89
Ndaghaano ya Luhanga na Dhau̱dhi̱
Jabbu̱li̱ ya Etani̱ Omujelahi̱ti̱.
1 Nkulimba haa kukunda kwamaani̱ kwa Mukama bilo nʼebilo.
Nkulangilila bwesighibuwa bwawe mu mijo yoona.
2 Kukunda kwawe kwamaani̱ kukuukalʼo bilo nʼebilo.
Bwesighibuwa bwawe bu̱gu̱mi̱ye nga eghulu.
3 Okaghila oti, “Naakoli̱ye ndaghaano na muntu oghu naakomi̱yemu.
Naalahila ewaa mu̱heeleli̱ya wanje Dhau̱dhi̱ nti,
4 ‘Nkufoola baasukulu baawe kuba bakama bilo nʼebilo.
Ntebe yaawe ya bukama ekuukalʼo mu mijo yoona.’ ”
5 Ai̱ Mukama, ebili mu eghulu bisinde haa byakuswekani̱ya okukolagha.
Bilimbe mu kusanga-sangaana kwa bahi̱ki̱li̱i̱ye mu eghulu
ngoku oli mwesighibuwa.
6 Mu mwanya eghulu haliyo oghu engaane na Mukama?
Ni ani̱ mu bʼomu eghulu oghu engaane naawe?
7 Mu lukulato lwa bahi̱ki̱li̱i̱ye niiye baku̱hu̱ti̱yagha.
Boona bakwemililagha bamweli̱ghi̱i̱li̱li̱ya boobahi̱ye.
8 Mukama Luhanga waamahe,
taaliyo oghu akwengaane.
Ai̱ Mukama, oli wa bu̱toki̱
kandi mwesighibuwa.
9 Nuuwe olemi̱ye maananja ghaanamu̱li̱to.
Nuuwe oku̱bhondi̱yagha mighina yagho.
10 Okakpeetaagula ki̱li̱mu̱ Lahaabbu*89:10 Likaba lili li̱i̱na lya ki̱li̱mu̱ kya mu nanja ekyolekagha baasilikale batabangu̱li̱ kandi babhi. kandi waakiita.
Waahanjaaga ngi̱ghu̱ syawe na mukono ghwawe ghwamaani̱.
11 Eghulu ni lyawe kandi nsi ni yaawe.
Nuuwe okakola nsi na ebilimu byona.
12 Okahanga elughulu kandi eku̱wa.
Myena Tabbola na Helu̱mooni̱ ekusindagha li̱i̱na lyawe haabwa kudheedhuwa.
13 Mukono ghwawe ni ghwamaani̱ kwonini
kandi ngalo syawe sigumiiye kimui.
14 Bu̱hi̱ki̱li̱i̱le kandi bwengani̱ja niibiyo musingi ghwa ntebe yaawe ya bukama.
Kukunda kwamaani̱ kandi bwesighibuwa bikughendagha bikuhikiiye.
15 Bali na mu̱gi̱sa abakukulami̱yagha Mukama mbalimba.
Bakuukalagha mu kyeleeli̱ kya haali̱i̱so yaawe.
16 Nuuwe okulekagha badheedhuwa kilo kyona
kandi bakukusinda haabwa bu̱hi̱ki̱li̱i̱le bwawe.
17 Nuuwe okubahaagha ki̱ti̱i̱ni̱sa kandi maani̱,
haabwa kisa kyawe okulekagha tu̱si̱ngu̱la.
18 Mukama niiye akatuha ngabo yaatu
kandi Ahi̱ki̱li̱i̱ye wa I̱saaleeli̱ aatuha mukama waatu.
19 Hambele okabu̱gha na bantu baawe mu kubonekeluwa.
Waaghila oti, “Naakooneeye mulwani̱ wamaani̱
kandi naataaye haa ntebe ya bukama
oghu naakomi̱ye ku̱lu̱gha mu bantu.
20 Naakomi̱ye mu̱heeleli̱ya wanje Dhau̱dhi̱ kuba mukama.
Naamu̱seesi̱yʼo magita ghahi̱ki̱li̱i̱ye.
21 Maani̱ ghanje ghalakalagha hamui naye
kandi bu̱toki̱ bwanje bu̱ku̱mu̱gu̱mi̱ya.
22 Ngi̱ghu̱ siye tabaku̱mu̱si̱ngu̱la,
kedha bantu babhi kumulema.
23 Nkugenga hansi boona abamwohi̱ye
kandi nkpeetaagule ngi̱ghu̱ siye analoli̱ye.
24 Bwesighibuwa kandi kukunda kwanje kwamaani̱ bikuukala hamui naye.
Mu li̱i̱na lyanje ndamufoolagha mu̱si̱ngu̱li̱.
