84
Kubbala kuba mu numba ya Luhanga
Ewaa mukulu wa bilimbo. Naakoleesi̱ya du̱ngu̱. Jabbu̱li̱ ya Banakoola.
1 Ai̱ Mukama waamahe,
ki̱i̱kalo okuukalaghamu kisemeeye kwonini!
2 Mwoyo ghwanje niibuwo ghwekumbula kwonini
kuba mu bbalaaji sya Mukama.
Mutima ghwanje kandi mubili ghwanje bikulimbagha
bi̱dheedheeu̱we ewaa Luhanga mwomi̱i̱li̱.
3 Nankabha masi̱i̱li̱ya, ghakukwelagha mu numba eghi.
Ntaai-taai sikukwelaghamu bisui byasiyo.
Si̱ku̱li̱li̱ya byana byasiyo haai nʼeki bakuhongelaghʼo bihonguwa.
Ai̱ Mukama waamahe,
mukama wanje kandi Luhanga wanje.
4 Bali na mu̱gi̱sa abakuukalagha mu numba yaawe,
mbakulimbila bilimbo bya kukusinda.
5 Bali na mu̱gi̱sa aba maani̱ ghaabo ghaku̱lu̱ghagha ewaawe.
Abakuukalagha mbeeli̱li̱kanʼo mu mitima yabo
kughenda haa mwena Sayu̱u̱ni̱.
6 Bakaakukwamilagha mu kighona kyomi̱ye kya Bbaka,
du̱mbi̱ maasi ghaa nsulo ghakiisamu.
Mbu̱la eghi eku̱du̱bhagha kutoonamu,
eku̱u̱su̱li̱yaghamu biihamba.
7 Bakughendagha mbaneeyongela kuba baamaani̱,
ku̱hi̱ki̱ya obu baliboneka mu maaso ghaa Luhanga mu Sayu̱u̱ni̱.
8 Ai̱ Mukama Luhanga waamahe, ooghu̱we kusaba kwanje.
Ai̱ Luhanga wa Yakobbo, ontegheeleli̱ye!
9 Ai̱ Luhanga, oghilile kisa ngabo yaatu,
mukama waatu oghu waaseesi̱yʼo magita.
10 Kilo kimui eki muntu akumalagha mu numba yaawe,
kisaai̱ye bilo lu̱ku̱mi̱ ebi akumalagha hanji hoona.
Si̱ye hakili mbe mu̱li̱ndi̱ wa haa mulyango ghwa numba ya Luhanga,
mu ki̱i̱kalo kya kuukala mu maka ghaa bantu babhi.
11 Mukama Luhanga,
nuuwe musana kandi ngabo yaatu.
Nuuwe okutughililagha ngughuma kandi otu̱hu̱ti̱ya.
Mukama taakubhenga kuha kintu kilungi kyona abakukolagha ebi̱hi̱ki̱ye.
12 Ai̱ Mukama waamahe,
ali na mu̱gi̱sa oghu akwesi̱ghi̱ye.