1 Jesu le aseijuite Jerusalem ahung naiyun, Bethphage khopi Olive mola um chu ahin pha tauve. Chuin Jesun aseijui mini ama sanga asol'in, 2 aseiyin, “Khuche khoa khun galut lhonin, nagalut lut lhon le sangan anou toh kihen na gamu lhon ding ahi. Anin lham lhon'in chule kakoma hinpui lhonin. 3 Koiham khat touvin ipi bola nahi lhon em tia donga aumleh, Pakaiyin aman nom e, tilhon in, chuteng aman aphal jeng ding ahi,” ati. 4 Hiche thilsoh hi Themgao thusei guilhunna dinga soh ahi, 5 “Jerusalem a cheng ho jah a seiyin, ‘Veuvin, na Lengpau chu nakom uva ahung e. Ama nunnem tah ahin, sangan chunga atouvin—sangan nou chunga ahung touve,’ ” tia kisei chu,✡Zechariah 9:9 6 Seijui teni chun Jesun athupeh bang'in abol lhonin ahi. 7 Amanin sangan chule anou chu Ama koma ahin pui lhonin chule amaho chun apon uchu sangan nou chunga aphauvin, Ama achunga atouvin ahi. 8 Mihonpi atamjo chun Ama masang sang-ah aponsil hou chu lam lhonga chun aphauvin, chule mi abang loi chun theoboh ho alham un chuin lampia apha tauve. 9 Akijot nauva Jesu chu alai lunga aum'in chule Ama kimvel sea ho chun asam un, “David Chapa jeh in Pathen vahchoiyun! Pakai mina hungpa chunga nunnom hen! Chung Van sang pen a Pathen vahchoiyun!” atiuve.✡Labu 118:25,26 10 Jerusalem kho mite jouse chu khopi sung Ama alut lut chun aboisoh jeng tauvin, amahon adong un, “Ama hi koi hiya ham?” atiuve. 11 Chuin mipi ho chun, “Ama hi themgao Jesu, Galilee gamkai Nazareth khoa kon ahi,” atiuve.

12 Jesu Hou-In sunga chun alut in, chuin maichama kilhaina thilto dinga ajoh a le acho ho chu anodoh in, Aman vapal joh ho touna le sum lheh-lea pang ho dokhang chu alekhup pehtai. 13 Aman ajah uva, “Pathen lekhabua, Ka Hou-In chu taona in kiti ding ahi akiti, hinlah nanghon gucha ho thil kiselguhna mun naso tauve,” ati.✡Isa 56:7; Jeremiah 7:11 14 Mitcho le elbai ho Hou-In a chun ahungun, Aman amaho chu aboldam in ahi. 15 Thempu pipuiho le houdan thuhil hon athil kidang bol chu amu uvin, chule chapang hon Hou-In sunga “David Chapa jal'in Pathen vahchoiyin umhen,” tia kisam aja uvin. Hinlah lamkai ho chu alunghang thei lheh jeng uve. 16 Ama hon Jesu adong uvin, “Hiche chapang ho hin ipi aseiyu najah em?” atiuvin, Aman “Henge kajanai, naosen chapang noi cheplai kam'in vahchoina achamkim sah e, ti nasim doh nailou u ham?” ati.✡Labu 8:2 17 Chujouvin Ama Bethany akile kit in hichea chun ajan geh dentai.

18 Jingkah in Jesu chu Jerusalem a ahung kilen ahileh, agil akel tai. 19 Aman lampam a theichang phung um chu agatoh tan. Aman jong aga um ding ham tin aga ve in, hinlah ado jeng bou amun ahi. Chuphat in Aman theichang phung chu, “Nangma itih in jong gakit tahih in!” ati. Chupet tah chun theichang phung chu agoppai jeng e. 20 Seijuiho chun hichu amu phat un alung dongun chule adongun, “Iti dana theichang phung chu goppai jeng ahi dem?” tin adatmo tauve. 21 Chutah in Jesun Amaho aseipeh in, “Keiman thutah ka seipeh nahiuve, nanghon na tahsan uva chule lungthoina neilou beh nahiu leh hitobang hi nabol thei diu ahi, chule asanga lenjong nabol thei diu ahi. Nanghon moul jah a jong nangma kichon mang inlang chule twikhanglen'a kilehlut in tileu chun chuti jeng ding ahi.✡Matt 17:20; 1 Crth 13:2 22 Ipia ding hijongleh natao theiyu, chule tahsanna naneiyuva ahileh namu diu ahi” ati.

