1 ꠛꠣꠖꠦ ꠎꠤꠞꠤꠢꠅ ꠐꠣꠃꠘꠞ ꠇꠣꠍꠣꠔ ꠎꠞ꠆ꠖꠣꠘ ꠉꠣꠋꠉꠞ ꠗꠣꠞꠅ ꠝꠥꠀꠛ ꠖꠦꠡꠞ ꠔꠟ ꠎꠣꠉꠣꠔ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠅꠃ ꠢꠥꠇꠥꠝ ꠖꠦꠅ, ꠔꠣꠞꠣ ꠎꠣꠞꠎꠤꠞ ꠈꠣꠘ꠆ꠖꠣꠘꠞ ꠎꠝꠤ-ꠎꠝꠣꠞ ꠛꠣꠐ ꠙꠣꠁꠀ ꠢꠣꠞꠟꠦ, ꠅꠔꠣ ꠕꠣꠇꠤ ꠇꠤꠍꠥ ꠐꠣꠃꠘ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞꠦ ꠖꠤꠟꠣꠁꠔꠣ, ꠄꠞꠣ ꠅꠘꠅ ꠞꠁꠛꠣ, ꠄꠞꠟꠉꠦ ꠛꠘ꠆ꠖꠞ ꠇꠤꠍꠥ ꠎꠝꠤꠅ ꠄꠞꠣꠞꠦ ꠖꠤꠔꠣ। 3 ꠅꠃ ꠐꠣꠃꠘꠅ ꠔꠣꠞꠣ ꠛꠡꠔ ꠇꠞꠛꠣ, ꠀꠞ ꠛꠘ꠆ꠖꠞ ꠎꠝꠤꠘꠅ ꠔꠣꠞꠣꠞ ꠙꠡꠥꠞ ꠙꠣꠟ ꠞꠣꠈꠛꠣ। 4 ꠔꠥꠝꠞꠣ ꠟꠦꠛꠤ ꠈꠣꠘ꠆ꠖꠣꠘꠞꠦ ꠎꠦ ꠐꠣꠃꠘ ꠅꠇꠟ ꠖꠤꠛꠣꠄ, ꠁꠔꠣꠞ ꠛꠣꠃꠘ꠆ꠒꠞꠤ ꠅꠀꠟꠞ ꠛꠣꠞꠦ ꠔꠣꠞꠣꠞꠦ ꠀꠞꠅ ꠄꠇ ꠀꠎꠣꠞ ꠀꠔ ꠎꠣꠉꠣ ꠖꠤꠛꠣꠄ, ꠔꠣꠞꠣꠞ ꠙꠡꠥꠞ ꠙꠣꠟ ꠞꠣꠈꠣꠞ ꠟꠣꠉꠤ। 5 ꠔꠥꠝꠞꠣ ꠎꠔ ꠐꠣꠃꠘ ꠔꠣꠞꠣꠞꠦ ꠖꠤꠛꠣꠄ, ꠁꠔꠣꠞ ꠌꠣꠁꠞꠅ ꠉꠣꠟꠣꠞ ꠛꠣꠃꠘ꠆ꠒꠞꠤ ꠅꠀꠟꠞ ꠛꠣꠞꠦ, ꠝꠣꠘꠤ ꠃꠔꠞꠦ-ꠖꠃꠇꠘꠦ, ꠙꠥꠛꠦ-ꠙꠁꠌꠝꠦ, ꠢꠇ꠆ꠇꠟꠛꠣꠄ ꠀꠞꠅ ꠖꠥꠁ ꠀꠎꠣꠞ ꠀꠔ ꠛꠘ꠆ꠖꠞ ꠎꠣꠉꠣ ꠝꠣꠙꠤꠀ ꠖꠤꠅ। ꠅꠘꠅ ꠔꠣꠞꠣꠞ ꠙꠡꠥꠞ ꠙꠣꠟ ꠞꠣꠈꠛꠣ।

