9
Ezra’n Namdang Te Kichenlou Ding Asimdoh
1 Hiche ho jouse hi akitoh chai sohkei phat in Jews lamkai ho chu kakom'ah ahungun, hiti hin asei tauvin ahi: “Israel mipi ho chuleh thempu ho leh Levi te phabep ho jeng jong hiche gamsunga cheng mipi ho a kon'in a ongdoh jou pouvin ahi. Ama hon Canaan mite, Hit mite, Periz mite, Jebus mite, Ammon mite, Moab mite, Egypt mite leh Amor mite chonna kidah umtah ho abol tauvin ahi. 2 Ajeh chu Israel miten hiche mite numei ho chu akichenpi uvin chuleh amahoa kon hin achate diuvin ji apuipeh un ahi. Hijeh chun hiche kichenna a kilahto hin namtheng hi asuboh tan ahi. Hiche chung chonna akhoh cheh khat chu lamkai ho leh vaihom ho jengin jong hiche thil dihlou tah kibol hi alamkai tauvin ahi,” atiuvin ahi.
3 Hiche thu hi ka jahdoh phat in, ka sangkhol kaponsil kabottel jengin, kalujang’a kon’in kasam katan lhan kabengmul jong kabotchaiyin, lungthim tongkha tah in katou lhajeng tan ahi. 4 Sohchang’a hung kile hon hitobang thil dihlou tah pihi ahin tohdoh jeng phat un, Israel Pathen thusei kichatna neiho cheng chu ahungun, eihung toupi tauvin ahi. Hiti chun keima jong nilhah teng kilhaina phat ahunglhun tokahsen lungthim natah in thipbeh in katou jingin ahi.
5 Kilhaina phat ahung lhun phat in von kibottel pumleh lungkham pum'a katouna a kon'in kahung dingdoh jengin, ka dilsun ka Pathen langa chun kakhut kadom sangin, 6 Keima kataovin,
“O ka Pathen, keima jachat nan kadim tai; namai lang hin ngat ding jong kajah achatai. Ajeh chu kachonset nau hi kaluchangu sangin asangjo tai chuleh ka thepmo nau hin van ahin phatai. 7 Kapu kapa teuva pat in tuni chan geijin hiche chonsetna hin kaki phumlut jengun ahi. Hiche jeh chun keiho kahiuvin, kaleng teu ahin, chuleh ka thempu teu ahin hiche gamsunga hou neilou te lengho thaneina a ka lhalutji tauvin ahi. Hitia chu eina thagam jiuva, gal-hing'a eina mat jiuva, eichom gam jiuva tunia ka dinmun bang uva hi jum le jachat thoh in kaumji tauvin ahi.
8 Tuhin phat chomkhat sung hin khotona kachangun, ajeh chu Pakai ka Pathen uvin mi phabep khat eihinghoi sah tauvin ahi. Aman hiche muntheng ahin eivengbit un ahi. Hiti hin Pathen'in eihin mit hadoh sah un, kasoh chan nauva kon hin phat chomkhat hi hailhung jouna eihin musah tauvin ahi. 9 Ajeh chu keiho sohchang kana hiuvin, ka Pathen uvin ami ngailutna akhonna bei chun hiche kasoh chan nauva kon hin eidalha den pouvin ahi. Hiche jeh chun, Persia lengpa chu khotona neitah in kachung uvah na atohsah in ahi. Aman eihin kiledoh sah un ka Pathen'u Hou-In hi eisem phat sah un, amangthahsa chu eisemphat sah tauvin ahi. Aman Judah leh Jerusalem’ah lung mongin eichen sah tauvin ahi.
10 “Chuleh tun, Vo ka Pathen'u, hichan nei phahsah jouvu nungsang’a hi ipi kasei thei nahlai diu ham? Ven avelin keihon nathupeh chu kapaidoh tauvin ahi. 11 Nasohte themgao ho chun gihna thucheng hiti hin eina seipeh un ahi, 'Nanghon na chenpha nau gamsung hi, asunga ana cheng hon kidah umtah le thet umtah jeng chonna hoa apumpia ana suhboh sau ahi. Agam hi among langkhatna pat among langkhat geija thenlouna a dimset ahi. 12 Achateu chu na chanu teu toh kichensah hih un! Achanu teu jong nachapa teu jidingin puipeh hih un. Hiche gam mite khantouna ding leh alungmon konna diuvin jong tilkhou hih uvin. Nang hon hiche thuhil hi najui uleh nahung hatdoh diu chuleh hiche gam’in ahin sepdoh gapha ho chu na phatchompi diu ahi,' ati. ✡Potdohbu 34:11-16; Danbu Ni Na 7:1-5
13 “Tun keiho hi kachonset nau leh kabolkhel nau jeh a gotna chang kahiuvin ahi. Ahinlah kachonset jeh uva kachan diuva lom sanga nemjon gotna neipe uvin, ka Pathen'u nangman mi phabeppi hi eighing hoijun neihin kiledoh sah kit tauvin ahi. 14 Ahinlah tujengin jong keihon na thupeh hi kasukeh kit tauvin, kidah umtah a hinkho mangho toh kichentona kanei tauvin ahi. Ven nalunghan nahin eisuhmang uva khat jeng cha jong hinghoi louhel'a nei suhgam jeng thei diudol ahi. 15 Vo Pakai, Israel Pathen, nang hi kitah nahi. Na-angsung’ah kathemmo nau pumin kahunglut ui, hiche themmona jeh a hi keiho koimacha jong na angsunga hunglut ngamlou kahiu ahitai,” ati.
DRAFT COPY