66
Kilimbo kya kusinda kandi ku̱si̱i̱ma Luhanga
Ewaa mukulu wa bilimbo. Kilimbo. Jabbu̱li̱.
1 Musinde Luhanga nʼelaka lyamaani̱,
lya kudheedhuwa enu̱we nsi yoona.
2 Mulimbile li̱i̱na liye lya ki̱ti̱i̱ni̱sa.
Mumusinde haabwa ki̱ti̱i̱ni̱sa kiye.
3 Mughambile Luhanga muti,
“Ebi okukolagha bikuswekani̱yagha!
Bu̱toki̱ bwawe ni bwamaani̱,
bukulekagha ngi̱ghu̱ syawe,
bateeli̱ye mu maaso ghaawe boobahi̱ye.
4 Nsi yoona ekukulami̱yagha,
balimba mbakusinda.
Balimba mbasinda li̱i̱na lyawe.”
5 Mwise mulole ebi Luhanga akukolagha.
Byakuswekani̱ya byamaani̱,
ebi akukolagha mu bantu!
6 Akata kihanda kyomi̱ye mu nanja.
Baataata baatu baabhasuka maasi agha hʼetaka lyomi̱ye.
Tukudheedhuwagha haabwa eki aakoli̱ye.
7 Alemi̱ye bilo nʼebilo haabwa maani̱ ghe.
Akuukalagha aloli̱ye mahanga,
nahabweki baheekela baleke kwepanka.
8 Mu̱si̱i̱me Luhanga waatu, enu̱we bantu boona.
Muleke elaka lya kumusinda bantu bali̱i̱ghu̱we.
9 Niiye atu̱li̱ndi̱ye kuukala tuli boomi̱i̱li̱
kandi ataasi̱i̱mi̱lani̱ya bighele byatu kutelebuka.
10 Ai̱ Luhanga, nuuwe okatulengesa,
ngoku bakulengesagha siliva mu mulilo ku̱ghi̱semeli̱ya.
11 Okatuleeta mu nkomo
kandi waatu̱heeki̱ya nku̱mba si̱lyoti̱ye haa mighongo yaatu.
12 Okaleka ngi̱ghu̱ syatu baatu̱ni̱i̱na haa mituwe.
Twakwamila mu mulilo kandi mu maasi,
bhaatu waatuleeta mu ki̱i̱kalo ekilimu bintu byona bisemeeye.
13 Nkwisa mu numba yaawe na bihonguwa byona byokeei̱ye.
Nkukuhongela ebi neelaghi̱i̱sani̱i̱ye.
14 Ebi naabu̱ghi̱ye na mi̱nu̱wa yanje
kandi kanu̱wa kanje obu naabaagha mu bijibu.
15 Nkukuhongela bihonguwa byona byokeei̱ye bya bisolo ebili na bisabu
kandi na bihonguwa bya ntaama.
Ndakuhongelagha bihonguwa bya ntu̱u̱li̱ ya nte kandi mbu̱li̱.
16 Mwise mu̱tegheeleli̱ye enu̱we boona abahu̱ti̱i̱ye Luhanga.
Nkubaghambila ebi ankoleeye.
17 Nkamubilikila na elaka lyamaani̱ mu nsaala.
Naalimba na kanu̱wa kanje bilimbo bya kumusinda.
18 Nguli naabi̱i̱ki̱ye bibhi ebi naakoli̱ye haa mutima ghwanje,
Mukama tangu̱ntegheleei̱ye.
19 Bhaatu majima Luhanga akanji̱ghu̱wa.
Aategheeleli̱ya kusaba kwanje.
20 Nku̱si̱i̱ma Luhanga,
nanga kusaba kwanje taaku̱bhengi̱ye,
kedha kunjiyʼo kukunda kuwe kwamaani̱.