55
Nsaala ya muntu oghu akwete kubona-bona
Ewaa mukulu wa bilimbo. Kilimbo kya Dhau̱dhi̱ naakoleesi̱ya du̱ngu̱.
1 Ai̱ Luhanga, ooghu̱we kusaba kwanje,
otabhenga nsaala yanje.
2 Gutu ontegheeleli̱ye kandi onkuukemu,
nanga bijibu byammali̱ye maani̱.
3 Ebi ngi̱ghu̱ syanje bakwete ku̱bu̱gha byanjobahi̱li̱li̱i̱ye
kandi bantu babhi kumbona-boni̱ya kwammali̱ye maani̱.
Bakundetelejagha bijibu,
basaaluuwe haabwanje kandi banjoi̱ye.
4 Mutima ghuntuntuuye munda
kandi noobahiiye kwonini nti nku̱ku̱wa.
5 Bwoba bunkwete kandi niibuwo naatukumila,
noobahiiye kimui.
6 Nkwete kughila nti, “Oo! Hakili nguli naabaaye na mapapa nga ghaa ki̱i̱bbi̱mbo.
Nanguhalaaye ngenda hambali nkuhuumulila.
7 Nanguhalaaye hambali haseleeye kimui,
ngenda niikala mu elungu.
8 Nangwetungiiye kya kuukalamu,
niikuwo kyegha kyamaani̱ na mbu̱la ya lubaale bileke ku̱mpi̱kʼo.”
9 Ai̱ Mukama, otabangule ebi ngi̱ghu̱ syanje baku̱bu̱ghagha,
nanga naaboone bantu niibuwo batabangula kandi baatu̱wa nsi̱si̱ mu kibugha.
10 Mukilo kandi ntangaali̱ bakuukalagha mbabungamu,
mbatu̱wa misango kandi mbaleetamu bijibu.
11 Bakwete ku̱bhi̱i̱ya bintu hoona-hoona mu kibugha,
nguudhe sya kibugha siisuuyemu bantu abakwete kubona-boni̱ya baanakyabo kandi baghobi̱ya.
12 Nguli ngi̱ghu̱ yanje aaliiye akwete kuunambula,
nangu̱gu̱mi̱si̱li̱i̱je,
nguli oghu akumpakani̱yagha aaliiye akwete kuneepankilʼo,
nangu̱mwebi̱si̱li̱i̱ye.
13 Bhaatu nuuwe oghu naakalagha naawe,
muntu muunakyanje kandi bhootu̱ syanje eenini.
14 Tukahanuula hamui
kandi tukalami̱li̱ya hamui mu numba ya Luhanga.
15 Oleke ngi̱ghu̱ syanje baku̱we bwile bwabo butakahi̱ki̱ye,
oleke babajiike baghende eku̱li̱mu̱ banaakaaye.
Bubhi niigho maka ghaabo kandi buusuuye mu mitima yabo.
16 Bhaatu nkubilikilagha Mukama Luhanga kunkoonela
kandi akunjuna.
17 Nkyambisi, ntangaali̱ kandi mukilo,
nkutakanganagha nimughambila bijibu byanje kandi aku̱nji̱ghu̱wagha.
18 Aku̱nku̱u̱ki̱yagha nteekaane
ku̱lu̱gha haa malemo agha nkulwanagha na ngi̱ghu̱ syanje sikani̱ye.
19 Luhanga oghu alemi̱ye bilo nʼebilo,
aku̱nji̱ghu̱wagha kandi abadhooti̱ya.
Ngi̱ghu̱ syanje bakubhengagha kuhindula haa ebi bakukolagha,
ebo tabakwobahagha Luhanga.
20 Bhootu̱ syanje akaneehindukiilila
kandi aahenda eki aalaghi̱i̱sani̱i̱ye.
21 Bighambo biye biheheeye nga magita,
bhaatu mu mutima ghuwe aasuuyemu etima,
bighambo biye biheheeye nga mafu̱ta,
bhaatu bikujombagha nga kihiyo kyoghiiye.
22 Bijibu byawe obikwati̱ye Mukama
kandi akukulinda,
taakulekagha bantu bahi̱ki̱li̱i̱ye mbabasi̱ngu̱la.
23 Bhaatu uwe, Ai̱ Luhanga,
okuleka baji̱ndi̱ kandi bahi̱ baa bisubha aba,
baku̱we batakamali̱ye na kimui
kyakabili kya bwomi̱i̱li̱ bwabo.
Bhaatu si̱ye, ndaakalagha nkwesi̱ghi̱ye.