83
Nsaala ya ku̱si̱ngu̱la ngi̱ghu̱ sya I̱saaleeli̱
Kilimbo. Jabbu̱li̱ ya Asafu.
1 Ai̱ Luhanga, otaakala otaaku̱bu̱gha.
Ai̱ Luhanga otaakala oholeei̱ye bhi̱i̱
kandi otali nʼeki okukola.
2 Olole, ngi̱ghu̱ syawe niibuwo baatu̱wa nsi̱si̱.
Abakwohi̱ye niibuwo baakujeemela.
3 Bakwete kukola ntegheka syabo mu ki̱bi̱so,
kukola kubhi bantu baawe.
Baakuteghekagha kukola kubhi bantu baawe aba oli̱ndi̱ye.
4 Bakwete kughila bati, “Mwise, muleke tu̱hwelekeeleli̱ye ehanga eli,
niikuwo batatodha kuusuka li̱i̱na lya Banai̱saaleeli̱ aba.”
5 Baaghu̱waane haa ntegheka syabo
kandi baakoleeye hamui ndaghaano ya kukulwani̱i̱si̱ya.
6 Bantu aba ni baa ntu̱la sini: Edomu, Banasumai̱li̱,
Mowaabu na Banahagali̱.
7 Bantu baa Gebbaali̱, Amooni̱, na Bameleeki̱,
Bafi̱li̱si̱ti̱ kandi na baa Ti̱lo.
8 Banasi̱li̱ya nabo baalungaane nabo,
na bantu baamaani̱ baasukulu baa Looti̱.
9 Obakole eki waakoli̱ye bantu baa Mi̱di̱yaani̱,
baa Si̱sela na baa Yabbini haa maasi ghaa Ki̱sooni̱.
10 Okabasi̱ngu̱la mu ki̱i̱kalo kya Endola.
Mi̱ku̱ yabo yandakaalala hansi nga mabhi̱ ghaa nte.
11 Okole beebembeli̱ baabo eki waakoli̱yʼo Olebbu na Jeebbu.
Osi̱ngu̱le balemi̱ baabo ngoku waasi̱ngu̱u̱ye Jebba kandi Jalumuna.
12 Balemi̱ aba bakaghila bati,
“Tukwetwalila nsi ya Luhanga ebe yaatu.”
13 Ai̱ Luhanga, obahanjaage nga tu̱u̱tu̱
kandi nga bisunga ebi mpwegha ekwete ku̱hu̱ngi̱ya.
14 Ngoku mulilo ghu̱kwoki̱yagha ki̱bhi̱li̱
kandi ngoku ghu̱kwoki̱yagha bi̱si̱ngo bya haa mwena,
15 naawe aliikuwo wabahuma na mwegha ghwawe.
Oboobahi̱i̱li̱li̱ye na kyegha kyawe kyamaani̱.
16 Ai̱ Mukama, obooleke ngoku bahemu̱ki̱ye,
ku̱hi̱ki̱ya badhooteeye li̱i̱na lyawe.
17 Oleke bahemuke kandi boobahe bilo nʼebilo,
oleke baku̱we baswaji̱bu̱u̱we.
18 Oleke bamanye ngu nuuwe Mukama enkaha.
Oli wa Eghulu Munu kandi olemi̱ye nsi yoona.