12
Nsaala ya kusaba bu̱kooneli̱
Ewaa mukulu wa bilimbo. Jabbu̱li̱ ya Dhau̱dhi̱ aali̱mbi̱ye naakoleesi̱ya du̱ngu̱.
1 Ai̱ Mukama, otukoonele,
nanga bantu balungi baahooye munsi
kandi majima ghaahooye mu bantu.
2 Boona bakuukalagha mbahangana bisubha,
bakwefoolagha abaku̱bu̱gha bintu bisemeeye
kandi taalimu wamajima.
3 Ai̱ Mukama obajombʼo mi̱nu̱wa eghi
kandi bilimi baku̱koleesi̱yagha kwepanka.
4 Bakughilagha bati, “Ebi tu̱ku̱bu̱ghagha bikulekagha tutunga ebi tukubbala.
Tu̱ku̱bu̱gha ebi tubbali̱ye
kandi taaliyo oghu ali mukama waatu.”
5 Bhaatu Mukama akughilagha ati,
“Naaboone ngoku bakwete kubona-boni̱ya abatali na bu̱kooneli̱
kandi naaghu̱u̱ye kulila kwa banaku.
Nkwisa kubaha bu̱li̱ndi̱ obu bakwete kubbala.”
6 Bighambo bya Mukama bisemeeye,
bili nga siliva eghi bataaye mu mulilo milundi musanju̱ ku̱ghi̱semeli̱ya.
7 Nahabweki Mukama, tumani̱ye ngoku okulinda abakwete kubona-bona.
Okubalinda ku̱lu̱gha mu bantu baa mujo ghuni oghuusuuye bisubha,
8 nankabha bantu babhi aba mbakughendagha mbeepanka
kandi bubhi bwabo bumalakaki̱ye kyalo kyona.