62
Luhanga niiye buulukilo bwanje
Ewaa mukulu wa bilimbo. Kusighikila haa Yedu̱tu̱u̱ni̱ mukulu wa bilimbo. Jabbu̱li̱ ya Dhau̱dhi̱.
1 Mwoyo ghwanje ghukuhuumulilagha mu Luhanga enkaha,
niiye enkaha akunjunagha.
2 Eye enkaha niiye kikuka kyanje kandi kujunuwa kwanje,
niiye kigho kyanje, tandi na eki̱ku̱ntu̱ku̱mi̱li̱ya.
3 Nkwehi̱ghu̱wagha ndi nga lugho lu̱ceki̱ye kandi olukubbala kwegenga,
mu̱ku̱hi̱ki̱ya dhi̱ enu̱we boona,
kundwani̱i̱si̱ya kandi kuunambula?
4 Bakubbala kunjiya haa ki̱i̱kalo kyanje kyamaani̱.
Babbali̱ye kuha bisubha.
Bakuhaagha mu̱gi̱sa na kanu̱wa kaabo,
bhaatu mu mitima yabo bakiina.
5 Mwoyo ghwanje ghwesi̱ghi̱ye Luhanga enkaha,
niiye nkutaaghamu kunihila kwanje.
6 Eye enkaha niiye kikuka kyanje kandi kujunuwa kwanje,
niiye buulukilo bwanje, tandi na eki̱ku̱ntu̱ku̱mi̱li̱ya.
7 Ki̱ti̱i̱ni̱sa kandi bu̱si̱ngu̱li̱ bwanje bi̱ku̱lu̱ghagha ewaa Luhanga,
niiye buulukilo bwanje, kikuka hambali ngi̱ghu̱ sitaakugubha ku̱mpi̱kʼo.
8 Mwesighe Luhanga bwile bwona, enu̱we bantu banje,
mumughambile bijibu byanu byona, nanga niiye buulukilo bwatu.
9 Bantu bali nga lwoha kwonkaha,
aba bahu̱ti̱i̱ye nʼaba batahu̱ti̱i̱ye boona tabalimu mughaso,
nuwaabapi̱i̱mi̱ye haa minjaani̱ tabalimu kantu.
Bawaawaane kusaali̱ya lwoha.
10 Muleke kwesigha butabanguko, kedha kwepanka haabwa bintu bya busuma,
nimwanatu̱ngi̱ye muleke kuta mitima yaanu haa buguudha.
11 Naaghu̱u̱ye Luhanga naabu̱gha,
kini naaki̱i̱ghu̱u̱ye milundi esaaye haa ghumui ati niiye ali na bu̱toki̱
12 kandi ati ali na kukunda kwamaani̱.
Ai̱ Mukama, okuhaagha mpeela bu̱li̱ muntu kusighikila haa ebi aakukolagha.