59
Nsaala ya kusaba bu̱li̱ndi̱ mu ngi̱ghu̱
Ewaa mukulu wa bilimbo. Kusighikila haa elaka “Otahwelekeeleli̱ya.” Jabbu̱li̱ ya Dhau̱dhi̱, obu Saulo aatu̱mi̱ye bantu haa numba ya Dhau̱dhi̱ niikuwo bamwite.
1 Ai̱ Luhanga, oncungule ku̱lu̱gha mu ngi̱ghu̱ syanje,
ondinde mu bantu abaasi̱ye kundwani̱i̱si̱ya.
2 Oncungule ku̱lu̱gha mu bantu babhi aba
kandi onjune ku̱lu̱gha mu baji̱ndi̱ aba.
3 Mukama, olole bali̱ndi̱ye kwita si̱ye,
bantu basaakaaye beekumaani̱li̱i̱ye hamui ku̱ndu̱mba.
Bakwete kukola eki nankabha ntali nʼeki nsobeei̱ye.
4 Tandi nʼeki nsobeei̱ye, bhaatu beeteekani̱i̱je ku̱ndu̱mba.
Oomuke, olole ebikwete kubʼo kandi onkoonele!
5 Ai̱ Mukama Luhanga waamahe, Luhanga wa I̱saaleeli̱,
oomuke kandi ofubile mahanga aghasaakaaye agha.
Otaghilila kisa bantu babhi kandi baghobi̱ya aba.
6 Bakwisagha lwagholo, mbagboma nga mbuwa
kandi bamalakaka kibugha kyona.
7 Baku̱bu̱ghagha bintu bibhi mu kanu̱wa kaabo,
bighambo ebikubalu̱ghagha haa bilimi bikujombagha nga bihiyo
kandi baghila bati, “Taaliyo oghu atu̱u̱ghu̱u̱ye!”
8 Bhaatu uwe, Mukama, okubasekeelelagha
kandi okughayagha ntegheka syabo esitali na mughaso.
9 Ai̱ Luhanga, neesi̱ghi̱ye maani̱ ghaawe.
Nuuwe nkulinda, nanga nuuwe kigho kyanje.
10 Luhanga akwisa kunjuna haabwa kukunda kuwe kwamaani̱,
aakuleka mbone ngoku aku̱si̱ngu̱la ngi̱ghu̱ syanje.
11 Ai̱ Luhanga, otaata bantu aba bwangu,
nanga bantu banje bakuubululuwa ngoku okufubilagha bantu babhi.
Obahanjaage haabwa maani̱ ghaawe kandi obasi̱ngu̱le,
Ai̱ Mukama, ngabo yaatu.
12 Baku̱bu̱ghagha bighambo bi̱bhi̱i̱hi̱ye,
nahabweki oleke bighambo bya myepanko,
kukiina kandi kuha bisubha ebi,
aliibo byakwata boonini.
13 Obahwelekeeleli̱ye mu ki̱i̱ni̱gha kyawe,
obahwelekeeleli̱ye ku̱hi̱ki̱ya obamaliiyʼo kimui,
niikuwo bantu bamanye ngoku Luhanga olemi̱ye bantu baa I̱saaleeli̱
kandi ngoku olemi̱ye nsi yoona.
14 Bakwisagha lwagholo, mbagboma nga mbuwa
kandi bamalakaka kibugha kyona.
15 Bakuyaayagha mbabbala byokuliya,
bhaatu baghenda kulangaala bataaku̱ti̱ye.
16 Bhaatu si̱ye, nkulimba ni̱nku̱mi̱ya maani̱ ghaawe.
Bu̱li̱ nkyambisi ndalimbagha ndheedheeu̱we haa kukunda kwawe kwamaani̱.
Nuuwe buulukilo bwanje
kandi ki̱i̱kalo nkwebi̱si̱laghamu ndi mu bijibu.
17 Ai̱ Luhanga, nuuwe okulekagha mba wamaani̱, nkulimba ninkusinda,
nanga nuuwe kigho kyanje
kandi okunjolekagha kukunda kwawe kwamaani̱.