2
Bupinguzi bwakua Yawe
1 Lizie ntandala mu Sayuni,
Punde pa lupili lwane luzuuke.
Bekala kyalo bonse batutume
pantu busiku bwakua Yawe bwapalama, pasia bufike.
2 Bwaakaba busiku bwa nfinzi ni bulanda,
busiku bwa malezi ni kifutika.
Nga vilivyakumana kakula mwaya mpili,
i vilimukwiza ni kisepe kya maka kya luzie.
Kutula pa kale tepanakitike kintu nga keki,
kabili tekikabako ku nvyalo ilimukwiza.
3 Ku ntanzi ya luzie, mulilo ulimukuzizia.
Ku kyamba, libeebe lilimukutuutuuka.
Ku ntanzi ya luzie, kyalo kili nga bukaba bwa mu Edeni.
Ku kyamba kya luzie, kuli nga kaseeba ka kutiinia.
Tekuli kyaapusukile pasili kwinoonua na luzie.
4 ✡2.4: Nfy 9.7-9Nmonekelo ya lolo luzie luli nga farasi.
Lwendele lubilo nga baseli ba pa farasi.
5 Ni katuuto nga katuuto ka matyakala a bului,
koku lwalimukusontoka peulu lupili
lwatuuta nga libebe lilimukuzizia bikusi byume,
nga balukale ba maka batanteeme ku bului.
6 Musita ululilwamoneka, ntundu iliyatiina.
Kubalua muntu aliwatooboka.
7 Lolu luzie lulilwasakukila nga bantu ba bului.
Lulilwasela mu bibumba nga balukale.
Lonse lulilwasela mu milongo
pasili kusalanghana mu milongo.
8 Lulilwaya pasili kutintana.
Kubalua luzie lulilwaya lwalungheeme ku ntanzi.
Lulilwapulania lusako
pasili kusalanghana mu milongo.
9 Lulilwaya mu muzi lwali lubilo.
Lulilwakunduka mu bibumba.
Lulilwaingila mu nghanda.
Lulilwaingila kupitila mu nzota nga bakabooko.
10 ✡2.10: Nfy 8.12Ntanzi ya luzie, kyalo kiliyakwaka.
Myulu iliyasunkeena.
Koba ni kwezi bilibya-aluka nfinzi.
Ntanda ni yo iliyazima.
11 ✡2.11: Nfy 6.17Yawe wa-ana libumba lya balukale bakue walimukubuluma.
Balukale bakue tebezi kupendeka.
Kuluma kuli ku balia balukale,
balukale banakiile mafunde akue.
Busiku bwakua Yawe bwaviizie,
bwene busiku bwa kutiinia.
Kubako nani alikuvinda kubusipikizia?
Lwito lwa bulapilo
12 Yawe walanda evi,
“Lapile na mitima yenu yonse mun'mbwelele.
Iizilike mulile ni kuloosia.
13 Kaate mitima yenu mu kulanga bulanda,
tekuba ngubo yenu.”
Mubwelele Yawe Leza wenu
wene ali ni buwame pamo ni nkumbu.
Wene tezi kulenga kufiitua, ali ni ntono ingi,
aliwaeleela lyonse, ni kuya wali lebe mu kukanda.
14 Nani amanine nangue Yawe Leza wenu kuti wa-alulula malanga akue?
N'manine nangue Yawe kuti wamipaala na kumipeela buzombozi bwingi,
evi ni mwe mumwelele nghano ni bya kumina.
15 Lizie ntandala mu Sayuni,
punde kuizilika kuzuuke,
kuute libumba lilonghaane.
16 Kolonghanie bantu.
Zuukie libumba,
kolonghanie bakote,
kolonghanie baana,
balia bakilibaonka.
Syabuinga afume mu muputule wakue,
nabuinga ni ye afume mu muputule wakue.
17 Balia babitambua balibabomba ntanzi yakua Yawe,
balile pa bukata bwa nghingililo ya Nghanda yakua Leza ni kitale.
Balande nangue, “We Yawe eleela bantu bobe.
