11
Kwesigha Mukama
Ewaa mukulu wa bilimbo. Jabbu̱li̱ ya Dhau̱dhi̱.
1 Mukama niiye nkwebi̱si̱laghamu.
Enu̱we mukugubha mu̱ti̱ya kungila muti,
“Ohalale nga noni̱ oghende mu myena,
2 nanga bantu babhi babhu̱li̱ye mata ghaabo
kandi bataayemu bimala.
Beebi̱si̱ye mu mweli̱ma,
bakubbala kulasa bantu balungi.
3 Bintu byona ni byabaaye bi̱bhi̱i̱hi̱ye,
muntu ahi̱ki̱li̱i̱ye akugubha kukola ki?”
4 Bhaatu Mukama ali mu numba yee ehi̱ki̱li̱i̱ye,
alemi̱ye anali mu eghulu.
Akuukalagha aboone bantu boona
kandi amani̱ye ebi bakwete kukola.
5 Mukama akulolagha bhyani bantu bahi̱ki̱li̱i̱ye na babhi,
oohi̱ye abaku̱ndi̱ye butabanguko.
6 Bantu babhi aba alibatooneli̱ya mbu̱la ya makala
ghakwakʼo mulilo na bughanga.
Alibafubila na mwegha ghwamaani̱ ghu̱tu̱u̱mi̱ye,
7 nanga Mukama ahi̱ki̱li̱i̱ye
kandi abbali̱ye bikoluwa bilungi.
Bantu balungi niibo balimubona.