6 “ꠔꠥꠝꠞꠣ ꠟꠦꠛꠤ ꠈꠣꠘ꠆ꠖꠣꠘꠞꠦ ꠎꠦꠔꠣ ꠐꠣꠃꠘ ꠅꠇꠟ ꠖꠤꠛꠣꠄ, ꠄꠞꠝꠣꠎꠞ ꠍꠄꠈꠣꠘ ꠐꠣꠃꠘ ꠅꠁꠛ ꠈꠥꠘꠤ ꠝꠣꠘꠡꠞ ꠀꠡꠞꠄ ꠐꠣꠃꠘ। ꠇꠥꠘꠥ ꠝꠣꠘꠡꠦ ꠀꠈꠔꠣ ꠇꠦꠃꠞꠞꠦ ꠝꠣꠞꠤꠟꠤꠟꠦ, ꠢꠦ ꠅꠃ ꠐꠣꠃꠘꠅ ꠉꠤꠀ ꠀꠡꠞꠄ ꠟꠁꠛ। ꠅꠃ ꠍꠄ ꠐꠣꠃꠘ ꠛꠣꠖꠦꠅ ꠟꠦꠛꠤ ꠈꠣꠘ꠆ꠖꠣꠘꠞꠦ ꠀꠞꠅ ꠛꠦꠀꠟ꠆ꠟꠤꠡ ꠈꠣꠘ ꠐꠣꠃꠘ ꠖꠤꠟꠣꠁꠛꠣꠄ। 7 ꠝꠥꠐ ꠀꠐꠌꠣꠟ꠆ꠟꠤꠡ ꠈꠣꠘ ꠐꠣꠃꠘ ꠟꠦꠛꠤ ꠅꠇꠟꠞꠦ ꠖꠤꠛꠣꠄ, ꠀꠞ ꠄꠞꠟꠉꠦ ꠙꠡꠥꠞ ꠙꠣꠟ ꠞꠣꠈꠣꠞ ꠛꠘ꠆ꠖꠞ ꠎꠣꠉꠣꠅ ꠖꠤꠛꠣꠄ। 8 ꠛꠘꠤ ꠁꠍꠞꠣꠁꠟꠞ ꠎꠝꠤ-ꠎꠝꠣ ꠕꠣꠇꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠎꠦꠛꠟꠣ ꠐꠣꠃꠘ ꠅꠇꠟ ꠖꠤꠛꠣꠄ, ꠅꠃ ꠡꠝꠄ ꠢꠇꠟ ꠈꠣꠘ꠆ꠖꠣꠘꠦ ꠙꠣꠅꠀ ꠎꠝꠤꠘꠞ ꠛꠣꠐ ꠕꠣꠇꠤ ꠔꠣꠞꠣꠞꠦ ꠖꠤꠛꠣꠄ। ꠎꠦ ꠈꠣꠘ꠆ꠖꠣꠘꠦ ꠛꠦꠡꠤ ꠙꠣꠁꠍꠦ ꠄꠞꠣ ꠛꠦꠡꠤ ꠖꠤꠛꠣ, ꠀꠞ ꠎꠦꠞꠣ ꠇꠝ ꠙꠣꠁꠍꠦ ꠄꠞꠣ ꠇꠝ ꠖꠤꠛꠣ।”

9 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 10 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠥꠝꠞꠣ ꠎꠦꠛꠟꠣ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠇꠦꠘꠣꠘ ꠖꠦꠡꠅ ꠉꠤꠀ ꠢꠣꠝꠣꠁꠛꠣꠄ, 11 ꠅꠃ ꠡꠝꠄ ꠔꠥꠝꠞꠣꠞ ꠘꠤꠎꠞ ꠟꠣꠉꠤ ꠇꠄꠈꠣꠘ ꠀꠡꠞꠄ ꠐꠣꠃꠘ ꠑꠤꠇ ꠇꠞꠤꠅ। ꠔꠦꠃ ꠇꠥꠘꠥ ꠝꠣꠘꠡꠦ ꠎꠥꠖꠤ ꠀꠈꠔꠣ ꠇꠎꠣ ꠇꠞꠤꠀ ꠇꠦꠃꠞꠞꠦ ꠈꠥꠘ ꠇꠞꠤꠟꠣꠄ, ꠔꠦ ꠜꠣꠉꠤꠀ ꠢꠘꠅ ꠉꠤꠀ ꠀꠡꠞꠄ ꠟꠁꠛ। 12 ꠈꠥꠘꠞ ꠛꠖꠟꠣ ꠟꠅꠞꠣ ꠝꠣꠘꠡꠞ ꠉꠦꠍ ꠕꠣꠇꠤ ꠜꠣꠉꠤꠀ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠁ ꠀꠡꠞꠄ ꠐꠣꠃꠘ। ꠄꠔꠦ ꠛꠘꠤ ꠁꠍꠞꠣꠁꠟꠞ ꠀꠖꠣꠟꠔꠅ ꠛꠤꠌꠣꠞꠞ ꠀꠉ ꠙꠞ꠆ꠎꠘ꠆ꠔ ꠈꠥꠘꠞ ꠀꠡꠣꠝꠤꠞꠦ ꠇꠦꠃ ꠎꠣꠘꠦ ꠝꠣꠞꠣꠞ ꠡꠥꠎꠥꠉ ꠙꠣꠁꠔ ꠘꠣꠄ। 13 ꠄꠞꠟꠣꠉꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠔꠥꠝꠞꠣ ꠎꠦ ꠐꠣꠃꠘ ꠅꠇꠟ ꠖꠤꠛꠣꠄ, ꠁꠔꠣꠞ ꠝꠣꠎꠞ ꠍꠄꠈꠣꠘ ꠐꠣꠃꠘ ꠅꠁꠛ ꠔꠥꠝꠞꠣꠞ ꠀꠡꠞꠄ ꠐꠣꠃꠘ। 14 ꠄꠞꠝꠣꠎꠞ ꠔꠤꠘꠈꠣꠘ ꠐꠣꠃꠘ ꠅꠁꠛ ꠎꠞ꠆ꠖꠣꠘ ꠉꠣꠋꠉꠞ ꠙꠥꠛꠞ ꠙꠣꠞꠅ, ꠀꠞ ꠔꠤꠘꠈꠣꠘ ꠅꠁꠛ ꠇꠦꠘꠣꠘ ꠖꠦꠡꠞ ꠜꠤꠔꠞꠦ। 15 ꠅꠃ ꠍꠄꠅꠈꠣꠘ ꠐꠣꠃꠘ ꠅꠁꠛ ꠛꠘꠤ ꠁꠍꠞꠣꠁꠟꠞ ꠟꠣꠉꠤ, ꠔꠥꠝꠞꠣꠞ ꠟꠉꠦ ꠞꠅꠞꠣ ꠜꠤꠘ-ꠖꠦꠡꠤ ꠅꠇꠟꠞ ꠟꠣꠉꠤ ꠀꠞ ꠝꠥꠍꠣꠚꠤꠞ ꠅꠇꠟꠞ ꠟꠣꠉꠤ ꠀꠡꠞꠄ ꠐꠣꠃꠘ। ꠄꠞꠣꠞ ꠝꠣꠎꠞ ꠇꠦꠃ ꠎꠥꠖꠤ ꠀꠈꠔꠣ ꠛꠦ-ꠈꠤꠀꠟꠦ ꠇꠦꠃꠞꠞꠦ ꠈꠥꠘ ꠇꠞꠤꠟꠣꠄ, ꠔꠦ ꠅꠈꠣꠘꠅ ꠉꠤꠀ ꠎꠣꠘ ꠛꠣꠌꠣꠁꠛ।

