86
Nsaala ya kusaba bu̱kooneli̱
Nsaala ya Dhau̱dhi̱.
1 Ai̱ Mukama, ontegheeleli̱ye kandi onkuukemu.
Ndi munaku kandi ndi mu bwetaagho.
2 Olinde bwomi̱i̱li̱ bwanje,
nanga nuuwe ndhooteeye.
Ai̱ Luhanga wanje, ojune mu̱heeleli̱ya waawe,
oghu akwesi̱ghi̱ye.
3 Ai̱ Mukama, ongilile ngughuma.
Nkumalagha kilo kyona niinakubilikila.
4 Ai̱ Mukama, oleke mu̱heeleli̱ya waawe adheedhuwe,
nanga nsaala syanje si̱ku̱ku̱hi̱kaghʼo.
5 Ai̱ Mukama, oli mulungi ewaatu
kandi okutughanilagha.
Oli na kukunda kwamaani̱ haa boona abakukusabagha kubakoonela.
6 Ai̱ Mukama, ooghu̱we kusaba kwanje.
Otegheeleli̱ye elaka lya kwesengeleli̱ya kwanje.
7 Nuuwe nkubilikilagha mu bwile bwa kijibu kyanje.
Oku̱u̱ghu̱wagha kusaba kwanje.
8 Ai̱ Mukama, taaliyo luhanga onji oghu akwengaane.
Taaliyo nʼomui oghu akukolagha nga ebi okukolagha.
9 Ai̱ Mukama, bantu baa mahanga ghoona agha waahangi̱ye,
bakwisa mu maaso ghaawe kukulami̱ya
kandi kusinda li̱i̱na lyawe.
10 Uwe oli wamaani̱ kandi okukolagha bintu byakuswekani̱ya.
Nuuwe Luhanga enkaha.
11 Ai̱ Mukama, onjegheesi̱ye kihanda kyawe,
niikuwo ngendele mu majima ghaawe.
Ongu̱mi̱ye mutima,
niikuwo ni̱hu̱ti̱ye li̱i̱na lyawe.
12 Ai̱ Mukama Luhanga wanje,
nkukusinda na mutima ghwanje ghwona.
Nkuha ki̱ti̱i̱ni̱sa li̱i̱na lyawe bilo nʼebilo.
13 Okangilila kukunda kwamaani̱
kandi wanjuna ku̱lu̱gha eku̱li̱mu̱ mu kituulo.
14 Ai̱ Luhanga, bantu baa myepanko niibuwo bandu̱mba.
Ki̱bbu̱la kya bantu babhi,
abatakwobahi̱ye, bakubbala kunjita.
15 Bhaatu uwe, Ai̱ Mukama, oli Luhanga wa kisa kandi wa ngughuma.
Tookusaaliluwagha bwangu-bwangu.
Oli na kukunda kwamaani̱ kandi bwesighibuwa.
16 Ohinduke ondole kandi ongilile kisa.
Ohe maani̱ ghaawe si̱ye mu̱heeleli̱ya waawe,
nanga nku̱ku̱heeleli̱yagha ngoku maaha aakolagha.
17 Ompe kaakulolelʼo kaa bulungi bwawe,
niikuwo ngi̱ghu̱ syanje bakabone kandi bahemuke.
Ai̱ Mukama, nuuwe okankoonela kandi wampu̱mu̱li̱ya.