1 ꠁꠃꠍꠥꠚ ꠘꠛꠤꠞ ꠀꠅꠟꠣꠖꠞ ꠈꠣꠘ꠆ꠖꠣꠘ ꠅꠇꠟ ꠕꠣꠇꠤ, ꠝꠣꠘꠡꠣꠞ ꠘꠣꠔꠤ ꠝꠣꠈꠤꠞꠞ ꠙꠥꠀ ꠉꠤꠟꠤꠅꠖ ꠉꠥꠡ꠆ꠐꠤꠞ ꠘꠣꠘꠣꠘ ꠙꠞꠤꠛꠣꠞ ꠕꠣꠇꠤ ꠝꠥꠞꠛ꠆ꠛꠤ ꠅꠇꠟ ꠀꠁꠟꠣ, ꠀꠁꠀ ꠔꠣꠞꠣ ꠝꠥꠍꠣ ꠘꠛꠤ ꠀꠞ ꠛꠘꠤ ꠁꠍꠞꠣꠁꠟꠞ ꠘꠣꠘꠣꠘ ꠉꠥꠡ꠆ꠐꠤꠞ ꠡꠞ꠆ꠖꠣꠞ ꠅꠇꠟꠞ ꠟꠉꠦ ꠝꠣꠔꠤꠟꠣ। 2 ꠇꠁꠟꠣ, “ꠝꠣꠛꠥꠖꠦ ꠀꠝꠞꠣꠞ ꠁ ꠝꠣꠟꠤꠇꠞꠦ ꠢꠥꠇꠥꠝ ꠖꠤꠍꠟꠣ, ꠟꠐꠣꠞꠤ ꠝꠣꠞꠤꠀ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠖꠦꠡꠞ ꠎꠣꠉꠣ-ꠎꠝꠤꠘ ꠛꠣꠐꠤꠀ ꠖꠤꠔꠣ। ꠖꠤꠛꠣꠞ ꠡꠝꠄ ꠀꠝꠞꠣꠞ ꠜꠣꠁ ꠎꠟꠣꠙꠈꠣꠖꠞ ꠎꠝꠤ-ꠎꠝꠣ ꠈꠣꠘꠣꠁꠘ ꠔꠣꠞ ꠙꠥꠠꠤꠘ꠆ꠔꠞꠦ ꠖꠤꠛꠣꠞ ꠢꠥꠇꠥꠝ ꠖꠤꠍꠂꠘ। 3 ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠖꠥꠍꠞꠣ ꠇꠥꠘꠥ ꠈꠣꠘ꠆ꠖꠣꠘꠞ ꠝꠣꠘꠡꠞ ꠟꠉꠦ ꠎꠥꠖꠤ ꠅꠃ ꠙꠥꠠꠤꠘ꠆ꠔꠞ ꠛꠤꠀ ꠅꠄ, ꠔꠦ ꠀꠝꠞꠣꠞ ꠛꠣꠚ-ꠖꠣꠖꠣꠞ ꠍꠣꠝꠣꠘꠣ ꠕꠣꠇꠤ ꠔꠣꠞꠣꠞ ꠍꠣꠝꠣꠘꠣ ꠛꠣꠞ ꠅꠁꠀ ꠉꠤꠀ, ꠔꠣꠞꠣꠞ ꠎꠣꠝꠣꠁꠞ ꠈꠣꠘ꠆ꠖꠣꠘꠞ ꠎꠝꠤ-ꠎꠝꠣꠔ ꠢꠣꠝꠣꠁꠎꠤꠛ, ꠄꠔꠦ ꠀꠝꠞꠣꠞ ꠈꠣꠘ꠆ꠖꠣꠘꠞ ꠎꠝꠤ-ꠝꠤꠞꠣꠡꠞ ꠇꠤꠍꠥ ꠅꠋꠡ ꠇꠝꠤꠎꠤꠛ। 