16 “ꠅꠁꠟꠦ ꠇꠥꠘꠥ ꠝꠣꠘꠡꠦ ꠎꠥꠖꠤ ꠟꠥꠀꠞ ꠇꠥꠘꠥ ꠀꠔꠤꠀꠞ ꠖꠤꠀ ꠇꠦꠃꠞꠞꠦ ꠝꠣꠞꠦ ꠀꠞ ꠢꠃ ꠎꠘ ꠝꠞꠤꠎꠣꠄ, ꠔꠦ ꠅꠉꠥ ꠈꠥꠘꠤ। ꠅꠃ ꠈꠥꠘꠤꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ। 17 ꠎꠦ ꠙꠣꠔ꠆ꠔꠞ ꠖꠤꠀ ꠇꠥꠘꠥ ꠝꠣꠘꠡꠞꠦ ꠈꠥꠘ ꠇꠞꠣ ꠎꠣꠁꠛ, ꠁꠟꠣ ꠇꠥꠘꠥ ꠙꠣꠔ꠆ꠔꠞ ꠎꠥꠖꠤ ꠇꠦꠃꠞꠞ ꠀꠔꠅ ꠕꠣꠇꠦ, ꠀꠞ ꠅꠉꠥꠖꠤ ꠇꠦꠃꠞꠞꠦ ꠝꠣꠞꠣꠄ ꠢꠃ ꠝꠣꠘꠥꠡ ꠝꠞꠤꠎꠣꠄ, ꠔꠦ ꠅꠉꠥꠅ ꠈꠥꠘꠤ। ꠁ ꠈꠥꠘꠤꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ। 18 ꠝꠣꠘꠥꠡ ꠈꠥꠘ ꠅꠀꠞ ꠝꠔ ꠇꠥꠘꠥ ꠟꠣꠇꠠꠤꠞ ꠎꠤꠘꠤꠡ ꠎꠥꠖꠤ ꠇꠦꠃꠞꠞ ꠀꠔꠅ ꠕꠣꠇꠦ, ꠀꠞ ꠅꠉꠥ ꠖꠤꠀ ꠇꠦꠃꠞꠞꠦ ꠝꠣꠞꠣꠄ ꠢꠃ ꠝꠣꠘꠥꠡ ꠝꠞꠤꠎꠣꠄ, ꠔꠦ ꠅꠉꠥꠅ ꠈꠥꠘꠤ। ꠁ ꠈꠥꠘꠤꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ। 19 ꠈꠥꠘ ꠅꠀ ꠎꠘꠞ ꠀꠙꠘ ꠎꠦ ꠝꠣꠘꠡꠦ ꠁ ꠈꠥꠘꠞ ꠛꠖꠟꠣ ꠟꠅꠀꠞ ꠇꠕꠣ, ꠈꠣꠟꠤ ꠢꠦ-ꠃ ꠅꠃ ꠈꠥꠘꠤꠞꠦ ꠎꠣꠘꠦ ꠝꠣꠞꠤꠟꠤꠛ। ꠈꠥꠘꠤꠞ ꠖꠦꠈꠣ ꠙꠣꠁꠟꠦꠃ ꠔꠣꠞꠦ ꠎꠣꠘꠦ ꠝꠣꠞꠤꠟꠤꠛ।

