PETER
PETER LEKHA THOT NINA
A let aloupina hettohsah ho
Yeshua hung teiding ahin, kigosademin um'in!
2 Peter lekhabu sung thu umdan
Tulai phat tobang hin, Peter in hiche lekhathot ajih phatlai chun Houbung to kithujah mat tona dihlou neitheina ana bailam lheh jengin, boi umtah anahi. Hijeh chun Peter lekhathot nina hi tulaija dingin demtheitah, kinelna theileu ahi. Peter amatah hin Pakai Yeshua, “Alet Aloupina kidan thudol,” 2 Pet 1:16, amittah'a anamusa ahi Matt 17:1-2. Chule Peter hin chuche phat laiya tahsan chate ho henga chu lhepna a lhah louding ahilouleh Gospel thu nungsun lou ding thua tilkhouna anei ahi. Chule Yeshua hungkit ding ahijeh'a thenna hinkho man ding ti, thudol-a tilkhouna anei ahi. Yeshua huhhingpu ahina thudol gunchu tah'a miho seipeh hin Yeshua hung ding akimano sah ding ahi, ati 2 Pet 3:12. Pakai Yeshua ahung gei hi mi tampi ahuhhingna thupha seipehna ding chanpha eikipeuva ahi. Ajeh chu aman koima amahthah ding adeipoi 2 Pet 3:9. Eihon midang Pathen to ikichamsah tenguleh Pathen lunggel hatah'a kipasah jouna ineithei diu ahi, ti akicheh in ahi.
Lekhathot jihpa chule ajih kum
Solchah Peter in Rome khopia kon'a ajih ahi, hichu AD 67 ahilouleh 68 kum'a ajih hinte, akiti.
Lekhabu kijihna lo
Tulaiya Turkey tia kihe Asia Minor gam'a tahsan chate cheh chau ho henga ajih ahi. Amaho hi thuhil lhem'a kona kichih theina diu le thutah'a adindetna diuva, aseipeh ahi.
Athusim phatlai umdol
Hiche lekhathot Peter in ajih pet'a hi Nero Lengpa Rome khopia Laltouna'a atoupet ahi. Nero hi chonlambei, migilou le phaloutah, gamsung ding le Houbung thahleh kiphut dinga chu hahsatna ahi. Chuleh thusei them ahivanga, thuhil dihlou kitiho jong chu Houbung dinga lhagaova kiloikhomna sunoh phahthei tampi anaum ahi.
1
Salam Thu
1 Hiche lekhathot hi Yeshua Christa soh le solchah, Simon Peter a kon ahi. Keiman tahsan manlu tah kanei khompi ho henga kahin jih ahi. Hiche tahsan hi thutandih le pha nahin peuva eihuhhing uva le IPathenu Yeshua Christa jal jeh ahi. 2 Nanghon Pathen le IPakaiyu Yeshua nahet nau lama nakhantouna dingun Pathen in nangho lungset le cham-lungmon napeh be jingu hen.
Tahsan a khan ding
3 Aman Pathena kona thahatna anei jal'in, Pathen ngaisahna hinkho iman theina dinguvin Aman ingaichat jouseu eipetauve. Ama dinga eikoupau hin Ama hetna ineiyuva kona Aloupina kidangtah le ahoipen hina jal'a eihon hicheho jouse hi ikisanu ahi. 4 Chule aloupina le ahoipen hina jal'in Aman thutep lentah le manlutah eipetauve. Hiche athutep ho hi Pathen ahina a chan neikhompina le mihem lung ngaichat vannoi kisuhbohna a kona onthol theina ahi. 5 Hicheho jouse jal hin, Pathen thutep ho channa dingin kihabol un, natahsan nau chu umchanhoi pendoh nan neiyun, chule umchanhoi penna chun hetna, 6 chule hetna chun chang kitim themna, chule chang kitim themna chun thohhatna chule thohhatna chun Pathen ngaisahna, 7 chule Pathen ngaisahna chun sopi hina a kigelkhoh tona a amichang cheh ngailutna sodoh hen. 8 Hitia nakhan toube cheh nauva chu, IPakaiyu Yeshua Christa hetna a chu gasoa chule phatchomna nanei dingu ahi. 9 Hinlah hichea khantouna neilou ho chun chomcha ding bou amuu ahilouleh mitchouva, amaho achonsetnau masaa kona chu kisilngima ahiu asuhmil jiu ahitai. 10 Hitichun sopi deitahte, nanghon Pathen in nakouvu adeilhenna a chu najaovu ahi photchennan, kiseh in tonggimun. Hiche hohi bolleu chun, nangho nalhah manglou hel diu ahi. 11 Chutengleh Pathen in IPakaiyu le Huhhingpu Yeshua Christa tonsot Lenggama luttheina dia phalna namu dingu ahitai. 12 Hiche jeh'a chu, hiche ho thudol hi keiman avel a kageldoh sahkit jing ding nahiuve-nangho hichu nahetsau le hiche thutah nakihil sauva chu nadin det u ahitai. 13 Chule hichebou hi adih chu ahin, keiman kahinlai sunga kavel geldoh sah jing ding nahiuve. 14 Ajeh chu, IPakaiyu Yeshua Christa chun hiche leiset hinkho hi kadalhah vahding ahitai ti eiseipeh ahitai. 15 Hitia hi keima kache nung jong leh hiche hohi nana geldoh jingna dinguva keima kiseh tah a pang jing ding kahi.
Mimal tah'a Christa loupina kimu
16 Ajeh chu keihon IPakaiyu Yeshua Christa thaneitah a ahung thudol nangho kaseipeh u chun semthu thusim seiya kanahi pouve. Keihon aloupina gunchena bulhingset kamit tah uva kana mu u chun, 17 Pa Pathena kona jana le loupina Aman anamu ahitai. Pathen loupi thaneinaa aw chun ajah a, “Hiche hi keiman kangailut tah, kipana sangtah eipea ka Chapa ahi,” ati.✡Matt 17:1-5; Mk 9:2-7; Lk 9:28-35 18 Keihotah in Amatoh moltheng chunga kaumpet'un vana kon in hiche aw chu kajauvin ahi. 19 Hiche hetchetna neijal hin, keihon themgao ho thupoh kaseiphongu hi kakihason chehna theiyu aumin ahi. Amahon ajih u thudol hi phatah a vetsuina naneiyu angaiye, ajeh chu athuseiyu hi muthimlah a meivah kidevah tobanga, kho ahungvah lhah kahsea, chule Christa Jing Valpa chu nalung sunguva kona ahung vahdoh kahsea ding ahi. 20 Hicheho jouse chunga hin, Pathen Lekhabua themgao thusei dohho hi themgao ama hetna lungthima hungpeng ahipoi, ti nahetdoh'u ngai ahi. 21 Ahilouleh mihem lung gela kona jong ahipoi, chuche themgao ho chu Lhagao Thengin athunun uva, chule amahon Pathena kona aseidoh u ahi.
DRAFT COPY