4 ꠛꠘꠤ ꠁꠍꠞꠣꠁꠟꠞ ꠎꠝꠤ-ꠝꠤꠞꠣꠡ ꠚꠤꠞꠔ ꠙꠣꠅꠀꠞ ꠢꠃ ꠙꠛꠤꠔ꠆ꠞ ꠙꠁꠘ꠆ꠌꠣꠡ ꠛꠍꠞꠞ ꠇꠣꠟꠅ, ꠔꠣꠞꠣꠞ ꠎꠝꠤ-ꠎꠝꠣ ꠉꠤꠀ ꠔ ꠔꠣꠞꠣꠞ ꠎꠣꠝꠣꠁꠞ ꠈꠣꠘ꠆ꠖꠣꠘꠞ ꠍꠣꠝꠣꠘꠣ ꠅꠁꠎꠤꠛ। ꠅꠃ ꠟꠣꠈꠣꠘ ꠀꠝꠞꠣꠞ ꠛꠣꠚ-ꠖꠣꠖꠣꠞ ꠎꠝꠤ-ꠝꠤꠞꠣꠡ ꠕꠣꠇꠤ ꠔꠣꠞꠣꠞ ꠅꠋꠡ ꠛꠣꠞ ꠅꠁꠀ ꠎꠣꠁꠛꠉꠤ।”

5 ꠁꠈꠣꠘ ꠢꠥꠘꠤꠀ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠁꠃꠍꠥꠚꠞ ꠀꠅꠟꠣꠖꠞ ꠅꠃ ꠈꠣꠘ꠆ꠖꠣꠘꠞ ꠝꠣꠘꠡꠦ ꠎꠦꠔꠣ ꠇꠁꠞꠣ, ꠁꠔꠣ ꠔ ꠢꠣꠍꠣ। 6 ꠄꠞꠟꠣꠉꠤ ꠎꠟꠣꠙꠈꠣꠖꠞ ꠙꠥꠠꠤꠘ꠆ꠔꠞ ꠛꠦꠙꠣꠞꠦ ꠝꠣꠛꠥꠖꠦ ꠢꠥꠇꠥꠝ ꠖꠤꠞꠣ, ꠔꠣꠞꠣ ꠎꠣꠞꠦ ꠙꠍꠘ꠆ꠖ ꠇꠞꠂꠘ ꠔꠣꠞ ꠉꠦꠍꠦꠃ ꠛꠤꠀ ꠛꠁꠔꠣ ꠙꠣꠞꠛꠣ। ꠅꠁꠟꠦ ꠡꠞ꠆ꠔ ꠅꠁꠟ, ꠔꠣꠞꠣꠞ ꠛꠣꠚꠞ ꠈꠣꠘ꠆ꠖꠣꠘꠞ ꠜꠤꠔꠞꠦ ꠛꠤꠀ ꠛꠁꠔꠦ ꠅꠁꠛ। 7 ꠛꠘꠤ ꠁꠍꠞꠣꠁꠟꠞ ꠎꠝꠤ-ꠝꠤꠞꠣꠡ ꠄꠇ ꠈꠣꠘ꠆ꠖꠣꠘ ꠕꠣꠇꠤ ꠀꠞꠇ ꠈꠣꠘ꠆ꠖꠣꠘꠅ ꠎꠣꠁꠔ ꠙꠣꠞꠔ ꠘꠣꠄ। ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇ ꠎꠘꠦ ꠔꠣꠞ ꠛꠣꠚ-ꠖꠣꠖꠣꠞ ꠎꠝꠤ-ꠝꠤꠞꠣꠡ ꠛꠣꠌꠣꠘꠤ ꠟꠣꠉꠛ। 