20 “ꠀꠞ ꠁꠋꠡꠣ ꠇꠞꠤꠀ ꠎꠥꠖꠤ ꠄꠇ ꠎꠘꠦ ꠀꠞꠇ ꠎꠘꠞꠦ ꠒꠦꠇ꠆ꠇꠣ ꠝꠣꠞꠦ, ꠛꠣ ꠇꠥꠘꠥꠎꠣꠔ ꠅꠡꠔ꠆ꠞꠖꠤ ꠁꠌ꠆ꠍꠣ ꠇꠞꠤꠀ ꠁꠐꠣ ꠝꠣꠞꠦ ꠀꠞ ꠢꠃ ꠝꠣꠘꠥꠡ ꠝꠞꠤꠎꠣꠄ, 21 ꠛꠣ ꠖꠥꠡꠝꠘꠤꠞ ꠜꠣꠛꠦ ꠇꠦꠃꠞꠞꠦ ꠊꠥꠡꠤ ꠝꠣꠞꠦ ꠀꠞ ꠢꠦ ꠝꠞꠤꠎꠣꠄ, ꠔꠦ ꠎꠦ ꠝꠣꠞꠍꠦ ꠢꠦ ꠈꠥꠘꠤ। ꠁ ꠈꠥꠘꠤꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ। ꠈꠥꠘ ꠅꠀ ꠎꠘꠞ ꠀꠙꠘ ꠎꠦ ꠝꠣꠘꠡꠦ ꠁ ꠈꠥꠘꠞ ꠛꠖꠟꠣ ꠟꠅꠀꠞ ꠇꠕꠣ, ꠢꠦ ꠅꠃ ꠈꠥꠘꠤꠞ ꠟꠣꠉꠣꠟ ꠙꠣꠁꠟꠦꠃ ꠔꠣꠞꠦ ꠎꠣꠘꠦ ꠝꠣꠞꠤꠟꠤꠛ।

22 “ꠅꠁꠟꠦ ꠝꠘꠅ ꠇꠥꠘꠥ ꠖꠥꠡꠝꠘꠤ ꠘꠣ ꠞꠣꠈꠤꠀ ꠜꠥꠟꠦ ꠀꠈꠔꠣ ꠇꠦꠃꠞꠞꠦ ꠒꠦꠇ꠆ꠇꠣ ꠝꠣꠞꠟꠦ, ꠛꠣ ꠝꠘꠅ ꠇꠥꠘꠥ ꠈꠣꠞꠣꠙꠤ ꠘꠣ ꠕꠣꠇꠟꠦꠅ ꠜꠥꠟꠦ ꠔꠣꠞ ꠃꠙꠞꠦ ꠁꠐꠣ ꠝꠣꠞꠤ ꠖꠤꠟꠦ, 23 ꠛꠣ ꠘꠣ ꠖꠦꠈꠤꠀ, ꠝꠣꠘꠥꠡ ꠝꠞꠤꠎꠤꠛꠣꠞ ꠎꠥꠇꠣ ꠇꠥꠘꠥ ꠙꠣꠔ꠆ꠔꠞ ꠇꠦꠃꠞꠞ ꠃꠙꠞꠦ ꠚꠣꠟꠣꠁ ꠖꠤꠟꠦ ꠢꠦ ꠎꠥꠖꠤ ꠝꠞꠤꠎꠣꠄ, ꠔꠦ ꠇꠥꠘꠥꠎꠣꠔ ꠖꠥꠡꠝꠘꠤꠞ ꠜꠣꠛ ꠘꠣ ꠕꠣꠇꠣꠄ, ꠀꠞ ꠈꠦꠔꠤ ꠇꠞꠣꠞ ꠇꠥꠘꠥ ꠁꠌ꠆ꠍꠣ ꠘꠣ ꠕꠣꠇꠣꠄ, 24 ꠛꠘꠤ ꠁꠍꠞꠣꠁꠟꠞ ꠀꠖꠣꠟꠔꠞ ꠝꠣꠘꠡꠦ, ꠅꠃ ꠈꠥꠘꠤꠞ ꠀꠞ ꠈꠥꠘꠞ ꠛꠖꠟꠣ ꠟꠅꠞꠣ ꠎꠘꠞ ꠛꠦꠙꠣꠞꠦ ꠅꠃ ꠘꠤꠅꠝ ꠝꠣꠘꠤꠀ ꠛꠤꠌꠣꠞ ꠇꠞꠛꠣ। 