9
Ku̱si̱i̱ma Mukama haabwa bwengani̱ja buwe
Ewaa mukulu wa bilimbo. Jabbu̱li̱ ya Dhau̱dhi̱.
1 Ai̱ Mukama, nkukusinda na mutima ghwanje ghwona.
Nkughambila bantu byakuswekani̱ya byona ebi okukolagha.
2 Nkudheedhuwa haabwawe,
nkulimba ninkusinda, oghu oli Eghulu Munu.
3 Ngi̱ghu̱ syanje bakaakukubonagha,
bakukuukagha enu̱ma,
beegenga kandi baku̱wa.
4 Oli wamajima kandi wa bwengani̱ja
mu ku̱twi̱la bantu musango kwawe,
waaghu̱tu̱wa ngoku ntali na musango.
5 Okatwi̱la musango mahanga,
waaweelekeeleli̱ya bantu babhi boona
kandi tabalitodha kubaasuka bbaa.
6 Okahwelekeeleli̱ya ngi̱ghu̱ syatu,
waaweelekeeleli̱ya bibugha byabo
kandi tabalitodha kubaasuka.
7 Bhaatu Mukama alemi̱ye bilo nʼebilo.
Aataayʼo ntebe yee ya bukama ku̱twi̱la bantu musango.
8 Aku̱twi̱la nsi musango mu bu̱hi̱ki̱li̱i̱ye
kandi aleme mahanga na bwengani̱ja.
9 Mukama niiye bwebi̱si̱lo bwa aba bakwete kubona-boni̱ya,
niiye akubagu̱mi̱yagha mu bwile bwa bijibu.
10 Ai̱ Mukama, abaku̱ku̱hu̱ti̱yagha, bakukwesighagha
kandi abakwisagha hambali oli tookubalekagha.
11 Mulimbe nimusinda Mukama oghu alemi̱ye mu Sayu̱u̱ni̱!
Mughambile mahanga ghoona ebi akukolagha.
12 Luhanga akuusukagha abakwete kubona-bona,
taakuubululuwagha kutakangana kwabo
kandi akufubilagha abakubabona-boni̱yagha.
13 Ai̱ Mukama, ongilile kisa.
Olole ngoku ngi̱ghu̱ syanje bakwete kumbona-boni̱ya!
Ai̱ Mukama, onjiye mu lu̱ku̱.
14 Onjune niikuwo nkusinde bbeni̱-bbeni̱ haa maageeti̱ ghaa Sayu̱u̱ni̱,*9:14 Bbai̱bbu̱li̱ sinji sighambi̱ye Yelusaalemu.
ndheedheeu̱we haabwa kujuna kwawe.
15 Mahanga gheegengi̱ye mu ki̱i̱na eki ghaali̱mi̱ye ghoonini,
ki̱ki̱ya baategheeye banji, niibo kyakwete boonini.
16 Mukama eeyoleki̱ye ngoku ali
haabwa ku̱twi̱la bantu musango na bwengani̱ja.
Bantu babhi bakukwatiluwagha mu bikoluwa byabo byonini.
17 Bantu babhi balimaliilila mu lu̱ku̱,
aba boona abakubhengagha Luhanga.
18 Abali mu bwetaagho, Luhanga taakubaabululuwagha
kandi kunihila kwa banaku takulihwelʼo kimui bbaa.
19 Ai̱ Mukama, oomuke, otaleka bantu bakughaya!
Oleke banamahanga bakwisʼo kandi obatwi̱le musango.
20 Ai̱ Mukama, oleke bakwobahe,
oleke bantu bʼomu mahanga bamanye ngoku bali bantu kwonkaha.