7
Ekyahandi̱i̱ku̱u̱we Dhau̱dhi̱, eki aalimbiiye Mukama kusighikila haa bighambo ebi Ku̱u̱si̱ wʼomu ntu̱la ya Bbenjami̱i̱ni̱ aabu̱ghi̱ye.
1 Ai̱ Mukama Luhanga wanje,
nuuwe nkuulukilaghʼo.
Onjune kandi onjiye mu bantu abakwete kumpuma.
2 Otaabanju̱ni̱ye, bakunkwata kandi bansabangule nga ntale,
nanga taaliyo oghu akubanjuna.
3 Ai̱ Mukama Luhanga wanje,
ndakaba ninaasobeleei̱ye muntu weena,
kedha nkola kintu kyona kitahi̱ki̱ye,
4 kedha ngobeli̱ya bhootu̱ syanje,
kedha ntali na kighendeleluwa kyona nsaali̱ja ngi̱ghu̱ yanje,
5 oleke ngi̱ghu̱ syanje bampume kandi bankwate.
Oleke banjite ti̱ bati̱ghe mu̱ku̱ ghwanje ghulangaaye hansi.
6 Ai̱ Mukama, oomuke oli na ki̱i̱ni̱gha.
Oomuke olwani̱i̱si̱ye ki̱i̱ni̱gha kyamaani̱ kya ngi̱ghu̱ syanje.
Oomuke Ai̱ Luhanga wanje,
nuuwe okatʼo ku̱twi̱lu̱wa musango.
7 Oleke bantu beekumaani̱li̱ye hambali oli.
Obaleme ku̱lu̱gha eghulu.
8 Mukama nuuwe oku̱twi̱lagha mahanga musango.
Ai̱ Mukama, ongilemu ahi̱ki̱li̱i̱ye.
Uwe wa Eghulu Munu oboone ngoku ntali na musango!
9 Omalʼo bubhi bwa bantu babhi
kandi okingilile bahi̱ki̱li̱i̱ye.
Uwe Luhanga ahi̱ki̱li̱i̱ye
kandi oghu amani̱ye ebi bu̱li̱ muntu
akweli̱li̱kanagha haa mutima ghuwe.
10 Luhanga niiye ngabo yanje,
niiye akujunagha abali na mitima esemeeye.
11 Luhanga niiye mu̱cu̱ wa misango oghu ahi̱ki̱li̱i̱ye.
Akusaaliluwagha bu̱li̱ kilo haabwa bantu babhi.
12 Kaakuba muntu ateekuukamu,
Luhanga akutyali̱ya kihiyo kiye
kandi akuleegha buta buwe.
13 Ateekani̱je byakulwani̱i̱si̱ya biye ebikwitagha
kandi amubhasuulile bimala biye ebikwakʼo mulilo.
14 Bantu babhi bakubaagha na bubhi,
munda yabo baku̱ku̱li̱yagha bijibu
kandi babyala bisubha.
15 Bakulimagha bi̱i̱na bitobheeye bati niikuwo bantu banji babyegengemu,
kusa ebi boonini niibo bakubyegengaghamu.
16 Bijibu bakubbalagha kuleeteleja bantu banji,
bikubakuukilagha boonini
kandi butabanguko bakuteghekagha kuleeteleja banji,
niibo bukukuukilagha.
17 Ndasi̱i̱magha Mukama haabwa bu̱hi̱ki̱li̱i̱le buwe
kandi ndalimbagha ni̱nku̱mi̱ya li̱i̱na lya Mukama wa Eghulu Munu.