25 ꠅꠃ ꠡꠝꠄ ꠀꠖꠣꠟꠔꠞ ꠝꠣꠘꠡꠦ ꠈꠥꠘꠞ ꠛꠖꠟꠣ ꠟꠅꠞꠣꠞ ꠀꠔ ꠕꠣꠇꠤ ꠈꠥꠘꠤ ꠎꠘꠞꠦ ꠛꠣꠌꠣꠁꠛꠣ, ꠛꠣꠌꠣꠁꠀ ꠢꠦ ꠀꠉꠦ ꠎꠦꠈꠣꠘꠅ ꠜꠣꠉꠤꠀ ꠉꠦꠍꠤꠟ, ꠢꠃ ꠀꠡꠞꠄ ꠐꠣꠃꠘꠅ ꠔꠣꠞꠦ ꠢꠤꠞꠛꠣꠞ ꠙꠃꠍꠣꠁ ꠖꠤꠛꠣ। ꠀꠞ ꠙꠛꠤꠔ꠆ꠞ ꠔꠦꠟ ꠖꠤꠀ ꠈꠦꠟꠣꠚꠔꠤ ꠙꠣꠅꠀ ꠙꠞꠗꠣꠘ ꠁꠝꠣꠝ ꠍꠣꠛꠞ ꠝꠃꠔꠞ ꠀꠉ ꠙꠞ꠆ꠎꠘ꠆ꠔ ꠢꠦ ꠢꠘꠅ ꠞꠁꠛ। 26 ꠅꠁꠟꠦ ꠢꠦ ꠎꠥꠖꠤ ꠇꠥꠘꠥ ꠡꠝꠄ ꠢꠃ ꠀꠡꠞꠄ ꠐꠣꠃꠘꠞ ꠛꠣꠞꠦ ꠛꠣꠞ ꠅꠁꠀ ꠎꠣꠄꠉꠤ, 27 ꠀꠞ ꠛꠖꠟꠣ ꠟꠅꠞꠣꠄ ꠔꠣꠞꠦ ꠙꠣꠁꠀ ꠎꠣꠘꠦ ꠝꠣꠞꠤꠟꠣꠄ, ꠔꠦ ꠢꠦ ꠈꠥꠘꠞ ꠖꠣꠄꠁ ꠅꠁꠔ ꠘꠣꠄ। 28 ꠇꠣꠞꠘ ꠙꠞꠗꠣꠘ ꠁꠝꠣꠝꠞ ꠝꠃꠔ ꠘꠣ ꠅꠀ ꠙꠞ꠆ꠎꠘ꠆ꠔ ꠢꠦ ꠀꠡꠞꠄ ꠐꠣꠃꠘꠅ ꠞꠅꠀꠞ ꠇꠕꠣ। ꠈꠣꠟꠤ ꠙꠞꠗꠣꠘ ꠁꠝꠣꠝꠞ ꠝꠃꠔꠞ ꠛꠣꠖꠦ ꠢꠦ ꠘꠤꠎꠞ ꠛꠣꠠꠤꠔ ꠚꠤꠞꠤꠀ ꠀꠁꠔ ꠙꠣꠞꠛ। 29 ꠔꠥꠝꠞꠣ ꠖꠦꠡꠞ ꠎꠦꠘꠅꠃ ꠛꠡꠔ ꠇꠞꠅ ꠘꠣ ꠇꠦꠘꠦ, ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠁꠔꠣ ꠝꠣꠘꠔꠦ ꠅꠁꠛ, ꠁꠔꠣ ꠔ ꠅꠁꠟ ꠔꠥꠝꠞꠣꠞ ꠡꠞꠤꠅꠔꠞ ꠄꠇꠐꠣ ꠀꠁꠘ।