8 ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇꠦ ꠎꠣꠔꠦ ꠔꠣꠞꠣꠞ ꠛꠣꠚ-ꠖꠣꠖꠣꠞ ꠉꠦꠍ ꠕꠣꠇꠤ ꠙꠣꠅꠀ ꠎꠝꠤ-ꠎꠝꠣꠞ ꠝꠣꠟꠤꠇꠣꠘꠣ ꠐꠤꠇꠣꠁ ꠞꠣꠈꠔ ꠙꠣꠞꠦ, ꠅꠔꠣꠞ ꠟꠣꠉꠤ ꠙꠞꠔꠦꠇ ꠈꠣꠘ꠆ꠖꠣꠘꠞ ꠎꠝꠤ-ꠎꠝꠣꠞ ꠝꠣꠟꠤꠇꠣꠘꠣ ꠙꠣꠅꠀ ꠙꠥꠠꠤꠘ꠆ꠔꠦ ꠔꠣꠞꠣꠞ ꠛꠣꠚꠞ ꠈꠣꠘ꠆ꠖꠣꠘꠞ ꠘꠡꠣꠞ ꠉꠦꠍꠦ ꠛꠤꠀ ꠛꠁꠔꠦ ꠅꠁꠛ। 9 ꠄꠇ ꠈꠣꠘ꠆ꠖꠣꠘ ꠕꠣꠇꠤ ꠀꠞꠇ ꠈꠣꠘ꠆ꠖꠣꠘꠅ ꠇꠥꠘꠥ ꠎꠝꠤ-ꠎꠝꠣ ꠎꠣꠁꠔ ꠘꠣꠄ। ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇ ꠈꠣꠘ꠆ꠖꠣꠘꠦ ꠔꠣꠞꠣꠞ ꠎꠝꠤ-ꠎꠝꠣꠞ ꠝꠣꠟꠤꠇꠣꠘꠣ ꠗꠞꠤꠀ ꠞꠣꠈꠔꠦ ꠅꠁꠛ।”

10 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠎꠟꠣꠙꠈꠣꠖꠞ ꠙꠥꠠꠤꠘ꠆ꠔꠦ ꠅꠟꠣ ꠝꠣꠘꠟꠣ। 11 ꠔꠣꠞꠣꠞ ꠛꠣꠚꠞ ꠈꠣꠘ꠆ꠖꠣꠘꠞ ꠜꠣꠁꠀꠁꠘ꠆ꠔꠞ ꠉꠦꠍꠦ ꠛꠤꠀ ꠛꠁꠟꠣ। ꠎꠟꠣꠙꠈꠣꠖꠞ ꠙꠥꠠꠤꠘ꠆ꠔꠞ ꠘꠣꠝ ꠅꠁꠟ, ꠝꠢꠟꠣ, ꠔꠤꠞꠎꠣ, ꠢꠉꠟꠣ, ꠝꠤꠟꠇꠣ, ꠀꠞ ꠘꠥꠀ। 12 ꠁꠃꠍꠥꠚꠞ ꠙꠥꠀ ꠝꠣꠘꠡꠣꠞ ꠈꠣꠘ꠆ꠖꠣꠘꠞ ꠉꠥꠡ꠆ꠐꠤ ꠅꠇꠟꠞ ꠝꠣꠎꠦꠃ ꠔꠣꠞꠣ ꠛꠤꠀ ꠛꠁꠟꠣ।

13 ꠀꠞ ꠢꠥꠘꠅ, ꠎꠤꠞꠤꠢꠅ ꠄꠟꠣꠇꠣꠞ ꠎꠞ꠆ꠖꠣꠘ ꠉꠣꠋꠉꠞ ꠗꠣꠞꠅ ꠝꠥꠀꠛ ꠖꠦꠡꠞ ꠔꠟ ꠎꠣꠉꠣꠔ, ꠝꠣꠛꠥꠖꠦ ꠝꠥꠍꠣ ꠘꠛꠤꠞ ꠝꠣꠎꠖꠤ ꠛꠘꠤ ꠁꠍꠞꠣꠁꠟꠞꠦ ꠅꠃ ꠢꠥꠇꠥꠝ-ꠀꠢꠇꠣꠝ ꠀꠞ ꠘꠤꠅꠝ-ꠇꠣꠘꠥꠘ ꠅꠇꠟ ꠖꠤꠍꠟꠣ॥