KITABO KYAKANAA
90
(Jabbu̱li̱ 90—106)
Nsaala ya Musa muntu wa Luhanga
1 Ai̱ Mukama, nuuwe buukalo bwatu,
mu mijo yoona.
2 Otakahangi̱ye myena kedha kukola nsi na ebilimu byona,
ku̱lu̱gha hambele na hambele oli Luhanga.
3 Oku̱ku̱u̱ki̱yagha bantu mu tu̱u̱tu̱,
nooghila oti, “Enu̱we bantu, mukuuke mu tu̱u̱tu̱ hambali mwalu̱ghi̱ye.”
4 Ewaawe myaka lu̱ku̱mi̱ eli nga kilo kimui.
Ekubaagha nga kilo kya eso ekyahooyʼo,
nga saaha nkee mukilo.
5 Okumalaghʼo bwomi̱i̱li̱ bwa bantu nga ndooti̱ eghi ekuhuwaaghʼo.
Bakubaagha nga bi̱si̱ngo bitooye nkyambisi.
6 Ebikutuwaagha nkyambisi bisemeeye,
lwagholo byoma kandi bi̱ku̱wa.
7 Ki̱i̱ni̱gha kyawe ki̱ku̱tu̱hwelekeeleli̱yagha
kandi kusaakala kwawe kuleka twobaha.
8 Bubhi bwatu obuboone,
nankabha bibhi ebi tukukolagha mu ki̱bi̱so obimani̱ye.
9 Bilo byatu bikuhuwaaghʼo onatukwatiluuwe ki̱i̱ni̱gha.
Tukumalagha myaka yaatu tutuntuuye.
10 Bantu bakubaagha boomi̱i̱li̱ kumala myaka nsanju̱.
Bakaakubaagha bali na maani̱,
bamui mu ebo bakumalagha myaka kinaanaa.
Bhaatu yoona bakughimalagha mu bijibu,
ehuwʼo kandi baku̱wa.
11 Ni ani̱ akugubha kweli̱li̱kanʼo maani̱ ghaa ki̱i̱ni̱gha kyawe?
Bantu bakukwobaha haabwa kusaakala kwawe.
12 Otwegheesi̱ye ngoku bwomi̱i̱li̱ bwatu bu̱di̱i̱di̱ye,
niikuwo tugubhe kufooka bagheji.
13 Ai̱ Mukama, otukuukʼo.
Okutukwatiluwa ki̱i̱ni̱gha ku̱hi̱ki̱ya dhi̱?
Oghilile kisa baheeleli̱ya baawe.
14 Bu̱li̱ nkyambisi otu̱u̱su̱li̱yaghe kukunda kwawe kwamaani̱,
niikuwo tugubhe kulimba tu̱dheedheeu̱we.
Tulimbe tusemeleeuwe mu bwile bwatu bwona.
15 Otuhe kudheedhuwa kukani̱ye okwengaane na kusaaliluwa waatuhaaye,
mu myaka yoona eghi twamali̱ye ntubona-bona.
16 Oleke etu̱we baheeleli̱ya baawe tubone bikoluwa byawe byamaani̱.
Oleke baasukulu baatu babone ki̱ti̱i̱ni̱sa kyawe.
17 Mukama Luhanga waatu, otuhe mi̱gi̱sa yaawe.
Oleke tube basi̱ngu̱li̱ mu byona ebi tukukola.