64
Nsaala ya kusaba kulinduwa
Ewaa mukulu wa bilimbo. Jabbu̱li̱ ya Dhau̱dhi̱.
1 Ai̱ Luhanga, ndi mu bijibu, ooghu̱we kusaba kwanje.
Noobahi̱ye ngi̱ghu̱ syanje, gutu ojune bwomi̱i̱li̱ bwanje.
2 Ondinde ku̱lu̱gha mu ebi bantu babhi bakwete kutegheka kunkolʼo,
ku̱lu̱gha mu kiigambi̱ kya bantu abakukolagha bintu bi̱bhi̱i̱hi̱ye.
3 Bakwoghi̱i̱li̱yagha bilimi byabo nga bihiyo,
bighambo byabo bisaakaaye bili nga bimala.
4 Baba nga bantu balu̱ghi̱ye hambali beebi̱si̱ye kulasa muntu atali na musango,
kumulasa bwangu kandi batoobahi̱ye.
5 Bakutaanaghamu maani̱ kukola bintu bi̱bhi̱i̱hi̱ye.
Bategheka ngoku bakutegha bi̱ki̱ya byabo mu ki̱bi̱so.
Baghila bati, “Taaliyo oghu atuboone.”
6 Bakukolagha ntegheka sya kukola bintu bi̱bhi̱i̱hi̱ye.
Baghila bati, “Twataayʼo ntegheka si̱hi̱ki̱ye kwonini!”
Mutima kandi byeli̱li̱kano bya muntu bitimbiikaane kubikenga.
7 Bhaatu Luhanga eenini alibalasa na bimala,
bahutaale batakakimani̱ye.
8 Alibahwelekeeleli̱ya haabwa bighambo baku̱bu̱ghagha ebi.
Abalibabona boona baliikala ku̱dhi̱ngi̱ya mituwe banasweki̱ye.
9 Bantu boona balyobaha
kandi balangilile ebi Luhanga akukolagha.
Ti̱ nabo boonini bali̱byeli̱li̱kanʼo bhyani.
10 Bantu bahi̱ki̱li̱i̱ye boona balidheedheluwa mu Mukama
kandi bamuulukilʼo!
Ti̱ boona abali na mitima esemeeye balimusinda.