65
Kusinda kandi ku̱si̱i̱ma Luhanga
Ewaa mukulu wa bilimbo. Kilimbo. Jabbu̱li̱ ya Dhau̱dhi̱.
1 Ai̱ Luhanga, ki̱hi̱ki̱ye etu̱we kukusinda mu Sayu̱u̱ni̱
kandi kuukala ntukola ebi twakulaghi̱i̱sani̱i̱ye,
2 nanga okukuukaghamu nsaala syatu.
Bantu boona baliisa ewaawe.
3 Nankabha tuba tuli na bibhi bikani̱ye,
uwe okutughanilagha biyo.
4 Bali na mu̱gi̱sa aba okukomagha
kandi obaleeta mu bbalaaji syawe.
Tuliikuta bintu bisemeeye ebili mu numba yaawe,
mi̱gi̱sa eghi eli mu Numba yaawe ehi̱ki̱li̱i̱ye.
5 Ai̱ Luhanga Mu̱ju̱ni̱ waatu, mu bwesighibuwa bwawe okukuukaghamu nsaala syatu,
nookola byakuswekani̱ya.
Nuuwe bantu abali munsi yoona bakutaaghamu kunihila kwabo,
nankabha na abali haa maananja hambali haseli̱ye.
6 Haabwa maani̱ ghaawe okata myena hambali eli
kandi wooleka bu̱toki̱ bwamaani̱ ghaawe.
7 Nuuwe oku̱bhondi̱yagha maananja ghaasuuye
kandi kugola kwa mighina yagho.
Oku̱holeesi̱yagha bantu abatu̱u̱ye nsi̱si̱.
8 Bantu abali hambali haseli̱ye munu haakumaliilila kwa nsi,
bakuukalagha basweki̱ye haabwa byakuswekani̱ya byawe.
Ku̱lu̱gha bu̱lu̱gha ejooba ku̱hi̱ka bughuwa ejooba,
nuuwe okulekagha bantu abaliyeyo boona badheedhuwa.
9 Okwolekagha ngoku ofu̱u̱yʼo nsi nootoni̱yamu mbu̱la.
Okughihaagha buguudha kandi lwejo.
Okutaagha maasi ghakani̱ye mu etaka
kandi oleka li̱twesi̱ya bilimuwa bya bu̱li̱ mulingo.
Okateekani̱ja oti aliikuwo kyaba.
10 Oku̱tooni̱yagha mbu̱la mu misili
kandi wenganangani̱ya mi̱goli̱.
Oku̱ghi̱tooni̱yagha ku̱dhooti̱ya etaka,
oleka li̱twesi̱ya bilimuwa bikani̱ye.
11 Okaakuhaagha etaka mu̱gi̱sa,
bantu bahulula bikani̱ye,
hambali okaakughendagha,
bakutungagha byokuliya bikani̱ye.
12 Oku̱twesi̱yagha bi̱si̱ngo bikani̱ye mu mali̱i̱si̱li̱yo ghʼomu elungu
kandi myena edheedhuwa.
13 Oku̱u̱su̱li̱yagha bisolo mu mali̱i̱si̱li̱yo
kandi oleka ngano yeelela kimui mu bighona.
Bu̱li̱ kintu ki̱bu̱gha nʼelaka lyamaani̱ kandi kilimba haabwa kudheedhuwa.