7
Ezra Jerusalem Ahung Lhun
1 Kum phabep jouvin Persia Lengpa Artaxerxes vaihom laijin Ezra kiti khat ana um'in ahi. Ezra chu apa Seraiah ahin, Seraiah pa Hilkiah ahin, 2 Hilkiah chu Shallum chapa ahin, Shallum chu Zadok chapa ahin, Zadok chu Ahitub chapa ahin, 3 Ahitup chu Amariah chapa ahin, Amariah chu Azariah chapa ahin, Azariah chu Meraioth chapa ahin, 4 Meraioth chu Zerahiah chapa ahin, Zerahiah chu Uzzi chapa ahin, Uzzi chu Bukki chapa ahin, 5 Bukki chu Abishua chapa ahin, Abishua chu Phinehas chapa ahin, Phinehas chu Eleazar chapa ahin, chule Eleazar chu Thempu Chungnung Aaron chapa ahi. 6 Hiche Ezra kitipa hi Babylon gam'a konna hungtou ahin, ama hi masang laiya Pakai Israel Pathen'in Mose ana pehsa danthu chu kihil'a themtah ahi. Ama hi Pakai, Israel Pathen'in akithopia akaile jeh in ipi hijongleh aman angeh chan chu lengpan aphal peh-peh jenga ahi. 7 Artaxerxes lengpa vaihom kum sagi lhin kum in, Israel chate phabep le thempuho phabep jong, Leviho jong, lathem ho leh kelkot ngah a pang miho jong, chule Hou-In lhacha a pangho jong Jerusalem khopia ahung kitoltou cheh kit uvin ahi.
8 Ezra chu chuche kum Lhajing lha in Jerusalem alhung’in ahi. 9 Aman Babylon chu Lhatun nisim 8 a dalhah dingin tohgon aneijin, hichu kumthah nimasani ahin, chule ama Jerusalem’a Lhajing nisim 4 in alhung tai, ajeh chu a Pathen khotona khut chu achung’a aumin ahi. 10 Ezra hin ahinkho lhumkeijin Pakai danthu chu asim in, amangchan chuleh Israel mipi ho chun hiche dan thu ho leh chonchan thupeh ho jouse chu phatah a anit diuvin ahil jingin ahi.
Artaxerxes Lengpan Ezra Lekha Athot
11 Lengpa Artaxerxes in thempu le lekhasun, Israel te Pakai thupeh le danthu sim’a leh hilpa Ezra chu anoiya lekhathot hi ana pen ahi:
12 “Leng jouse lengpa, Artaxerxes kitipa keiman Pathen danthu hethem le lekha thempa Ezra henga kahin seijin kahin lem uve.
13 Ka lenggam sung’a um Israel mipite leh thempuho chule Levi te ho koi hijongleu chun Jerusalem langa nakile kit thei diuva kaphal peh nahi tauve. 14 Keima leh ka thumop them mi sagi hon nakhut uva nachoiju Pathen danthu dungjuiya nanit soh u hinam ti kholchil dia Judah gam le Jerusalem sunga kasol nahiuve. 15 Keihon nangho hi na sana ule na dangka u jong nakipoh thei diuvin thaneina kapeuve, hiche Jerusalem’a cheng Israel Pathen dia kiphal tah a ka pehdoh u ahi jeng'e.
16 Chujongleh nang hon Babylon gam'a konna na dondoh u sana le dangka chule Israel mipite leh thempu hon Jerusalem’a Pathen Hou-Ina dinga natodoh hou puma nakipoh diu ahi. 17 Hichea kidongdoh ho chengse hi, nang hon bongchal, kelngoichal, kelngoi chuleh chang le mim chohna a na manchah diu hichengse chu Jerusalem’a Pathen Hou-In maicham’a nato doh diu ahi. 18 Hiche sana dangka ho naman val hou chu nangho leh na mite chengin, na Pathen uvin adeilam tah a chu na manchah thei u ahi.
19 Ahin khonho vang chu na Pathen henga Hou-In’a manchah dingin Jerusalem a Pathen kom'ah hin pelut sohkeiyun tia kanganse nahiuve. 20 Nanghon na Pathen'u Hou-Ina ding ahilouleh chutobang thil danga manchah dinga na ngaichat u aum khah tah jongleh leng inpi sumkholna a kon’in kilah jengun.
21 Keima Artaxerxes lengpan Euphrates vadung lhumlam gamkaija sum chingho kom'a jong hiche thupeh ho kathotnin ahi. Nanghon thempu leh mihil'a pang Ezra hin nakom uva angaichat jat-jat napeh jeng diu ahi. 22 Nanghon ama chu dangka pound 7,500 chan gei, suhlou chang atena dim 500, lengpitwi athei 550 chujongleh olive thaothei 550 napeh diu chuleh chi adei jat-jat jong napeh jeng diu ahi. 23 Van Pathen'in a Hou-In dinga angaichat ibola eihon lengpa le achate chunga Pathen lunghanna ikou lhah diu ham? 24 Hiche to kimat a keiman kathupeh nom kit khat chu ahile, thempu, Levi, Lasa apang ho, kelkot ngah ho, Hou-In'a lhacha a pang ho chuleh Pathen Hou-In a natong dang ho chun kai jat chom-chomho apeh loudiu ahi.
25 Chuleh Ezra nangma hi na Pathen'in napeh na chihna chu na manchah a Euphrates vadung lhumlam gamkai sunga um mipi ho chunga vaihom ding Pathen danthu hethem ho thutan vaihom dinga na pansah ding ahi. 26 Koi hileh Pathen danthu nitlou leh lengpa danthu juilou ho chu gangtah a athu kitan a, kithat ding, ahilouleh kinodoh ding, ahilou jongleh anei agou kilahpeh ding ahilouleh songkul’a kikhum ding ahi,” ati.
Ezra In Pathen Athangvah
27 Hichun Ezra in jong, “Ipu ipateu Pathen chu thangvah in umhen, ajeh chu aman lengpa amangchan Jerusalem’a Pakai Hou-In asemhoi tan ahi! 28 Ama chu thangvah in umhen ajeh chu alungsetna tang louvin eimusah in, lengpa leh amilen amilal ho masanga eidom sangin hijeh chun keima tilkhouvin kaumin chuleh ka Pathen leh ka Pakai khotona khut chu kachunga aum jingin ahi. Hiti chun keiman Israel mite lamkai ho chu kakou khom'in Jerusalem lang’ah kakile tauvin ahi,” ati.
DRAFT COPY