10
Nsaala ya kusaba bwengani̱ja
1 Ai̱ Mukama, wanseli̱yʼo bwaki?
Waaneebi̱si̱li̱i̱ye mu bwile obu ndi mu bijibu nangaaki?
2 Bantu babhi niibuwo beepanka kandi baabona-boni̱ya banaku,
oleke bubhi bwabo bakwete kutegheka haa bantu banji bubakuukile boonini.
3 Bantu babhi aba bakwete kwepanka haabwa ebi bakubbalagha kukola,
bantu abali na mululu bakukiinagha kandi babhenga Mukama.
4 Bantu babhi bali na myepanko kandi tabafu̱u̱yʼo Mukama,
bakweli̱li̱kanagha bati, “Luhanga taaliyo.”
5 Baku̱si̱ngu̱lagha mu byona ebi bakukolagha,
babhenga bilaghilo byawe
kandi baghaya ngi̱ghu̱ syabo.
6 Bakughilagha bati, “Taaliyo ekikunsaagha
kandi taaliyo kijibu ekikumbʼo.”
7 Kanu̱wa kaabo kaasuuyemu kukiina, bisubha kandi kwobahi̱i̱li̱i̱ya.
Bakwangu̱u̱yagha ku̱bu̱gha bighambo ebikuleeta bijibu kandi bi̱bhi̱i̱hi̱ye.
8 Bakwebi̱sagha mu mi̱bhi̱li̱,
balindiliiye kwita bantu abatali na musango.
Bakuukalagha beebi̱si̱ye bali̱ndi̱ye kukwata abatali na bu̱kooneli̱.
9 Bakuukalagha beebi̱si̱ye nga ntale, balindiliiye kukwata banaku,
kubatwala hambali ebo bali.
10 Abatali na bu̱kooneli̱,
bakubakwatagha na ki̱ku̱bha kandi bababona-boni̱ya.
11 Bantu babhi aba bakughilagha bati, “Luhanga aatubuluuwe!
Aghwesaghi̱li̱i̱ye kandi taaboone ebi tukwete kukola!”
12 Ai̱ Mukama Luhanga, ofubile bantu babhi aba!
Otaabululuwa abakwete kubona-bona!
13 Bantu babhi bakugubha bati̱ya kughaya Luhanga
kandi kughila bati,
“Luhanga taakutufubila?”
14 Bhaatu oboone kandi omani̱ye bijibu na kubona-bona ebi bakuleetagha.
Obiboone kandi akubafubila.
Bantu abatali na bu̱kooneli̱ nuuwe bakwesighagha
kandi nuuwe okulindagha nku̱u̱bbi̱.
15 Ohenange mikono bantu babhi aba kandi abakukolagha bintu bi̱bhi̱i̱ye,
obafubile haabwa bintu bi̱bhi̱i̱ye ebi bakwete kukola ku̱hi̱ki̱ya babi̱leki̱ye.
16 Mukama ni mu̱lemi̱ wa bilo nʼebilo.
Mahanga aghakulami̱yagha baaluhanga banji,
ghalihwelekeelela ghalu̱ghe munsi.
17 Mukama, omani̱ye kunihila kwa abatali na bu̱kooneli̱.
Majima oku̱u̱ghu̱wa nsaala syabo kandi obahu̱u̱mu̱li̱ye.
18 Okutʼo bwengani̱ja haa nku̱u̱bbi̱ na aba bakwete kubona-boni̱ya,
niikuwo atabʼo muntu nʼomui munsi oghu akuboobahi̱i̱li̱li̱ya.