30 “ꠡꠣꠇ꠆ꠇꠤꠞ ꠎꠛꠣꠘꠛꠘ꠆ꠖꠤꠞ ꠃꠙꠞꠦ ꠘꠤꠞꠜꠞ ꠇꠞꠤꠀ ꠈꠥꠘꠤꠞꠦ ꠎꠣꠘꠦ ꠝꠣꠞꠤꠟꠣꠅꠀ ꠅꠁꠛ। ꠅꠁꠟꠦ ꠈꠣꠟꠤ ꠄꠇꠎꠘ ꠡꠣꠇ꠆ꠇꠤꠞ ꠇꠕꠣꠄ ꠇꠦꠃꠞꠞꠦ ꠝꠣꠞꠤꠟꠣꠅꠀ ꠎꠣꠁꠔ ꠘꠣꠄ। 31 ꠝꠃꠔꠃ ꠎꠣꠞ ꠙꠣꠅꠘꠣ ꠡꠣꠎꠣ, ꠁꠟꠣ ꠇꠥꠘꠥ ꠈꠥꠘꠤꠞꠦ ꠇꠥꠘꠥꠝꠘ꠆ꠔꠦꠃ ꠐꠦꠇꠣꠞ ꠛꠖꠟꠣ ꠈꠣꠟꠣꠍ ꠖꠦꠅꠀ ꠎꠣꠁꠔ ꠘꠣꠄ। ꠔꠣꠞꠦ ꠎꠣꠘꠦ ꠝꠣꠞꠤꠟꠤꠔꠦꠃ ꠅꠁꠛ। 32 ꠀꠡꠞꠄ ꠐꠣꠃꠘꠅ ꠞꠅꠞꠣ ꠇꠥꠘꠥ ꠀꠡꠣꠝꠤꠞꠦ ꠐꠦꠇꠣꠞ ꠛꠖꠟꠣ, ꠙꠞꠗꠣꠘ ꠁꠝꠣꠝꠞ ꠝꠃꠔꠞ ꠀꠉꠦ ꠔꠣꠞ ꠘꠤꠎꠞ ꠛꠣꠠꠤꠔ ꠚꠤꠞꠣꠁ ꠀꠘꠣ ꠎꠣꠁꠔ ꠘꠣꠄ। 33 ꠝꠘꠅ ꠞꠣꠈꠤꠅ, ꠁꠔꠣ ꠇꠞꠤꠀ ꠔꠥꠝꠞꠣ ꠘꠤꠎꠞ ꠖꠦꠡꠞ ꠝꠣꠐꠤꠞꠦ ꠘꠣꠙꠣꠇ ꠇꠞꠤꠅ ꠘꠣ। ꠎꠣꠘ ꠔ, ꠈꠥꠘꠞ ꠟꠃꠄ ꠖꠦꠡ ꠘꠣꠙꠣꠇ ꠅꠁꠎꠣꠄ। ꠀꠞ ꠎꠦ ꠖꠦꠡꠅ ꠈꠥꠘꠞ ꠟꠃ ꠏꠞꠍꠦ, ꠢꠃ ꠈꠥꠘꠤꠞ ꠟꠃ ꠍꠣꠠꠣ ꠀꠞ ꠇꠥꠘꠥꠝꠘ꠆ꠔꠦꠃ ꠢꠤ ꠖꠦꠡꠞ ꠘꠣꠙꠣꠇꠤꠞ ꠇꠚꠞꠣ ꠅꠄ ꠘꠣ। 34 ꠀꠞ ꠔꠥꠝꠞꠣ ꠎꠦ ꠖꠦꠡꠅ ꠞꠁꠛꠣꠄ ꠀꠝꠤꠅ ꠔ ꠢꠘꠅ ꠞꠁꠝꠥ, ꠄꠞꠟꠣꠉꠤ ꠁ ꠖꠦꠡꠞꠦ ꠘꠣꠙꠣꠇ ꠛꠣꠘꠣꠁꠅ ꠘꠣ। ꠇꠣꠞꠘ ꠀꠝꠤ ꠝꠣꠛꠥꠖ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠛꠡꠔ ꠇꠞꠤ।”