25 Nkugbaatikani̱ya bukama buwe.
Bu̱ku̱lu̱ghi̱i̱li̱la haa nanja namu̱li̱to Medi̱teleni̱yani̱,
ku̱hi̱ka haa maasi Efulaati̱.
26 Akungila ati, ‘Nuuwe tita kandi Luhanga wanje,
kikuka kya kujunuwa kwanje.’
27 Nkumufoola mu̱li̱ghaaso ghwanje
kandi mukama oghu asaai̱ye bakama boona.
28 Nkumukunda kandi nimughilile kisa bilo nʼebilo.
Ndaghaano yanje hamui naye teekuhuwʼo.
29 Nkufoola baasukulu be kuba bakama bilo nʼebilo.
Ntebe yee ya bukama ekuhangaala nga eghulu.
30 Bhaatu baasukulu be mbaanaghai̱ye bilaghilo byanje
kandi batakola ebi bilaghiiye,
31 batu̱wa bilaghilo byanje
kandi basaaghuwa kubikwata,
32 du̱mbi̱ nkubafubila haabwa bibhi byabo.
Nkubahuula kibbooko kubabona-boni̱ya,
haabwa bintu bi̱bhi̱i̱hi̱ye bakwete kukola.
33 Bhaatu tankuuyʼo Dhau̱dhi̱ kukunda kwanje kwamaani̱.
Tankuleka kuba mwesighibuwa hʼeki naamulaghi̱i̱sani̱i̱ye.
34 Tanku̱tu̱wa ndaghaano yanje hamui naye.
Tankuuyʼo na kimui haa ebi naabu̱ghi̱ye na kanu̱wa kanje.
35 Nkalahila mulundi ghumui kandi naamala.
Ndi ahi̱ki̱li̱i̱ye kandi tankugubha kuha bisubha Dhau̱dhi̱.
36 Baasukulu be bakuukalʼo bilo nʼebilo.
Bukama buwe bukuhangaala nga musana.
37 Bukuhangaala bilo nʼebilo nga kweli̱,
okuli kai̱so wa bwesighibuwa bwanje mu mwanya.”
38 Bhaatu waalu̱ghi̱yʼo kandi waabhenga mukama oghu waakomi̱yemu
kandi okwatiluuwe ki̱i̱ni̱gha oghu waaseesi̱yʼo magita.
39 Waatu̱u̱ye ndaghaano waakoli̱ye na mu̱heeleli̱ya waawe.
Waakuba sipeewa yee ya bukama mu tu̱u̱tu̱.
40 Waahendi̱ye bisiika bya kibugha kiye
kandi bigho byakiyo byona byabhi̱hi̱i̱ye.
41 Boona abakukisaalilaghamu bakwibhaghamu bintu.
Baliilanuwa baakiyo boona niibuwo baasekeelela mukama wakiyo.
42 Waaleki̱ye ngi̱ghu̱ siye baamu̱si̱ngu̱la
kandi boona baadheedhuwa.
43 Waafooye byakulwani̱i̱si̱ya biye ebitali na mughaso
kandi waabhenga kumukoonela haa bulemo.
44 Waamuuhiyʼo mwi̱gho ghuwe ghwa bukama.
Waagenga hansi ntebe yee ya bukama.
45 Waaleki̱ye aakaakula bwile buwe butakahi̱ki̱ye
kandi waaleka aahemuka.
Nsaala ya kusaba kujunuwa
46 Ai̱ Mukama, okuukala oneebi̱si̱ye bilo nʼebilo?
Ki̱i̱ni̱gha kyawe kikweyongela kwaka nga mulilo ku̱hi̱ki̱ya dhi̱?
47 Oosuke ngoku bwomi̱i̱li̱ bwanje buli bukee.
Oosuke ngoku waatuhangi̱ye tuli bantu kwonkaha!
48 Ni muntu ki oghu akugubha kuukala ali mwomi̱i̱li̱ oghu atali̱ku̱wa?
Ni ani̱ akugubha kwejuna kumujiika mu kituulo?
49 Ai̱ Mukama, kukunda kwawe kwamaani̱ kwa hambele kuli haa?
Ebi waalaghi̱i̱sani̱i̱ye Dhau̱dhi̱ bili haa?
50 Mukama, otaabululuwa ngoku mu̱heeleli̱ya waawe bakwete kumukoka.
Nku̱gu̱mi̱si̱li̱jagha haa mutima,
ebi bantu bakani̱ye bakunambulagha.
51 Ai̱ Mukama, ngi̱ghu̱ syawe niibuwo bambula mukama oghu waaseesi̱yʼo magita!
Bakumwambulagha hambali akaghendi̱ye hoona.
52 Mu̱si̱i̱me Mukama bilo nʼebilo!
Aami̱i̱na kandi Aami̱i̱na!
*89:10 89:10 Likaba lili li̱i̱na lya ki̱li̱mu̱ kya mu nanja ekyolekagha baasilikale batabangu̱li̱ kandi babhi.