Tekulekelela bupyani bobe kuleebulua na twebo twa kapuni pa ntundu.
Ale ni kiki kibalikulandila pa bantu nangue,
‘Leza wabo ali pi?’ ”
Bwasuko bwakua Yawe
18 Pa kyamba, Yawe waunvwiliile bunkua kyalo kyakue,
ni kunvwila nkumbu bantu bakue.
19 Yawe waabaasukile evi,
“Unvue, nakaba kumitumina bilio,
divai ya lenu pamo ni mafuta a mizeituni,
bebio byakaba kumiikusia ni kumiwamina.
Nsikikamilekelela kuleebulua na ntundu inge.
20 Nakaba kufumia kisepe kya luzie kifumine ku nkungua
ni kukikumbila kule lya ku kaseeba mu musili uume.
Luzie lwakaba lwali mu milongo lya ku ntanzi ku kabanga, naakalupooza mu Lyezi lya Mukele,
lolia lwaakaba lwali ku kyamba lya ku mboosi naakalupooza mu Lyezi lya Mediterania.
Luzie lufwile lwakaba kufumia bunu bubiipile,
ni kununka kwa lolo luzie kwaakasalanghana.”
Kisinka Yawe wakikita bintu bikata!
21 “We kyalo kya Yudea tekutiina.
Waminua usangalale.
Kisinka Yawe wakikita bintu bikata!
22 Mwe binama bya mu kisonso tekutiine
pantu bikusi bya mu kisonso byavumba paakale.
Bimuti byabamba kuseekako mazabo.
Bimuti bya miku pamo ni mizabibu byatwamako mazabo engi.
23 “Sansamuke mwe bantu ba mu Sayuni.
Sangalale muli Yawe Leza wenu
pantu wakimipeela nvula ya muloboko.
Wene ni wa kisinka.
Aliwaminokiizia nvula ya muvumbi,
nvula ya muloboko ni ya kawalala nga viyaali yanoka pa mambo.
24 Nghano yaakeezula pa tubanga twa kupupiiziapo.
Ngeso yaakeezulamo divai ya lenu pamo ni mafuta a mizeituni.
25 Ne Yawe naakamibweziizia belia byaalilue na luzie mu myaka yaapitile,
byaaliilue na luzie ni balyambala pamo ni mifwinzi,
kisepe kyane kikata kinaatumine pakati kenu.”
26 Mwaakaba ni bilio bingi bya kulia ni kwikuta.
Mwaakamutasia Yawe Leza wenu,
Yawe waamikitiile tupapo.
Bantu bane tebakikamoniwa busoni.
27 Papo i pamwaakamana nangue ndi pamo nenu mu Izraeli.
Mwaakamana nangue nene ndi Yawe Leza wenu,
kabili tekuli unge.
Bantu bane tebakikamoniiwa busoni.
Bulayo bwa Mweo Muzuuke
28 ✡2.28: Mii 2.17-21“Pa kyamba, naakakoosia Mweo wane pa bantu bonse.
Baana benu balalume ni banakazi baakabikula.
Bakote benu baakaloota bilooto,
ni balumendo benu baakamona bimonua.
29 Pa babombi bane balalume ni banakazi ni po
mu ezio nsiku naakakoosiiziapo Mweo wane.
30 “Naakalanga tulangi mu myulu ni pa kyalo,
mulopa ni mulilo pamo ni mapumpu a kyunsi kitikeeme.
31 ✡2.31: Mat 24.29; Mk 13.24-25; Lk 21.25; Nfy 6.12-13Koba kaakaalulua nfinzi,
ni kwezi waakakasika nga mulopa,
ntanzi ya kwiza kwa bobo busiku bukata bwa kutiinia bwakua Yawe.
32 ✡2.32: Bar 10.13Inzi kubalua muntu aliwakuuta
mu liina lyakua Yawe waakapususiiwa.
Pantu peulu Lupili lwa Sayuni ni mu Yeruzalemu,
mwaakaba bupusuko nga mwaalandiile Yawe
palua balia baapusukile,
baakuutilue na Yawe.”