58
Luhanga oghu aku̱twi̱lagha nsi musango
Ewaa mukulu wa bilimbo. Kusighikila haa elaka “Otahwelekeeleli̱ya.” Jabbu̱li̱ ya Dhau̱dhi̱.
1 Buuye enu̱we bakama mu̱ku̱bu̱ghagha mu bwengani̱ja?
Mu̱ku̱twi̱lagha bantu musango mu mulingo ghu̱hi̱ki̱ye?
2 Bbaa, mukuukalagha ni̱mweli̱li̱kana haa mitima yaanu kukola bintu bi̱bhi̱i̱hi̱ye,
mukuleetagha butabanguko munsi.
3 Bantu babhi bakukolagha bintu bi̱bhi̱i̱hi̱ye
kandi batandika kuha bisubha ku̱lu̱gha haa ku̱byaluwa.
4 Baasuuyemu buseguwa nga njoka.
Bali nga teekpe matui ghaaghaaye,
5 niikuwo sitaaghu̱wa elaka lya ndele eghi mu̱ku̱mu̱ akusiteelela ku̱si̱holeesi̱ya.
Sibhenga bilimbo biye bya maaje.
6 Ai̱ Luhanga, ohende maano ghaa ntale esinali sito esi.
Mukama, osikobhe maano agha mu kanu̱wa.
7 Oleke babulangaane nga maasi baseesi̱ye hansi.
Oleke bimala bakwete kubhasula bitalasa kantu.
8 Oleke babe nga kitinda ekikubona-bonela mu kyanda
kandi nga mwana abyahuwe aku̱u̱ye oghu ataakubonagha musana.
9 Luhanga akubajomba nga bi̱si̱ngo batamani̱ye,
mu ki̱i̱ni̱gha kiye akubamalʼo boona.
10 Bahi̱ki̱li̱i̱ye balidheedhuwa kubona basi̱i̱si̱ mbafubiluwa,
balinaaba bighele byabo mu saghama ya bantu babhi.
11 Bantu balighila bati,
“Ni majima ngu haliyo mpeela ya bantu bahi̱ki̱li̱i̱ye
kandi majima Luhanga aliyo oghu aku̱twi̱lagha nsi musango.”