56
Nsaala ya kwesigha Luhanga
Ewaa mukulu wa bilimbo. Kusighikila haa elaka lya Ki̱i̱bbi̱mbo ekili mu Ki̱i̱looku̱ hambali haseli̱ye. Jabbu̱li̱ ya Dhau̱dhi̱ obu Bafi̱li̱si̱ti̱ baamukwatiiye e Gati̱.
1 Ai̱ Luhanga, ongilile kisa, nanga bantu niibuwo bandu̱mba,
ngi̱ghu̱ syanje bakuukalagha mbambona-boni̱ya bwile bwona.
2 Ngi̱ghu̱ syanje bakumalagha kilo kyona mbanandu̱mba
kandi bantu bakani̱ye bakuukalagha mbandwani̱i̱si̱ya
haabwa myepanko yabo.
3 Bhaatu nkaakubaagha noobahi̱ye,
nuuwe nkwesighagha.
4 Nkusinda Luhanga haabwa ebi aalaghi̱i̱sani̱i̱ye,
nkwesighagha Luhanga kandi tankwobaha.
Muntu kwonkaha akugubha kunkola ki?
5 Ngi̱ghu̱ syanje bakumalagha kilo kyona mbanandeeteleja bijibu,
bakuukalagha mbategheka ngoku bakumbona-boni̱ya.
6 Baku̱neebi̱si̱i̱li̱lagha
kandi baakala baloli̱ye byona ebi nkwete kukola,
mbabbala kunjita.
7 Ai̱ Luhanga, obafubile haabwa bintu bi̱bhi̱i̱hi̱ye bakwete kukola,
osi̱ngu̱le bantu aba mu ki̱i̱ni̱gha kyawe!
8 Omani̱ye ngoku ndi mu bijibu,
okumaani̱li̱ye mali̱gha ghanje ghoona mu cu̱pa yaawe.
Buuye taghahandi̱i̱ku̱u̱we mu kitabo kyawe?
9 Kilo eki nkukubilikila kunkoonela,
ngi̱ghu̱ syanje okubaku̱u̱ki̱ya enu̱ma.
Eki nkimani̱ye nanga Luhanga ali haa luhande lwanje.
10 Nkusinda Luhanga haabwa ebi aalaghi̱i̱sani̱i̱ye,
nkusinda Mukama haabwa ebi aalaghi̱i̱sani̱i̱ye.
11 Nkwesighagha Luhanga kandi tankwobaha.
Muntu kwonkaha akugubha kunkola ki?
12 Ai̱ Luhanga wanje, nkukola ebi naalahiiye,
nkuhaayo kihonguwa kya ku̱ku̱si̱i̱ma haabwa bu̱kooneli̱ bwawe.
13 Okancungula ku̱lu̱gha mu lu̱ku̱,
waalinda bighele byanje kutatelebuka,
niikuwo ndubhatangile mu maaso ghaa Luhanga,
mu kyeleeli̱ ekikutwalagha mu bwomi̱i̱li̱.