61
Nsaala ya kusaba kulinduwa
Ewaa mukulu wa bilimbo. Naakoleesi̱ya du̱ngu̱. Jabbu̱li̱ ya Dhau̱dhi̱.
1 Ai̱ Luhanga, ooghu̱we kutakangana kwanje,
otegheeleli̱ye kusaba kwanje.
2 Nkaakubaagha nsobeeuwe kandi mutima ghu̱ndu̱hi̱ye munda,
nkukubilikilagha ndi hambali haseli̱ye na ka yanje.
Ompikile kuntwala mu kikuka kikangami̱ye hambali nkuukala kusemeeye.
3 Nuuwe buulukilo bwanje
kandi ngbaali yamaani̱ ekangami̱ye kunkingilila ngi̱ghu̱ syanje.
4 Oleke niikale mu weema yaawe bilo nʼebilo
kandi niilukile mu ki̱i̱ku̱dhu̱ kya mapapa ghaawe.
5 Ai̱ Luhanga, okaaghu̱wa ebi naalahiiye
kandi wampa bugwetuwa obu okuhaagha abahu̱ti̱i̱ye li̱i̱na lyawe.
6 Ohe mukama bwomi̱i̱li̱ bukani̱ye
kandi oleke ahangaale mu mijo yoona.
7 Ai̱ Luhanga, oleke aleme hansi ya bu̱loleeleli̱ bwawe bilo nʼebilo,
omulinde haabwa kukunda kwawe kwamaani̱ kandi bwesighibuwa.
8 Ndalimbagha bwile bwona bilimbo bya kusinda li̱i̱na lyawe
kandi bu̱li̱ kilo nkuhongelaghe ebi neelaghi̱i̱sani̱i̱ye.