HOSEA
THEMGAO LEKHABU
Hosea Lekhabu Sung Thu Umdan
Jon thanhoi! Ji numei kitah lou chu ajipa dinga manthahna ahi. Hinlah Hosea dinmun a sei ding in, aguh a athoh lalna chu japi ang sunga suhjumna aji notinu jeh ahi. Hosea le ajinu Gomer thusim akon hin thil chombeh lungsetna dihlou ana sohdoh tai. Ahivang in Hosea chun kitah jing pum le Pathen thutoh kitoh in ana chonkhel tajongleh ajinu chunga ngailutna ana neijin ahi.
Bung khat apat bung thum sung hin Hosea insung thudol aseijin, adeh in ajinu jon thanhoi na thudol—hichun Israelte Pathen ansunga akitah lounau toh atekah ahi. Adang bung hose hin, Pathen in mihemte achonset nauva kon Ama lam’a ahung kile diu adeisahna thudol aseijin ahi. Hiche lekhabu nasim akon, suhkhel neija lungthim tongkha thei thil ijat hamkhat akon Pathen mingailutna jal’a ngaidamna tha nanei ding ahi. Ajeh chu Pathen in amite angailun akhohsah jing in, hichea hin ngamdam natha aumin ahi.
Lekhabu Jihpa Chule Akijih Kum
Israelte solam lenggam adin Hosea themgao chun 750 BC apat in gaovin thu anaseijin, chule Assyria te khutna solam lenggam akipehdoh kum 722 BC geijin gaothu anaseijin ahi. Hosea in thempu kin atoh sung chun Israelte chunga Pathen beijin leng gup jeng in vai anahom e. Chule Israelte achaina alosap-u kipatna chu Jeroboam II, ama chu leng phalou nei le gou jeng khohsah, chonchat veina, japi chunga sihnei langneija natong ahi. Ama nungjuia natong chan chun Israel lhuhna ding jeng anasosah tan ahi. Hiche lekhabu hi Israelte chunga manthahna alhun jou 722 BC a kijih hidin ginchat ahi.
1
Hosea In Numei Kijoh Akichenpi
1 Pakaiyin hiche thuhi Beeri chapa Hosea anapeh ahi. Hiche hi Uzziah, Jotham, Ahaz, chule Hezekiah ho Judah lenga anapanlaiyu chule Jehoash chapa Jeroboam Israelte lenga anapanlai ahi. ✡ 2 Lengte 15:1-7; 2 Thusimbu 26:1-23; 2 Lengte 15:32-38; 2 Thusimbu 27:1-8; 2 Lengte 16:1-20; 2 Thusimbu 28:1-27; 2 Lengte 18:1—20:21; 2 Thusimbu 29:1—32:33; 2 Lengte 14:23-29 2 Hiche hi amasatah-a Pakaiyin Israel mite koma Hosea anamanchaha thu anasei pat chu ahi. “Chenlang noti khat kichenpin, chutileh achate phabep khat noti cha-a hungkijil ding ahiuve. Hiche chun Israel chate Pakaija kona akiheimanguva, gamchom mite milim doi ahou-u chun noti chonna achonnao chu avetsah ahi.” 3 Hijeh chun Hosea in Diblaim chanu Gomer akichenpin ahile, chuin ahung gaiyin Hosea dingin chapa khat ahinpeh in ahi. 4 Chule Pkaiyin aseiyin, amin “Jezreel nasah ding ahi, ati, ajeh chu keiman phat chomkhat jouleh Jezreel thisan kiso jeh'a Jehu lengpa alenggam talen kamat saha, Israel mite chamlhatna lenggam kasuhbei ding ahitai. ✡ 2 Lengte 10:11 5 Hiche niteng chuleh Jezreel phaichama Israel galhatna kasuhbei ding ahi. 6 Gangtah in Gomer in nao ahinvop kitin, chanu khat ahing kit in, chuin Pakaiyin Hosea jaha aseikitin, nachanu hi amin, “Dipdamna-bei, ‘Ngailutna–bei’ (Lo- ruhamah) - ajeh chu keiman Israel mite hi kangailut tah louhel ding ahitai ahiloule kangaidam lou ding ahitai, ati. 7 Ahinla Judah mite chunga kangailutna kavetsah ding, Pakai Pathen thahatna jal'a kahuhdoh ding ahi, galhat mite galmanchah jeh, sakol le sakol kangtalai thahatna jeh hilouva Pakai Pathen thahatna jal'a kajosah ding bou ahi.” 8 Ngailutna beiyin anoichep aban phatin- Gomer in nao ahin vopkit in chapa ani channa ahing kittai. 9 Pakaiyin aseiyin, “Amin chu-‘Kamite-hilou’ tin min sahin, ajeh chu Israel mite hi kamite ahitapouve, chule a Pathen-u jong kahitapoi,” ati. 10 Ahivanginla Israel chate twikhanglen panga neldijat le simjou lou hung hitei ding ahiuvin, ajahuva ‘kamite nahitapouve’ Katina laitah a chu “hingjing Pathen chate “Kati ding ahiuve. ✡ Rm 9:26 11 Hitia chu Judah mite le Israel mite thakhatna hung kikhom kimsoh keijuva, alamkaidiu jong mihem khatseh akilhendiu gamsunga kona kitou tol ding ahiuve. Ajeh chu Jezreel nikho hi loupi ding ahiye.
✡1:1 2 Lengte 15:1-7; 2 Thusimbu 26:1-23; 2 Lengte 15:32-38; 2 Thusimbu 27:1-8; 2 Lengte 16:1-20; 2 Thusimbu 28:1-27; 2 Lengte 18:1—20:21; 2 Thusimbu 29:1—32:33; 2 Lengte 14:23-29
DRAFT COPY