8
Ezra Toh Sohchang’a Hung Kile Ho
1 Artaxerxes lengpa vaihom sungin Babylon a konna kahin kilhondohpi ho chu insung lamkai ho leh aphunggui u dungjuijin hiti hi ahi:
2 Phinehas insunga kon’in: Gershom ahi.
Ithamar insunga kon’in: Daniel ahi.
David insunga kon’in: Hattush, 3 Shecaniah chilhah ahi.
Parosh insunga kon’in: Zechariah leh adang mi 150 akijihlut in ahi.
4 Pahath-moab insunga kon’in: Zerahiah chapa Eliehoenai leh midang 200 ahiuve.
5 Zattu insunga kon’in: Jahaziel chapa Shecaniah leh midang 300 ahiuve.
6 Adin insunga kon’in: Jonathan chapa Ebed leh midang 50 ahiuve.
7 Elam insunga kon’in: Athaliah chapa Jeshaiah chuleh adang mi 70 ahiuve.
8 Shephatiah insnga kon’in: Michael chapa Zebadiah le midang 80 ahiuve.
9 Joab insunga kon’in: Jehiel chapa Obadiah leh midang 218 ahiuve.
10 Bani insunga kon’in: Josiphiah chapa Shelomith leh midang 160 ahiuve.
11 Bebai insunga kon’in: Bebai chapa Zechariah leh midang 28 ahiuve.
12 Azgad insunga kon’in: Hakkatan chapa Johanan leh midang 110 ahiuve.
13 Khonung’a hung Adonikam insunga kon’in: Eliphelet, Jeuel, Shemiah leh midang 60 ahiuve.
14 Bigvai insunga kon’in: Uthai, Zaccur leh midang 70 ahiuve.
Ezra In Hou-Ina Dia Levite Aholdoh
15 Keiman sohchanga konna hungdoh ho chu Ahava Twilam mun'ah kakhom’in, hichea chun nithum kageh un, hichea chun keiman mipi ho toh thempu hichelai mun hunglhung ho chu kakhol in ahileh Levi te khatcha jong ahung pangpoi ti keiman kamudoh in ahi. 16 Hijeh chun keiman alamkai hou Eliezer, Ariel, Shemaiah, Elnathan, Jarib, Nathan, Zechariah leh Meshullam kaga kousah in, chuleh Joiarib leh Elnathan jong kakousah in ahi, ajeh chu amani hi thumop them ahi lhon'e. 17 Chuleh keiman Casiphia mun'a um Levi te lamkai Iddo kom'a chun mi kasolin amite a insung mite leh Hou-In lhachaho kom'a chu Jerusalem'a Pathen Hou-In lhacha sunga lhacha a pang ding mi ahinsol diuvin ngehna nei dingin kasoltai.
18 Ka Pathen'u khotona khut chun eipuihoi jeh un, ama hon Sherebiah kitipa achate le asopite som le get eihin solpeh un ahi. Ama chu Israel chapa Levi chilhah ho lah a Mahli chilhah minasa tah khat ahi. 19 Ama hon Merari chilhah ho lah a kon’in Hashabiah chule Jeshaiah toh ahinsol thauvin chuleh achate le asopite somni jong ahin sol'un ahi. 20 Hou-In lhacha 220 jong ahinsol thauvin ahi.
21 Hichun hichelai Ahava Twilam mun’a hin ka Pathen’u angsung’ah keiho leh keiho kisunem tah a kabon chauva anngol'a tao dingin thupeh kaneijin ahi. Hiche ka taonau chu ahileh, ka kholjin nauva hi keiho leh kachateu chuleh kathilkeo hou toh eipuihoina diuvin kataovun ahi. 22 Ajeh chu keiman lampi dung’a melmate a konna eihongbit diuva lengpa kom'a sepai leh sakol chung tou sepai thum ding chu jachat um kasan ahi. Ajeh chu keiman lengpa kom'a chun, “Ka Pathen’u hin ama houte chu aban thahat in ahongbit in, amavang ama don louva koite vang alung hanna hoise tah chun asugim jin ahi,” tin kana seidoh tan ahi. 23 Hijeh chun keihon ka Pathen’un ka taonau sanga eihoi bitna diuvin anngol pum'in lunggil tah in ka taovun ahileh aman ka taonau eisanpeh un ahi.
