85
Nsaala ya ehanga kutunga bu̱si̱nge
Ewaa mukulu wa bilimbo. Jabbu̱li̱ ya Banakoola.
1 Mukama, okaghilila kisa nsi yaawe.
Waatodha waakula-kulani̱ya Banai̱saaleeli̱.
2 Okaayʼo bantu baawe bibhi byabo.
Waabaghanila ebi baaku̱sobeleei̱ye byona.
3 Okaleka kubakwatiluwa ki̱i̱ni̱gha.
Waaleka kubasaalililuwa kwonini.
4 Ai̱ Luhanga Mu̱ju̱ni̱ waatu,
otodhe otweku̱u̱ki̱li̱ye.
Oleke kutukwatiluwa ki̱i̱ni̱gha!
5 Okuukala onasaaluuwe haabwatu bilo nʼebilo?
Ki̱i̱ni̱gha kyawe ki̱ku̱hi̱kʼo mijo yoona?
6 Tookutodha ku̱tu̱ku̱u̱ki̱yamu maani̱
kandi kuleka bantu baawe mbadheedhuwa?
7 Ai̱ Mukama, otwoleke kukunda kwawe kwamaani̱
kandi otuhe kujuna kwawe.
8 Nku̱tegheeleli̱yagha ebi Mukama Luhanga aku̱bu̱ghagha.
Aku̱bu̱ghagha bya bu̱si̱nge haa bantu be bahi̱ki̱li̱i̱ye.
Abataakutodhagha bakola bintu byakidhoma-dhoma.
9 Majima eeteekani̱i̱je kujuna boona abaku̱mu̱hu̱ti̱yagha
kandi ki̱ti̱i̱ni̱sa kiye kikuukala munsi yaatu.
10 Kukunda kwawe kwamaani̱ kandi bwesighibuwa bikusanga-sangaana hamui.
Bu̱hi̱ki̱li̱i̱le kandi mpempa bikughuwana mu ki̱ku̱bha.
11 Bwesighibuwa bukutuwa ku̱lu̱gha mu etaka.
Bu̱hi̱ki̱li̱i̱le bukulola hansi ku̱lu̱gha mu eghulu.
12 Mukama akutuha bilungi bikani̱ye.
Nsi yaatu ekweli̱ya bilimuwa kusemeeye.
13 Bu̱hi̱ki̱li̱i̱le bukumuhikila
kandi bumuteekani̱li̱je kihanda.