83
Leiset Chunga Pathen Bou Asangpen Ahi.
Asaph labol.
1 O Pathen, thipbeh in umhih in!
Na ngong in umhih in.
O Pathen, thipsan jeng hih in.
2 Nagal mite choh lenglung khu najah louham?
Kiletsah tah na galmi ho ahung kipatdoh khu nahet louham?
3 Ama hon na mite douna dingin aguh in thil agong uvin;
nangin napanhu mite dounan thil phalou agong uvin ahi.
4 Ama hon aseijun, “Hungun hiche nam mite hi sumang uhite.
Chutileh Israel hi isuhmit hel diu ahi,” atiuve.
5 Hiche tohgon ahin amaho akinopto uve.
Nang dounan kiloikhomna khat anei tauve—
6 ama ho hi Edom mite le Ishmael mite;
Moab mite le Hagar mite;
7 Gebal mite, Ammon mite, le Amalek mite;
chuleh Philistia leh Tyre akon mipi ho ahiuve.
8 Assyria miten jong ajopmun,
Lot chilhah ho toh jong kiloikhom ahiuve.
Selah
9 Amaho hi Midian, Sisera, Jabin mite
Kishion vadunga nabol bangin bol jengin.
10 Amaho chu Endor ah na sumang in,
chuleh atahsau monlha chu leiset leipha sosah nan akimang in ahi.
11 Nangin alamkai ho chu Oreb le Zoab nabolna bangin sumangin.
chuleh avaipo ho chu Zebah le Zalmun'a nabolna bangin thatdoh tan,
12 ajeh chu ama hon hitin aseijuve, “Eihon hiche Pathen gam ho hi
eiho phatchomna dingin lahpeh uhite!” akitiuve.
13 O Pathen, amaho hi huilah a
changvai akithejal bangin thejal tan!
14 Meijin gammang ahal bangin
chuleh meikong in mol le lhang ahal lhah bangin hallha jengin,
15 hui le gon melse tah a adelmang bangin delmang'in;
nakhopi huijin kichat sah in.
16 Nasatah in sujum'in
O Pakai, namin a ahung kipehlut tokah un.
17 Amaho hi tonsot in jum le kichan um tauhen.
Melse tah in thisah tan.
18 Hiteng chuleh ama hon nangbou hi Pakai tia nakou diu,
nang bou Hatchungnung Pen,
leiset chunga thunei chungnung nahi hi hin hetauvinte.
DRAFT COPY