63
Kubbala Luhanga
Jabbu̱li̱ ya Dhau̱dhi̱, obu aabaagha mu elungu mu nsi ya Yu̱da.
1 Ai̱ Luhanga, nuuwe Luhanga wanje.
Nkwete kukubbala kwonini,
mwoyo ghwanje ghuli na eliyo lyawe.
Mubili ghwanje niibuwo ghwakubbala
ngoku muntu oghu ali mu elungu,
hambali kyalo kyomi̱ye, akubbalagha maasi.
2 Naakuboone mu ki̱i̱kalo ki̱hi̱ki̱li̱i̱ye kyawe
kandi naabona ngoku oli wamaani̱ kandi wa ki̱ti̱i̱ni̱sa.
3 Kukunda kwawe kwamaani̱ kusaai̱ye bwomi̱i̱li̱,
nahabweki nkukusinda.
4 Ndaku̱si̱i̱magha ninali mwomi̱i̱li̱,
ndaamu̱ki̱yagha mikono yanje ewaawe mu nsaala.
5 Mwoyo ghwanje ghukuukuta byokuliya bisemeleeye kimui
kandi nkulimba bilimbo bya kudheedhuwa ninkusinda.
6 Nkaakubaagha ndi haa bulili bwanje nkukuusukagha.
Nkumalagha mukilo yoona niinakweli̱li̱kanʼo,
7 nanga nuuwe mu̱kooneli̱ wanje.
Nkulimba ndheedheeu̱we mu ki̱i̱ku̱dhu̱ kya mapapa ghaawe.
8 Nuuwe nkwebohelaghʼo
kandi mukono ghwawe ghwabuliyo ghukundindagha kusemeeye.
9 Abakubbala kunjita bakuhwelekeelela,
baghende eku̱li̱mu̱ mu etaka.
10 Bakwituwa bihiyo
kandi mi̱ku̱ yabo eliibuwe mbuwa sya mu kisaka.
11 Mukama akudheedheluwa mu Luhanga.
Ti̱ boona abeesi̱ghi̱ye Luhanga bakumusinda,
bhaatu aliighala kanu̱wa kaa abakuhaagha bisubha.