6
Darius Lengpan Phalna Apeh
1 Hijeh chun Darius lengpan jong thu apen, Babylon gamsunga lengte thusim kisutlutna a chun akholsah tan ahi. 2 Hiti chun ahin khol’un ahileh Media gamkol sunga Ecbatana kulpia chun lekhajol khat hi amudoh tauvin ahi. Hichea chun hiti hin akijih in ahi:
“Melchihna:
3 “Cyrus Lengpa vaihom kumkhat channa in, Jerusalem’a Pathen Hou-In thudol'ah thugahna athot doh in ahi.
Jews ten kilhaina gantha leh pumgo thilto atonajiu mun achun Hou-In chu kithah sahkit hen. In sandol chu feet somko, chule availam jong feet somko ma hihen. 4 Songtum lentah tah gol thum'in kigol henlang chuleh thingtum jong golkhat in kigol hen. Natohna a lut ho jouse chu lengte sumkhol na a konna kimang cha ding ahi. 5 Chuleh Jerusalem khopia Pathen Hou-In muntheng phunga konna sana le dangka khon le lheng Nebuchadnezzar in ana pohmanga Babylon a anakoi ho chu nung pohlut cheh kit ding ana kikoina mun ma-ma a chu koikit ding ahi. Hiche ho jouse chu Pathen Hou-In'a kinung pohlut kit ding ahi,” akitin ahi.
6 Hijeh chun Darius lengpan hiti hin thu ale thot tan ahi:
“Tun hiti ding ahi, Euphtates vadung lhumlam gamkaija gamvaipo Tattenai leh Shethar-bozenai, chuleh Euphrates vadung lhumlam gamkaiya vaipoho lah a natoh khompi, nangho kikang seuvin! 7 Pathen'in asah nauva chun suboi hihbeh un. Hiche Hou-In chu ana kisah patna mun ma-ma a chu asah phat kit diu ahi. Judah gam vaipopa ahin natoh vaihom Judah upaho ahin sutang hihbeh un.
8 Hiche chungchon chun hiche Pathen Hou-In asah nauva hin Judah upaho hi kithopi uvin tia hiche thupeh hi kahin peh nahiuve. Euphrates vadung lhumlam gamkaisea kidong doh kai ho chu hiche ain sahnau manna chu geisang louva na pehdoh jeng diu hiche anatoh uhi nasuhboi louhel diu ahi.
9 Jerusalem’a thempu hon van Pathen'a atodoh diuva bongchal nou hihen, kelchal hihen, kelngoi chal hijongleh angaichat dungjui uva napeh jeng diu ahi. Chuleh niseh leh ama hon angaichat dung jui uva suhlou chang hihen, chule lengpitwi hijongleh, olive thao hijongleh, angaichat chan'u chu napeh jeng diu ahi. 10 Hiteng chuleh ama hon van Pathen'in asan theidol kilhaina chu tohdoh untin chuleh lengpa le achate damtheina le phattheina dinga ahin taopeh diu ahi.
11 Hiche ka dan thupeh hi asukeh aum leh a insunga kon'in alhungpi kibotdoh intin, chutengleh hichea chun ama kikanbeh intin kivo ding chuleh a in chu vutvai kiso ding ahi. 12 Hiche Jerusalem khopi hi ama min loupina dinga hin lhaang doh Pathen chun hiche thupeh hi palkeh a chuleh hiche Hou-In hi susea aum leh hitobang leng ahilouleh hitobang nam mi chu kisumang ding ahi.
Darius keiman hiche dan hi kasem doh ahin hiche hi mijousen phatah in juisohkeihen,” tin thu ale thotkit tan ahi.
Hou-In Kithenso
13 Euphrates vadung lhumlam gamkaija gamvaipopa leh Shethar-bozenai leh atoh khompi hon gangtah in Darius lengpa thupeh chu ajuipai jengun ahi. 14 Judah upaho chun atoh uchu ajom jengun themgao teni Haggai leh Iddo chapa Zechariah thuhil’a kon'in akiha tilkhou lheh jengun ahi. Hou-In chu Israel Pathen'in athupeh dungjui leh Persia lengho Cyrus, Darius, Artaxerxes in dan anasem dungjuijun asachai tauvin ahi. ✡Haggai 1:1; Zechariah 1:1 15 Pathen Hou-In chu Darius lengpa vaihom kum gup channa Lhakao 12 lhinni in achai tauvin ahi.
16 Pathen Hou-In chu Israel mipite, thempu te, Levi te chuleh asoh chan nauva konna hung kile hotoh kipa thanopna sangtah pum'in alopna asem uvin ahi. 17 Hiche Pathen Hou-In todohna a hin bongchal 100, kelngoichal 200, chuleh kelngoi 400 akithat in ahi. Chuleh Israel pumpi phung som le ni chonset thoidamna dingin kelchal 12 ana tohdoh un ahi. 18 Hiche jou chun thempu ho leh Leviho chu jat chom-chom’in ahom khen’un Mose Lekhabua kijih bangin Jerusalem’a Pathen Hou-In’ah Pakai kin abol'un ahi.
Kalchuh Kut Aman U
19 Lhatun 21 nikhon sohchang hung kile hon Kalchuh Kut amangun ahi. ✡Potdohbu 12:1-20 20 Hichun thempuho le Levi te chu amaho leh amaho akithenso cheh tauvin athengin aum tauvin ahi. Hichun ama hon sohchang hung kile ho ding leh athempu chanpi ho ding chule amaho a dingin Kalchuh Kut manna dingin kelngoi athat un ahi. 21 Hiche Kalchuh Kut chu sohchang hung kile kit Israel chate jousen aneuvin, chutengleh thilboh chengsea konna kikangsea Pakai kin bolna a hung kipelut hon jong aneuvin ahi. 22 Hiti chun Israel ten nisagi sungin cholsolou Changlhah Kut kipah thanom tah in amangun ahi. Gamsung pumpia chun kipana le thanopna adimlha jengin ahi. Ajeh chu Pakaijin Assyria lengpa chu amaho khotona aneisah a hijeh a chu Israel te Pathen Hou-In sahphatna dinga jong hin Lengpan ana kithopin ahi.
DRAFT COPY