60
Nsaala ya kusaba bu̱kooneli̱ kulwani̱i̱si̱ya ngi̱ghu̱
Ewaa mukulu wa bilimbo. Jabbu̱li̱ ya Dhau̱dhi̱ ya mughaso haa kwegheesi̱ya, kusighikila bwile obu Dhau̱dhi̱ na baa Alaamu-nahalahi̱mu̱ hamui na Alaamu-joba kandi Yowaabu aakuuka kandi aata bantu baa Edomu mutwalo ghumui na nku̱mi̱ ebili mu Kighona kya Kisula.
1 Ai̱ Luhanga, waatu̱bhengi̱ye kandi waatumala maani̱,
waatukwatiluuwe ki̱i̱ni̱gha,
bhaatu endindi otodhe otufoole baamaani̱.
2 Okaleka nsi yaatu yaadhinga-dhinga kandi yaatikaatika,
ooghalile ebyatikaati̱ki̱ye ebi,
nanga eli mahwelekeelela.
3 Okaleka bantu baawe baabona-bona kwonini
kandi waatuha vi̱i̱ni̱ eghi twanooye yaatutami̱i̱li̱ya.
4 Abaku̱ku̱hu̱ti̱yagha okubataaghʼo kabonelo,
niikuwo bagubhe kuuluka buta bwa ngi̱ghu̱ syatu.
5 Otujune na mukono ghwawe ghwabuliyo kandi okuukemu kusaba kwatu,
niikuwo aba oku̱ndi̱ye bagubhe kucunguluwa.
6 Luhanga akabu̱gha ali mu ki̱i̱kalo kiye ki̱hi̱ki̱li̱i̱ye ati,
“Nkutambulani̱yamu ndheedheeu̱we tau̱ni̱ ya Sekeemu
kandi ngabile bantu banje kighona kya Su̱kooti̱.”
7 Byalo bya Gi̱li̱yaadi̱ na Manase ni byanje.
Efulahi̱mu̱ niiye kiisipeewa kyanje kya kyoma,
Yu̱da niiye mwi̱gho ghwanje ghwa bukama.
8 Mowaabu niiye bbaafu yanje nkunaabilaghamu,
Edomu niiyo ndikuba nkai̱to syanje,
mu Fi̱li̱si̱ti̱ya niiyo ndi̱bu̱ghi̱la nʼelaka lyamaani̱ lya bu̱si̱ngu̱li̱.
9 Ni ani̱ alintwala mu kibugha ekili na bigho bi̱gu̱mi̱ye?
Ni ani̱ akumpikila kuntwala mu kyalo kya Edomu?
10 Ai̱ Luhanga, majima waatu̱bhengi̱ye?
Tookutodha kughenda hamui na baasilikale baatu?
11 Otukoonele kulwani̱i̱si̱ya ngi̱ghu̱ syatu,
nanga bu̱kooneli̱ bwa bantu tabuli na mughaso.
12 Luhanga naabaaye ali hamui naatu tu̱ku̱si̱ngu̱la
kandi akukpeetaagula ngi̱ghu̱ syatu.