23 Jesu Hou-In a konin ahung kilekit in chule thu ahilpan in ahileh, thempu pipuiho leh upaho Ama koma ahungun ahi. Amahon adongun, “Koi thuneina a hiche ho jouse hi nabol ham? Kon bolin tia thu napeh ham?” atiuve. 24 Jesun adonbut in, “Nang hon thudoh khat hi nadonbut uva ahileh koi thuneina a hiche ho jouse hi kabol ham seipeh nauvinge. 25 John chun miho baptize theina thuneina anei chu van'a kon ham ahilouleh mihem a kon bep bou ham?” ati. Amaho le amaho akihouvun, “Eihon van'a kon ahi itiuva ahileh Aman ipi jeh a eihon John thusei chu itahsan lou uham, tia eidoh dingu, 26 Hinlah ama mihem bepbou ahi tin seileu hen, mipi oimo ichan diu ahi, ajeh chu miho chun John chu themgao ahi atiuve ti aseiyun ahi.” 27 Hiti chun achaina keiyin adonbut un, “Keihon kahe pouve,” atiuve. Chuin Jesun adonbut in, “Chuti ahitah le koi thuneina a hiche ho jouse kabol ham ka seipeh lou ding nahiuve” tin aseitai.

28 “Hinlah hiche thudol hi ipi nagel uvem? Mi khat chapa ni nei chun, alenjo pa koma, ‘Chapa gache doh inlang, tunin lengpi leiya na gatong in’ ” ati. 29 Chapa chun adonbut in, “Ka-e, kachelou ding ahiye,” atin hinlah chujoupeh chun alunggel akhel in agache tai. 30 Chuphat in apa chun chapa khatpa jah a, “Nang chen” atileh ama chun “Henge,” Hepa tin aseiyin, ahin aga chedeh poi. 31 Chapa teni lah a chu koijoh apa seingai hiya ham? Amahon adonbut un, Amasapa atiuve. Chuphat in Jesun ahil chenin, “Keiman tahbeh a ka seipeh nahiuve, kaidong kitahlou ho le numei kijoh ho Pathen Lenggam a nangho masanga lut diu ahi.” 32 Ajeh chu Twilutsah John chu ahungin, chule adih a hinna ding lampi chu nakopeh uve, ahin nanghon ama chu natahsan pouve, hinlah kaidong ho le numei kijoh hon atahsan uve. Chule hiche aso nungin jong Ama natahsan nom pouvin chule nachonset nauva nakisih pouve.✡Lk 3:12; 7:29,30

33 “Tun thusim achom khat ngaiyun. Lounei khat hin lengpilei abol in, apal agen kimvel'in, lengpi theiga lhohna ding leiko alaiyin, chule gah vetsuina dingin insang asan ahi. Chujouvin aman lengpilei chu alei lhou ho khut a apedoh in, chule gamchoma agache tai.”✡Isa 5:1,2 34 Lengpiga alhun phat in, alei lhouva pang ho koma asohte asolin ahi. 35 Hinlah alei lhou hon asoh ho chu amanun, khat avouvin, khat athat un chule achom khat chu songa asep tauve. 36 Hichun alou neipa chun asoh atamjo cheh chu lengpi theiga lohkhom dingin asolin ahileh abolngai ngai anabol un ahi. 37 “Achaina keiyin alouneipa chun achapa asolin, amaho chun achapa chu ana jabol teiyunte tin agel'in ahi.” 38 “Hinlah loubol ho chun achapa hung amu phat un, amaho khat le khat akihou un, ‘Agou lo’ dingpa hikoma ahunge. Hungun, ama that u hitin agam hi eiho chan ding'in kiheidoh u hite,” atiuve. 39 Hiti chun amahon aman'un, lengpi leiya konin akaidoh un, chule ama chu athat tauve. 40 Jesun adongin, “Lengpi lei neipa chu ahung kile teng loubol ho chu i-lonte tia nagel uvem?” ati. 41 Hou lamkai ho chun adonbut uvin, Aman mi-engseho chu melse tah in that intin, chule alengpi lei chu alougasoh achan ding pethei midang henga apehdoh ding ahitai, atiuve. 42 Chutah in Jesun amaho tah adongin, “Hiche hi nanghon Pathen Thutheng bua nasimdoh khah lou uham? Insa hon adeilou song chu aning'ah apipen in apang tai. Hiche hi Pakai thilbol ahi chule gahvet dingin akidange.✡Labu 118:22,23 43 Keiman nangho ka seipeh nahiuve, Pathen Lenggam chu nanghoa konna kiladoh a, chule phatea ga sodoh thei namdang kipe ding ahi. 44 Koi hijongleh hiche songa kipal chan chu ahal hal'a chip ding chule alhuhkhum chan chu atagoi ding ahi,” ati. 45 Thempu pipuho le Pharisee ho chun hiche thulem hi ajah phat un, amaho douna'a thusim kisei–loubol mi engse ahiu chu akihetdoh tauve. 46 Amahon Ama amatnom uvin, hinlah mipi chun Jesu chu themgaova angaito jeh un akicha uvin ahi.