HAGGAI
THEMGAO LEKHABU
Haggai Themgao Lekhabu Sung Thu Umdan
Pathen panpina le phattheina jal’in Israelte chu Babylon’a kon in ahung kile tauvin ahi. Hinlah amahon Jerusalem sahphat kit ding ahitoh kilhon’a toh ding tham ding tampi amu-u chun, alung kim pouvin ahi. Hiche dinmun laitah chun, Hagggai Themgao leh Zechariah Themgao thuseiphong jal chun, amaho akipah thanom uvin, athah in akitil khou un ahi (Ezra 6:14). Ajeh chu amanin, Jerusalem Hou’in athah a tundoh kitna ding toh kisaija pan analah khom lhon ahi. Athu seiphong lhon jal chun, mipi lung akikhel hel jeng tan, Pathen lam vepum in, ama ama cheh in kiphal thengna aneijun ahi.
Ipi dinga Israelte lungkim lou ahidem? Ajeh chu amahon Pathen Hou’in asah diu chu ahaimil uvin, amaho natong ding bangleh amaho in-kisah phat ding banga akigel khah jeh-u ahi (Haggai 1:9). Hijeh chun Haggai in, Pathen dinga akitom lah diu thudol aseijin, “Ipiti nahiu ham phaten kiveuvin!” atin ahi (Haggai 1:5).
Lekhabu Jihpa Chule Akijih Kum
Hiche lekhabu hi Haggai Themgao in 520 BC a, anajih ahi. Haggai chun Pathen dinga kin abolna, adeh-a gaothu asei phatsung chu chomcha anahi. Aman gaova thu anasei phat hohi—Kum khat sung anahin, agom lam’a ledoh din, Lhajing 29, Ellha 17 chule Ollha 18 hohi ana hidehset ahi. Gaova thu asei pat apat ajona chan chu lha li halhin lou ahi.
1
Pakai Hou’in Sadia Kouna
1 Darius lengvaipoh kal kum ni lhinna, Lhajing nisim som ni le ko nin, Judah gamvaipo Shealtiel chapa Zerubabel le thempu chungnung Jehozadak chapa Jeshua henga Pakai in Haggai a konin thu ahinseiye. ✡ Ezra 4:24—5:2; 6:14 2 “Van Pakai chun hitin aseiye: Hiche miten, ‘Pakai hou in sahphatna ding avatna laiye atiuve.’ ” 3 Hijeh chun Pakai in Haggai themgao kamin ahin seiye: 4 “I-atileh ka in asesa kijam’a nang ho in nomtah taha chen nahiuvem? 5 Hiche hi Van Pakai sei ahi: Ipiti nahiu ham phaten kiveuvin! 6 Muchi tamtah natudoh naovin, ahinlah lhomcha bou nakiat doh uve. An nane naovin, ahinlah navaset thei pouve. Twi nadon naovin, ahinlah na dangchah-u achimdeh poi. Von na kivon naovin, ahinlah lum nasah jou pouve. Na tohman jouseu jong akoina sumdip avangsa bangin amang pai ji'e! 7 Van Pakai chun hitin aseiye: Ipiti nahiu ham phaten kiveuvin! 8 Tun thinglhang langa kal’uvin, thing gasuivin lang, ka in sa phauvin. Chutileh keima kalung lhaiding chule kaloupi thei ding ahi, tin Pakai in aseiye. 9 Tohga tampi nakineppi uve, ahinlah na vaicha cheh jouve. Chule na tohga’u in nahin pohlut tengu, ka sem mangpeh jitaove. Ipijha ham? Ajeh chu ka in ase san akijamin, ahinlah nang ho amitaki’in ama in nomtah tah kisahnan naki salel uve, tin Van Pakai sepai chun aseiye. 10 Nang ho jeh'a van mun jousen gotwi daitwi atuhkih’a, chule leiset in jong ga asemdoh lou ahi. 11 Na louma dung jouse le na thinglhang jouseuva nichang kasat sahding – hiche nichang sat chun chang jouse agotsah ding, lengpi phung jouse jong, olive phung jouse jong, chule muchi chivo dang jouse jong agotlhah sah soh ding, hichun nang le na gancha jong kel natohsah diu, chule na tohga jouseu jong aboncha asuhset soh kei ding ahi.”
Pathen Hou’in Natoh Machal Be
12 Chuin Shealtiel chapa Zerubbabel le thempu chungnung Jehozadak chapa Jeshua chuleh ahingdoh Pathen mite amoh chengin Pakai a Pathen’u thusei anit tauvin ahi. Pakai a Pathenun ahinsol Haggai themgao thusei ajah doh-u chun mipin Pakai aging cheh taove. 13 Hijeh chun Pakai thangkouva pang Haggai chun mipi jaha Pakai thupeh chu hitin: “Keiman ka umpi jing nauve, tin Pakai in aseiye,” atin ahi. 14 Hijeh chun Pakai in Judah gamvaipo Shealtiel chapa Zerubbabel lungthim ahin, thempu chungnung Jehozadak chapa Jeshua lunghtim ahin, chuleh Pathen mite ahingdoh amoh chengse lunghtim atildoh in ahi. Hiti chun van Pakai, a Pathenu hou in chu asapan taovin ahi. 15 Darius lengvaipoh kal kumni lhinna, lhalam som ni le khat nia atohpat’u ahi.
DRAFT COPY