88
Nsaala ya kusaba bu̱kooneli̱
Kilimbo. Jabbu̱li̱ ya Banakoola. Ewaa mukulu wa bilimbo, kusighikila haa Mahalata Li̱noti̱. Jabbu̱li̱ ya Hemani̱ Omujelahi̱ti̱.
1 Ai̱ Mukama Luhanga, mu̱ju̱ni̱ wanje,
ntangaali̱ kandi mukilo nkukubilikilagha kunkoonela.
2 Ooghu̱we kusaba kwanje.
Otegheeleli̱ye kutakangana kwanje kunkoonela!
3 Bijibu byampingulaane
kandi ndi haai ku̱ku̱wa.
4 Ndi nga bantu banji boona abali haai ku̱ku̱wa,
nanga maani̱ ghampooye.
5 Ndi nga muntu bati̱ghi̱ye mu baku̱u̱ye,
nga mu̱ku̱ ghulangaaye mu kituulo.
Ndi nga bantu aba otaakutodhagha kuusuka,
nanga tabakyatunga bu̱kooneli̱ bwawe.
6 Wantaaye eku̱li̱mu̱ mu kituulo,
mu ki̱i̱kalo ekilimu mweli̱ma
kandi ekitobheeye kwonini.
7 Wangiliiye ki̱i̱ni̱gha kikani̱ye
kandi wanswi̱ki̱la na mighina yaawe yoona.
8 Waaleki̱ye baabhootu̱ syanje bandu̱ghʼo.
Wanfooye mu ebo kinughuwa
kandi ndi nga munyankomo,
oghu ataakugubha kuuluka.
9 Ai̱ Mukama tankubonagha kusemeeye haabwa kulila kukani̱ye.
Nuuwe nkubilikilagha bu̱li̱ kilo.
Nku̱u̱mu̱ki̱yagha mikono yanje ewaawe mu nsaala.
10 Buuye okukolelagha baku̱u̱ye byakuswekani̱ya?
Buuye ebo bakugubha kukusinda?
11 Abali mu bituulo bakugubha kulangilila kukunda kwawe kwamaani̱?
Bakughambila bati̱ya bantu banji bwesighisibuwa bwawe,
banali mu ki̱i̱kalo kya kuhwelekeelela?
12 Mweli̱ma ghukugubha ku̱bu̱ghʼo byakuswekani̱ya okukolagha?
Muntu oghu ali mu nsi eghi baabuluuwe,
akugubha kughambila banji haa bu̱hi̱ki̱li̱i̱le bwawe?
13 Ai̱ Mukama, nuuwe nkubilikilagha kunkoonela.
Nuuwe nkusabagha bu̱li̱ nkyambisi.
14 Ai̱ Mukama, wambhengi̱ye nangaaki?
Wambi̱si̱li̱i̱ye maaso ghaawe bwaki?
15 Ku̱lu̱ghi̱i̱li̱la mu bwana,
nkubona-bonagha kandi mbbala ku̱ku̱wa.
Bifubilo bya kwobahi̱i̱li̱li̱ya okumpaagha byancekeei̱ye.
16 Ki̱i̱ni̱gha kyawe kyammali̱ye maani̱
kandi bintu byamaani̱ okunkolaghʼo byampwelekeleei̱ye.
17 Kilo kyona kikuhuwaagha bi̱neeli̱ghi̱li̱i̱ye si̱ye nga maasi ghatungeeye.
Bikunjisaghʼo ku̱lu̱gha haa bu̱li̱ luhande.
18 Waaleki̱ye baabhootu̱ na baliilanuwa banje bandu̱ghʼo.
Mweli̱ma niiye aabaaye bhootu̱ syanje enkaha oghu ndi naye.