3
Kupingulua kwa ntundu
1 “Mu ezio nsiku ni pa ozo musita,
musita unaakabwezia bunonsi kuli Yuda ni kuli Yeruzalemu,
2 naakakolonghania mabumba a balukale ba ntundu yonse,
naakabakoosiizia mu lulambe lwa Yehoshafati,
momo i munaakabapingula.
Naakabapingula pa mulandu wa bikitua bibaakitiile bantu bane, Baizraeli,
pantu baasalanghaniizie bantu bane mu ntundu inge ni kukasania kyalo kyane.
3 Baateele bubale pa mulandu wa bantu bane.
Baasuluziizie balumendo kuti basangemo nfolanga ya kuonga bakambue banakazi.
Baasisiizie bakazyana kuti basangemo nfolanga ya kusitamo divai ya kumina.
4 ✡3.4: Isa 14.29-31; 23.1-18; Yer 47.1-7; Eze 25.15-17; 26.1-21; 27.1-36; 28.1-26; Amo 1.6-10; Zef 2.4-7; Zak 9.1-7; Mat 11.21-22; Lk 10.13-14“Ati, mwe bantu ba mu Tiro, ni ba mu Sidona pamo ni kyalo kyonse kya Bafilistini, mulimwankebaki? Mulimukukeba kulandula pa kintu kinakikita? Kine i evio, nene nsikaba kukokola kumibweziizia kilanduzi kukonkana ni vimwakikita. 5 Pantu mwaatweme mutofue ni oro yane, kabili mwaatweme ni kipao kyane kiwamiisie mwaya kutwala mu nghanda ya baleza benu. 6 Mwaasisiizie bantu ba mu Yudea ni ba mu Yeruzalemu ku Bayunani, evi mubatwale kule ni kyalo kyabo. 7 Inzi nakaba kubafumia ku nkendo yonse kumwaile kubasisia, mane nkabe kulandula kuli mwemue pa bintu byonse bimwaakitile. 8 Naakabasisia baana benu balalume ni banakazi ku Bayuda, ni bo bakabasisie ku bantu ba ku Seba, ntundu ikeele kule.” Evi i vyalanda Yawe.
9 “Pundile ntundu mwalanda:
Iiteanie kuya ku bului!
Kuute balukale!
Palamike babipami baye ku kusakukila.
10 ✡3.10: Isa 2.4; Mik 4.3Alule nkasu yenu kuba bipanga,
ni bikwakua byenu kuba mikuuki.
Olia anakile alande nangue,
‘Ndumine!’
11 Mwe ntundu yonse ili koku ni koku,
lenge mwize mukolonghane mu lulambe lwa Yehoshafati.”
We Yawe, koosia babipami bobe!
12 “Ane ntundu iye,
iye ikookele lya ku lulambe lulilwakuutua Yehoshafati,
pantu koko i kundikuya kwikala,
ni kupingula ntundu yonse ili koku ni koku.
13 ✡3.13: Nfy 14.14-16; 14.19-20; 19.15Ale twame bikwakua
pantu musita wa kuzombola wa kumana.
Ize mutike mizabibu
pantu mu kitikilo kya mizabibu mwaizula.
Nsupa yaizula ni kusempuka
pantu bubi bwabo bwatanisia.”
14 We libumba bukata! We libumba bukata
mu lulambe lwa bupinguzi!
Pantu busiku bwakua Yawe bwapalama
mu lulambe lwa bupinguzi.
15 Koba ni kwezi byaakaaluka nfinzi,
ni ntanda teikikasanikila.
Leza wapaala bantu bakue
16 ✡3.16: Amo 1.2Yawe waakabuluma mu Sayuni
ni lizui lya mutukumo lyaakonvwika mu Yeruzalemu,
kyalo ni myulu byaakasunkeena,
inzi Yawe waakaba kyubo kya bantu bakue,
ni kikingililo kya mponvu ku Baizraeli.
17 “I pa mwaakeenika nangue nene Yawe Leza wenu
ngikeele mu Sayuni, lupili lwane luzuuke.
Yeruzalemu waakaba wazuukile muyayaya,
ni baeni tebakikavinda kumwanzia.
18 “Mu bobo busiku mpili yaakatoonia divai ya lenu.
Tupili twaakazuumia mabeele.
Menda aakaba apita mu tunkolonfua tonse twa mu Yudea.
Kasulo ka menda kaakaba kafuma mu Nghanda yakua Yawe ni kuleeta kinwanvi mu lulambe lwa Shitimu.
19 “Inzi mu Misri mwaakaaluka kibolia,
mu Edomu mwaakaaluka kaseeba
pantu baasanzile Bayuda,
ni kwitila mulopa usili na mulandu mu kyalo kyabo.
20-21 Mu Yudea ni mu Yeruzalemu
mwaakeekalua muyayaya.
Kubako naakandua kukanda bantu baitilile mulopa wa bantu bane?
Abe sie, nsika-andua.
Nene ndi Yawe ekeele mu Sayuni!”