24 Keiman thempu lah a kon’in lamkai som le ni Sherebiah leh Hashabiah chuleh thempu dang som chu ka lhengdoh in mopohna panmun kanapen ahi. 25 Ama ho chun sana, dangka, sana khon ho leh thilkeo dang ho toh lengpa le athumop them a vaihom hon Pathen Hou-Ina koi ding’a ahin pehdoh uchu polut dingin kapedoh tan ahi. 26 Keiman hiche thillu ho chu ka pehdoh toh kilhon’in, ka tetoh in ahileh hijat hi alhing in ahi:
Dangka ton 24,
Dangka a kisem thilkeo ho pound 7,500,
sana pound 7,500,
27 sana a kisem khon 20 hichu sana sum pum 1,000 toh aman kibang,
sana mantam tah toh kibang sum-eng kilha ngimsel'a kisem thil 2 hicheng hi ahi.
28 Keiman hiche thempuho kom'a chun, “Nangho leh hiche thil manlu ho hi Pakaiya dinga athenga kipedoh a nahi tauve. Hiche dangka le sana ho hi ipu ipateu Pakai Pathen a dinga hung kitohdoh ahitai. 29 Hiche thillu ho hi thempu ho leh Leviho chuleh Israel lamkaiho khut a na pehlut tokah un, phatah in chingtup un, ama hon Jerusalem’a Pakai Hou-In'a akoina mun'a akoi tengu leh phatah a atetoh diu ahi,” atipeh in ahi. 30 Hiti chun thempuho leh Levi te chun Jerusalem Hou-In'a Pakai thil koina mun'a hiche thillu sana le dangka ho chu pohlutna dinga mopohna chu ladingin anom tauvin ahi.
31 Lhatun nisim 19 nin keihon Ahava Twilam mun chu kadalha tauvin ahi. Chuleh Pathen mikhotona khut chun lamlhong lhungin melma ho leh michomho khut a kon’in eihoidoh sah un ahi. 32 Hiti chun Jerusalem chu damsel le bitkei chan kaga lhungun hichea chun nithum kakicholdo uvin ahi.
33 Kagalhun jou’u ani li channa in, sana le dangka chuleh adang thillu ho jouse ka Pathen’u Hou-Inah hoitah in katetoh un, Uriah thempupa chapa Meremoth leh Phinehas chapa Eleazer toh Levi mi Jeshua chapa Jozabad chule Binnui chapa Noadiah kom'ah pehlutna le ngansena akinei tan ahi. 34 Thil jouse chu ajat le agih jat chu akitetoh sohkeijin hicheng chu agihna jat pumpin kivaipohna dungjuijin hoitah in akijihlut in ahi.
35 Hijou chun sohchanna a konna hung potdoh ho cheng chun Israel Pathen’ah pumgo thilto akibolin ahi. Hiti chun ama hon Israel Pathen’ah Israel pumpi dingin bongchal som le ni, kelngoi chal somko le gup leh kelngoi jasagi le som sagi atohdoh un ahi. Ama hon chonset thoidamna dingin kelchal som le ni jong atohdoh un ahi. Hiche ho jouse hi Pakai kom'a pumgo thilto kin bolnan aneiyun ahi. 36 Lengpa thupeh chu Euphrates vadung lhumlam gamkaija gamvaipopa leh vaihom lenpen ho jouse kom'ah akithot lut sohkeijin, hijeh amaho chun akithopi sohkeiyun ahi.
DRAFT COPY