57
Nsaala ya kusaba bu̱kooneli̱
Ewaa mukulu wa bilimbo. Kusighikila haa elaka “Otahwelekeeleli̱ya.” Jabbu̱li̱ ya Dhau̱dhi̱, obu aabaagha mu ki̱i̱na kyʼebaale, amali̱ye kuuluka ewaa Saulo.
1 Ai̱ Luhanga, ongilile kisa,
ongilile kisa, nanga nuuwe buulukilo bwanje.
Nkuulukila mu ki̱i̱ku̱dhu̱ kya mapapa ghaawe,
ku̱hi̱ki̱ya kabhi kaa kuhwelekeelela kansaaye.
2 Nkubilikilagha Luhanga wa Eghulu Munu,
Luhanga oghu akumpaagha byona ebi nkwetaaghisibuwa.
3 Akunkuukamu anali mu eghulu kandi anjune,
aku̱si̱ngu̱la abakwete kundwani̱i̱si̱ya.
Luhanga akunjoleka kukunda kuwe kwamaani̱
kandi bwesighibuwa buwe.
4 Ngi̱ghu̱ syanje baneeli̱ghi̱li̱i̱ye,
bali nga ntale njala ekwete,
esikubbala nyama sya bantu sya kuliya.
Maano ghaabo ghali nga mati̱mu̱ kandi bimala,
bilimi byabo bili nga bihiyo byoghiiye.
5 Ai̱ Luhanga, woolekele eghulu mu mwanya bukulu bwawe
kandi ki̱ti̱i̱ni̱sa kyawe kimalakake munsi yoona.
6 Ngi̱ghu̱ syanje bantegheeye kati̱mba kunkwata,
kutuntula kwammali̱ye maani̱.
Baali̱mi̱ye ki̱i̱na mu kihanda kyanje,
bhaatu ebo boonini niibo bakwegengamu.
7 Ai̱ Luhanga, mutima ghwanje ghu̱gu̱mi̱ye,
mutima ghwanje ghu̱gu̱mi̱ye kwonini!
Nkulimba kandi nkusinde!
8 Osu̱su̱mu̱ke mwoyo ghwanje!
Osu̱su̱mu̱ke uwe du̱ngu̱ kandi li̱kembe.
Ndasu̱su̱mu̱kagha nkyambisi cu̱i̱-cu̱i̱ kulimba.
9 Ai̱ Mukama, nku̱ku̱si̱i̱ma mu mahanga,
nkulimba ninkusinda mu bantu boona.
10 Kukunda kwawe kwamaani̱ ku̱hi̱ki̱ye eghulu
kandi bwesighibuwa bwawe bughendeeye kimui mu bicu.
11 Ai̱ Luhanga, woolekele eghulu mu mwanya bukulu bwawe
kandi ki̱ti̱i̱ni̱sa kyawe kimalakake munsi yoona.