣꠞ ꠅꠁꠟꠣ,
ꠄꠢꠥꠖꠣ ꠈꠣꠘ꠆ꠖꠣꠘꠞ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ,
20 ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠀꠝꠤꠢꠥꠖꠞ ꠙꠥꠀ ꠡꠣꠝꠥꠄꠟ,
21 ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠇꠤꠍꠟꠥꠘꠞ ꠙꠥꠀ ꠁꠟꠤꠖꠖ,
22 ꠖꠣꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠃꠎꠟꠤꠞ ꠙꠥꠀ ꠛꠥꠇ꠆ꠇꠤ,
23 ꠁꠃꠍꠥꠚꠞ ꠙꠥꠀ ꠝꠣꠘꠡꠣ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠁꠚꠣꠖꠞ ꠙꠥꠀ ꠢꠣꠘ꠆ꠘꠤꠄꠟ,
24 ꠁꠃꠍꠥꠚꠞ ꠙꠥꠀ ꠀꠚꠞꠣꠁꠝ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠡꠤꠙ꠆ꠔꠘꠞ ꠙꠥꠀ ꠇꠝꠥꠄꠟ,
25 ꠍꠛꠥꠟꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠚꠞ꠆ꠘꠣꠈꠞ ꠙꠥꠀ ꠁꠟꠤꠎꠣꠚꠘ,
26 ꠁꠍꠣꠈꠞ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠀꠎꠣꠘꠞ ꠙꠥꠀ ꠚꠟꠔꠤꠄꠟ,
27 ꠀꠡꠤꠞ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠡꠟꠝꠤꠞ ꠙꠥꠀ ꠅꠢꠤꠢꠥꠖ,
28 ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠀꠝꠤꠢꠥꠖꠞ ꠙꠥꠀ ꠙꠖꠢꠦꠟ।”
29 ꠝꠣꠛꠥꠖꠦ ꠅꠃ ꠡꠞ꠆ꠖꠣꠞ ꠅꠇꠟꠞꠦ ꠎꠤꠝ꠆ꠝꠣꠖꠣꠞꠤ ꠡꠝꠎꠣꠁꠟꠣ, ꠇꠦꠘꠣꠘ ꠖꠦꠡꠅ ꠛꠘꠤ ꠁꠍꠞꠣꠁꠟꠞ ꠎꠝꠤ-ꠎꠝꠣ ꠛꠣꠐꠤꠀ ꠖꠤꠛꠣꠞ ꠟꠣꠉꠤ।